Rhapsody Tongan Sat Jun 14 2025 KO E MĀLOHI ‘O E VĪSONE MO E FAKA’UTA Pea na’e to’o mai ‘e Sēkope ‘a e ngaahi va’a ‘akau hinehina mo mata, ko e ‘akau ko e futu pea mo e ifi; pea ne fohifohi’i hono kili, koe’uhí ke hā mai ‘a e ngaahi potu hinehina ‘i he ‘akau… (Sēnesi 30:37). Ko e talanoa ‘o Sēkope ‘ia Sēnesi 30 mo e 31 ko e fakahāa’i fakaofo ia ‘a e mālohi ‘o e vīsone mo e faka’uta. ‘I he loto ‘a Sēkope ke ngāue ma’a Lēpani, na’e palōmesi kiate ia ko ‘ene totongí ko e fanga monumanú. Kaekehe, na’e toutou liliu ‘e Lēpani ‘a e ngaahi makatu’ungá mo kākaa’i ‘a Sēkope. Ka na’e fakatafoki ‘e Sēkope ‘a e tūkunga ko ia, fou ‘i he poto faka-‘Otua mo e fokotu’utu’u kehekehenga. Na’e to’o ‘e Sēkope ‘a e va’a ‘akau hinehina mo mata, mei he futu pea mo e ifi, ‘o fohi hono kili ke hā mai ‘a e potu hinehiná. Na’a ne tuku ‘a e ngaahi va’akau ni ‘i he tafenga vai ‘oku ha’u ki ai ‘a e fanga sipí ke inu. ‘I he tuitu’ia ‘a e fanga monumanú ‘i mu’a he ngaahi va’akau, na’a nau fanau’i ha ngaahi ‘uhiki ‘o tatau tofu pe mo e me’a na’e fiema’u ‘e Sēkopé. Hili ia, na’e ‘ikai toe fiema’u ‘e Sēkope ‘a e ngaahi va’akaú. Na’a ne fakamavahe’i ‘a e fanga sipi ‘uhiki, lavatea mo pulepule pea fokotu’u kinautolu ‘i he ‘ao ‘o e fanga monumanu mālohi. ‘I hono fai eni, na’a ne fakatupu ‘a e vīsone ma’ae fanga sipí, pea nau ‘omi ‘o fakatatau ki he me’a na’a nau sio ki ai. Ko e founga ‘a Sēkope ‘a e fakahā’anga ‘o e mālohi fakatupu ‘o e vīsone. Na’a Ne ngāue’aki ‘ene mafeia faka’uta ke liliu ‘a e olá. ‘I he tuitu’ia ‘a e fanga monumanu mālohí, na’e tuku ‘e Sēkope ‘a e ngaahi va’akau kenau sio ki ai, ‘o fakapapau’i ke nau ‘omi ‘a e ‘uhiki mālohi, mo faka’ofo’ofa. Ko e taimi na’e vaivai ai ‘a e fanga monumanú, na’e ‘ikai ke ne tuku ai ‘a e ngaahi va’akau, ko ia na’e ‘a Lēpani ‘a e fanga monumanu na’e vaivaí. ‘I he ‘alu ‘a e taimí, na’e faka’a’au ke mālohi mo lahi ange ‘a e fanga sipi ‘a Sēkope, kae vaivai pē ‘a e fanga monumanu ‘a Lēpani. Ko e lavame’a ‘a Sēkopé na’e ma’u he fakahā’ilo faka- ‘Otua. ‘I he misi, na’e mamata ia ki ha sipi tangata ‘oku hopo ki he fangamanú ‘oku ‘ile’ila, pulepule, mo kelo. Pea fakamo’oni ‘a e ‘āngelo ki he visone ko eni, ‘o pehē, “Hiki hake ho mata pea vakai, ko e fanga sipi tangata ‘oku hopo hake ‘i he fangamanú ‘oku ‘ile’ila, lavatea, mo kelo…” (Sēnesi 31:12 NKJV). Hono mahu’inga ‘o ‘eni! ‘Oku ke ma’u ‘a e mafeia ke fakatupu ‘a e kaha’u ‘oku ke fiema’ú ‘i ho’o fakamama’u ki he me’a ‘oku ke fiema’u ke sio ki ai. Fakatupu ‘a e vīsone ‘o e me’a ‘oku ke fiema’ú ‘i ho ‘atamaí. Fou ‘i he Folofolá mo e mālohi ‘o e Laumālie Mā’oni’oní ‘oku ngāue ‘iate koe, te ke lava ‘o fakatupu mo fakafuo ho’o me’a mo’oni fakamatelié. Haleluia! Prayer / Confession ‘Apā Tamai, ‘oku ou fakamālō’ia ho’o foaki mo’oku ‘a e mafeia ke sio mo fakatupu ‘a e kaha’u ‘oku ou fiema’ú fou ‘i he mālohi ‘o e vīsone pea mo ho’o Folofolá. ‘I he’eku ngāue’aki hoku mafeia faka’utá, ‘i he fakamānava ‘a e Laumālie, ‘oku ou langa ‘eku mo’uí ‘o hu’ufataha mo ho’o taumu’a faka-‘Otuá, ‘i he ikuna pea mo e mafola atu ki he potu kotoa. ‘Oku fakaivia au ke alasi hoku māmaní mo fakakakato hoku iku’angá, ‘i he Huafa ‘o Sisū. ‘Emeni. Further study Sēnesi 13:14-17; Hapakuki 2:2; ‘Efesō 3:20 1-year bible reading plan Ngāue 4:32-5:1-11 & 2 Kalonikali 20-22 2-year bible reading plan Luke 1:39-56 & Teutalōnome 12 WhatsApp Chanel for rhapsody Translation : https://whatsapp.com/channel/0029Va9SJ9OHFxP0Xh4KCN3F