مضى نصف الزمن ..! ♥️ دي العبارة اللي كانو المراقبين بيستمتعو انهم يقولوها في نص الامتحان و على قدر الرعب الذي تبثه في النفوس إلا إنها كانت بتحدد لي أنا وين كنت بشعر بي راحة و فخر رهيب لما تتقال و اكون خلصت حل و براجع في الأسئلة .. لما اكون ما قربت اصلا اخلص .. بعرف انه وضعي سيء! و هكذا .. في تجاهلنا الرهيب للزمن و أهميته .. بننغمس في أزماتنا الخاصة ناسيين انه الأزمات دي هي عمرنا اللي قاعد يمشي ..المشكلة ما في الأزمة .. المشكلة انها تعدي عليك و ما تتعلم ! على هامش الأمر كدة … نحن ما بنتذكر الناس اللي اتسببو لينا في أزماتنا و بس .. لااا .. نحن كمان بنتذكر اللي وقفو على الحياد في الأزمات دي.. و اللي ما وقفو بالمرة .. ! كله محسوب و متسجل في ذاكرة ما بتتمسح .. لأنه ذاكرة الألم مختلفة .. ممكن تنسى حدث حصل ليك .. لكن ما ممكن تنسى لما وطيت جمرة .. ألم الحريق ما بتنسى ! دة الهامش .. إنما الجوهر فهو إنه الأزمات هي المحك الحقيقي في الحياة ليك ..! لكل ما اكتسبته من خبرات و قدرات ..هنا حيظهر كنت بتعمل شنو في السنين الفاتت . الأزمات هي أنت و أنت الأزمات غير انها توريك نفسك .. و قدرتك على التعامل مع الألم ..حتوريك دوايرك عاملة كيف في زول في دايرة بعيدة حيقرب و كتار قراب هيبعدو ! حبايب ما كنا متوقعين منهم خذلان .. كانو أكثر من آلمونا .. غرباء ما متوقعين منهم حاجة .. سندونا و كأنما نحن كل ما يملكون ! ما تحزن .. او اقوليك احزن زي ما عايز .. بس اتذكر كل ألم درس و كل درس حياة جديدة ليك و خبرة مكتسبة و تطور في شخصك و إدارتك لي نفسك و حياتك .. و اتذكر و انت منغمس في حزنك و أزمتك و شكواك .. و الماشي دة عمرك مضى نصف الزمن ! شغلك كيف ؟ حليت الأسئلة ! محبتي التي تعلمون .. #سلمى_المصباح يونيو ٢٠٢٥ .. عدت نص السنة ..!