بنت بتحكي عن بنت زميلتها في الثانوية بتقول: إنها كانت حالتها المادية صعبة جدا ، وبعد ما أبوها مات ، الوضع المادي اتغير تماما.. لدرجة إن زميلتها فكرت إن البنت دي ورثت بعد موت أبوها، وسألتها عن التغيير ده فبكت البنت وقالتلها لما بابا كان عايش : والله كنا بنام من غير عشا، وكنت بخرج من البيت الصبح وأجي المدرسة من غير فطار لان فلوس شغله مش بتكفينا.. ودلوقتي بعد ما أبويا مات بقى كُل الناس قرايبنا ومعارفنا وجيرانا وأهل الخير واخدين بالهم منا، وبيساعدونا عشان بقينا يتامى.. ولحد هنا كلام البنت دي كويس جداً، بس المُفاجأة بقى إن البنت دي مسكت إيد زميلتها وبكت وقالت جملة تخلع القلب من مكانه.. قالت : كان نفسي أبويا يشبع قبل ما يموت " يعني قرايبنا وأهل الخير معروفوش إن إحنا غلابه غير بعد ما أبويا مات وبقينا يتامى عشان كده يا جماعة دوروا حواليكوا على الناس الغلابة، هتلاقوا ناس كتير يحسبهم الجاهل أغنياء من التعفف.. ابحثوا عن الغلابة اللي حواليكوا هتلاقوا قلوب مليانة آلام ووجع لا يسمع أنينها إلا الله سبحانه وتعالى.. ابحثوا عن الغلابة ومش لازم واحد يموت من الجوع عشان تعرفوا إن أهل البيت دول غلابة ومحتاجين..