⛔️ مساء الخير ...الف سلامه عليكم وعلى احبابكم من فزع امبارح طبعا ..ومعذره للتغيب بس برد الصيف لايرحم ⛔️ مصر مدخلتش حزام الزلازل ولا حاجه هي مش بطوله كارتيه ⛔️ ليه ٣ زلازل في شهر ؟ علشان المنطقه الواقعه فيها تركيا وكريت وقبرص منطقه اصلا نشطه تكتونيا ⛔️ طب ليه كل السنين الي فاتت محصلش ده اشمعنى الوقتي ٣ في شهر والموضوع كأنه هيبقى معتاد ؟ علشان في ضغط على الجانب الشرقي والغربي من العالم وطبيعي الموجات الزلزالية تنتقل زي تأثير الموجه من مكان ل مكان ..طبيعي مع الوقت الاماكن الي مكنتش بتسمع عنها ..تبدا تسمع عنها واماكن اخرى تعتاد عليها مفيش قياس ⛔️ البحر المتوسط له قدره ربانيه كده ع انشاء تسونامي في حاله حدوث انهيار بحري او زلزال في قاع البحر او او مفيش حاجه اسمها تسونامي ٥٠ و٦٠ متر والكلام ده عار تماما من الصحه ولا مثنعه بقى ولا مهدرجه ⛔️ الزلازل ملهاش نمط معين تتكرر فيه ومبتحصلش في اوقات معينه ..طب ليه ال٣ زلازل عندنا بليل في نفس الوقت ! هقولك في نظريات علميه بتحاول تفسر الموضوع ده بوضع نظريتين (فرضيتين) وهم : ☢️نمط "سلم الشيطان" (Devil’s Staircase): ودي بتشير ان بعض الدراسات أن الزلازل الكبيرة قد تتكرر في مجموعات متقاربة زمنيًا تتبعها فترات هدوء طويلة، لكن هذا لا يرتبط بوقت محدد من اليوم . -☢️ نمط توزيع ويبل (Weibull Distribution): يستخدم لتحليل الفترات الزمنية بين الزلازل، لكنه لا يتنبأ بمواعيد محددة لحدوثها . والموضوع باخذ شكل من الايقاع في الفترات الزمنيه بين الزلازل ⛔️ الهزات والزلازل كلها الي حصلت مازالت خارج مصر ماعدا زلزال الغردقة الي كان ٣ريختر تقريبا وكل الي بنشعر به ماهو الا تأثرا من النشاط في شرق المتوسط ⛔️ممكن بنظره بسيطه تبص على دول شرق اسيا وحلقه النار هتلاحظ زياده ملحوظه في الزلازل والبراكين نفس الامر بالنسبه للامريكتين وان كان بصوره اقل شويه من شرق اسيا ..ف تخيل شخصين ماسكين قطعه قماش طويله وبيعملو بيها موجات (بينفضوها )وانت في النص...عاجلا ام اجلا هتوصلك الموجه وده انسب شرح مبسط للوضع ⛔️ محتاجين نبطل جدال واهتمام بهل الزلزال ده صناعي ولا طبيعي ولا غضب ولا تذكره ونبدأ نتعود على الهزات ونجهز انفسنا علميا ونفسيا للتصرف اذا حصل اي طوارئ ومحتاجين اولادنا كمان تتفهم الوضع وتبعياته لانه دول الغرب بالفعل بتعلم الاجيال كيفيه التصرف في الحاله دي ومواجتها والاستعداد لها نفسيا....فحصل زلزال ...تمام نتكاتف ونساعد بعض ونطمن بعض ونوعي بعض ونعرف انه اي كان السبب فهو في ميزان حسناتنا ومغفره للذنوب وتطهيرا منها ومعلش مفيش احن من ربنا سبحانه وتعالى علينا في اقداره ⛔️ طبيعي جدا جدا جدا جدا بعد الزلازل تفضل حاسس بهزات وتصحى مفزوع من النوم عليها..بيكون وضع مؤقت وكل حاجه بترجع طبيعيه..بس احذر الوهم لانه ممكن يعملك وساس بوجود زلازل وهزات وهو مفيش ع ارض الواقع ☢️ هل نتوقع تكرار الهزات دي ؟ اه نتوقع ومحتاجين نبعد شويه عن التباكي والخوف حتى وان كان لينا كل الحق في الخوف ونبدا نتدبر في الي بيحصل ونوقف سويا في حماية الارواح والممتلكات والارض ⛔️ طبعا المره دي معذورين داعمي نظريات المؤامرة في انه الاحداث دي صناعيه بسبب تقارب الوقت وانه المشهد يوحي بكل ده..ف بنتمنى من الله السلامه ومحتاجين بالفعل نتكاتف كلنا في كل الأحوال لمسانده انفسنا كشعب ومسانده حكومتنا في مواجه ده عند الطوارئ لاقدر الله ...شكرا لرسايلكم وسؤالكم وان شالله يمر دور التعب بسلام وارد على رسايل حضراتكم...شكرا على كل حاجه ..وكل عام وانتم بالف خير...وثبتو قلوبكم بالتسليم لله وكل حاجه مقدره من قبل ان نولد