کابل، صداقت فوټسال لوبډلې د هېواد د ورزش ادارې له رهبرۍ سره وليدل دوشنبه، د غبرګولي ۱۲مه، ۱۴۰۴ د افغانستان فوټسال غوره ليګ څلورم پړاو سياليو کې لوبېدونکي صداقت فوټسال لوبډلې د هېواد ورزش ادارې له رهبرۍ سره وليدل. په دغه ليدنه کې د هېواد د ورزش ادارې فني او مسلکي مرستيال حافظ احمد جان ځدراڼ د فوټسال لوبغاړو، د فوټسال د ودې لپاره ترسره کړې هڅې وستايلې او زياته يې کړه، چې دا د خوښې ځای دی، چې اوس د افغانستان په داخلي ليګونو کې بهرني لوبغاړي لوبيږي. دغه راز نوموړي په صداقت لوبډله کې له ايران هېواد څخه راغلي ورزشکاران تشويق او په ډاليو ونازول، چې د افغانستان فوټسال غوره ليګ څلورم پړاو سياليو کې د لوبېدو لپاره افغانستان ته راغلي دي. په دغه ليدنه کې د هېواد د ورزش ادارې پر فني او مسلکي مرستيال سربېره، د المپيکي چارو رئيس داد محمد پاينده اختري، د فوټبال فدراسيون رئيس محمد يوسف کارګر، د کورش فدراسيون رئيس سيد محمود ضياء دشتي، د نشراتو رئيس اتل مشواڼي او د فوټسال ورزشکارانو ګډون کړی و. د يادونې وړ ده، چې د افغانستان فوټسال غوره ليګ څلورم پړاو سيالۍ به د ۱۰ لوبډلو په ګډون د روانې هجري شمسي مياشتې پر ۱۶مه نېټه د افغانستان فوټسال کمېټې په مرکزي جمنازيم کې پيل شي.