"فيه لحظة كده هتيجي بعد الامتحانات، وهتقعد فيها لوحدك، وتسأل نفسك: (يا ترى كنت قدها؟) اللحظة دي مش هتنسى التعب، بس هتفتكر إنك كملت. إنك قاومت النوم عشان تذاكر، وإنك كنت بتعيط من الضغط وكملت، وإنك قلت: "مش قادر" بس كملت برضه. مش مهم مين بدأ قبلك، المهم مين كمل للآخر. مش مهم مين حفظ بسرعة، المهم مين ما استسلمش. فيه فرق بين واحد قال: "المادة دي صعبة" وسابها، وواحد قال: "المادة دي صعبة" وقعد يشرح لنفسه مليون مرة. كل دقيقة بتذاكر فيها دلوقتي، هي دقيقة بتبني مستقبلك، وبترد على كل صوت جواك قالك: "مش هتنجح." فاضل وقت، ولسه الفرصة في إيدك. حاسب تمشي في الشارع بعد النتيجة وتقول: "يا ريتني شدّيت." حاسب تبص في عينين أهلك وتشوف فيهم سؤال وجعك: "كنت قدها؟" شد حيلك… علشان مفيش أحلى من طعم الانتصار بعد تعب حقيقي. هانت يا أبطال ربنا يكرمكم ويوفقكم يآرب ❤️