*Chishanu 13 Chikumi - June 2025* *Kurangarira Antoni wePadua, Mupristi* *neNgwazi yezvechitendero* *Chiverengo chokutanga:* _2 VaKorinde 4,7-15_ _Inzwai chiverengo chinobva mutsamba yechipiri yaPauro kuvaKorinde_ 7 Hama dzangu, upfumi uhu tinaho huri muhari dzevhu, kuratidza kuti simba ramasimba ose nderaMwari, kwete redu. 8Tinotambudzwa nenzira dzakasiyanasiyana asi hatishai pokupunyuka napo, tinoshaiswa mazano asi hatirasi mwoyo; 9 tinoshushwa asi hatisiiwi tiri toga; tinorigirwa pasi asi hatiparadzwi. 10Tinogara takaberekana narwo rufu rwaJesu, kuti upenyu hwaJesu huratidzwewo mumiviri yedu. 11 Paupenyu hwedu, tinogara takangotarisana narwo rufu pamusana paJesu, kuti upenyu hwaJesu huratidzwe munyama yedu inofa. 12 Naizvozvo, isu tinogara takafudzwa narwo rufu asi imi muri muupenyu. 13 Zvino zvatine mweya mumwechetewo wechitendero wakanga uine uyo akanyora achiti, “Ndakatenda ndikataura, saizvozvo,” isuwo takatenda tinotaura saizvozvo, 14 tichiziva kuti iye akamutsa Tenzi Jesu, achatimutsawo naJesu achizotiunza pamwechete nemi paari. 15Zvose izvi kuitira imi, kuti nyasha nokupararira kwadzinoita kuvanhu vakawanda, kutendawo kuwande, kuti Mwari agorumbidzwa nazvo. *Shoko raMwari.* *Rwiyo rwokutsinhira:* _Nziyo 116,10-11.15-16.17-18. (D - 17)_ *(D) - TENZI, ndichapira kwamuri, chibayiro chokutenda.* 10 Ndakaramba ndiine chitendero changu, kunyange ndaiti zvangu, “Ndiri kutambudzika zvikuru.” 11 Pandakanga ndazunzika kudaro ndakati, “Kuvimba nomunhu hakuna maturo.” *(D) - TENZI, ndichapira kwamuri, chibayiro chokutenda.* 15 Kuna TENZI, rufu rwavarurami vake rwakakosha. 16 TENZI ini ndiri muranda wenyu. Ndiri muranda wenyu, mwanakomana womurandakadzi wenyu, makandinunura kurufu. *(D) - TENZI, ndichapira kwamuri, chibayiro chokutenda.* 17 Ndichapira kwamuri chibayiro chokutenda, ndichinamata zita raTENZI. 18 Ndichaita zvandakatsidza kuna TENZI, vanhu vake vose vachizviona *(D) - TENZI, ndichapira kwamuri, chibayiro chokutenda.* *Kupemberera Shoko Rakanaka:* _VaFiripi 2,15d-16a_ *Areruya, Areruya* Muchapenya sechiedza panyika, nokuti makabatisisa shoko roupenyu. *Areruya.* *Shoko Rakanaka:* _Mateu 5,27-32_ _Inzwai Shoko Rakanaka rakanyorwa naMateu_ Jesu akadzidzisa vadzidzi vake achiti: 27 “Makanzwa kuti zvakanzi, musaite upombwe. 28 Asi ini ndinoti kwamuri, ‘Ani naani anotarisa mukadzi achimuchiva atoita upombwe naye mumwoyo make.’ 29 Kana ziso rako rorudyi richikukonzera kutadza risvukunure urikande kwakadaro. Zviri nani kurasikirwa neimwe nhengo yomuviri wako panze pokuti muviri wako wose ukandwe mugomba romoto. 30 Kana ruoko rwako rworudyi ruchikukonzera kutadza rudimbure urwukande kwakadaro. Zviri nani kurasikirwa neimwe yenhengo dzako panze pokuti muviri wako wose uende kugomba remoto. 31 Zvakanziwo uyo anoramba mukadzi wake ngaamupe tsamba yegupuro. 32 Asi ini ndinoti, ‘Ani naani anoramba mudzimai wake kunze kokunge chikonzero chacho chiri choupombwe, anomuita kuti aite upombwe. Ani naaniwo anoroora mukadzi akarambwa anoita upombwe.’ ” *Shoko Rakanaka raTenzi.*