ماتغلطش غلطتي و تصدق نفسك الكفاءة لوحدها مش كفاية عشان تحميك… ولو فضلت لوحدك، هتدفع الثمن غالي. زمان في بداية شغلي و لفترة طويلة كنت طول الوقت فاكر إن الكفاءة لوحدها تكفي، وإن الشغل بيتكلم عن نفسه…وإن الإنجاز و التفاني في العمل هي أقوى سيرة ذاتية. كنت قافل على نفسي و ماكنتش بحب أظهر كتير، ولا أتواصل اجتماعياً بره حدود الشغل… بس اللي ماكنتش مستعد له… هو إني في يوم صحيت، ولقيت نفسي برا الشغل. من غير تحذير… ماكنتش عامل حسابي لكده أبدا و طبعا مكانش عندي شبكة علاقات تخليني أتحرّك بسرعة أو أبدأ من جديد بثقة. و طبعا ده كان درس قاسي خدت وقت صعب عشان أعالج آثاره في حياتي و عشان ماتعلمتش الدرس كويس ، لفت الأيام و لقيت نفسي في Drop تاني و هو إني كنت موجود لفترة طويلة في مكان مش شبهي، بيقتل طموحي ، مسجون فيه و مش عارف اخرج لأني ببساطه معنديش بديل جاهز و مش لاقي البديل ده و المشكله الثابتة مع مرور السنين و تغير المواقف هي أني قاعد و مرحرح في منطقة الراحة و مابنيتش علاقات… ماعنديش شبكة ناس تعرفني، أو ممكن تساعدني أتنقل لمكان يناسبني. مافيش بدائل… ومافيش دعم… لأني من الأول اخترت أكون لوحدي او بمعني آخر ، لأني قضيت سنين باشتغل لوحدي… بعيد عن الناس، بعيد عن التواصل، وبعيد عن أي استثمار حقيقي في العلاقات. العبرة هنا : ان الكفاءة مهمة، بس الذكاء العاطفي هو اللي بيخليك تبني علاقات إنسانية حقيقية، وتعرف تتواصل من غير تصنّع، وتزرع ثقة حوالينك من غير ما تفقد نفسك. مهارات التواصل مش مجرد “مهارات ناعمة”… دي شرايين النجاة في وقت الأزمات. الدروس اللي اتعلمتها متأخر: • متخليش شغلك يستهلكك وتنسى تبني علاقات. • ماتفترضش إن الأداء العالي دايمًا بيحميك. • ماتستناش لحد ما تقع عشان تبدأ تتواصل. للاسف الشديد في وسط دوامة الشغل والمهام والمجهود، ساعات بننسى إن العلاقات مش بس وسيلة "عشان نلاقي فرصة"، لكن كمان وسيلة "عشان نكون بشر". السؤال على الناس، والاهتمام بيهم، ومجرد إنك تبعت رسالة وتسأل: "عامل إيه؟ محتاج حاجة؟"، الحاجات دي ليها قوة حقيقية. أوقات بتكون الفرق بين حد وقع ومش قادر يقوم، وحد لقى كلمة رجّعته لنفسه. العلاقات مش دايمًا بتتبني في وقت الأزمات… العلاقات الحقيقية بتتبني في اللحظات العادية، لما تبادر بالتواصل، لما تكون موجود من غير مصلحة، لما تهتم بالبني آدم اللي قدامك مش بس بلقبه أو دوره الوظيفي. لو لسه في بداية الطريق، اسأل نفسك: لو حصل دروب بكرة، أو فقدت شغلك فجأة… هل في حد ممكن يسندك؟ هل بنيت رصيد من العلاقات الحقيقية، زي ما بنيت رصيد من الإنجازات؟ #تجربة_شخصية #علي_موسى راقت لي منقول للاستفاده