*KAZOOBA (LWAKUSOOKA), 02 SSEBAASEKA, 2025* *LWAKUSOOKA OLWA WIIKI EYOMUSANVU MU BW’AMAZUUKIRA: OMWAKA C.* *Mariselino Omutuukirivu, Musaserdooti era Mujulizi.* *Petero Omutuukirivu Omugobi w'Amasitani, Mujulizi.* *Erazimasi (Erasmus) Omutuukirivu, Mujulizi.* *Bulandina Omuzana Omutuukirivu, Mujulizi.* *Sitefano owe Sweden Omutuukirivu, Mumonaki era Mujulizi.* *Rogate Omutuukirivu, Mujulizi.* *Nikolawo/ Nikolasi Peregirino Omutuukirivu, Munyikivu.* *Wugini / Yugini Owoluberyeberye Omutuukirivu, Paapa.* *Omwesiimi Yozefu Tiyeni (Tien) owe Laos, Musaserdooti era Mujulizi.* *Alekizanda owe Vienne Omutuukirivu, Musawo era Mujulizi.* *Bodifani owe Wales Omutuukirivu, Mumonaki.* *Ada owe Ethiopia Omutuukirivu, Mujulizi.* *Evaziyo (Evasius) Omutuukirivu, Mujulizi.* *ESSOMO ERISOOKA* _Bukya mukkiriza, mwali mufunye Mwoyo Mutuukirivu?_ *Bye tusoma mu Kitabo ky’Ebikolwa by’Abatume 19: 1-8*   Apollo yali akyali e Korinti, Pawulo n’ayita mu Masaza ag’engulu, n’atuuka mu Efezi n’asangamu abasomi abamu, n’ababuuza nti: Abaffe, bukya mukkiriza, mwali mufunye Mwoyo Mutuukirivu? Bo ne bamuddamu nti: Situwulirangako nti oba waliyo ne Mwoyo Mutuukirivu. Ye n’abagamba, nti: Kale mwabatizibwa ku ki? Bo ne bamuddamu, nti: Batisimu ya Yowanna. Pawulo n’abagamba, nti: Yowanna abantu yababatizanga na Batisimu ya kubonerera, ng’agamba oyo ajja okumuvaako ennyuma: Kwe kugamba, nti: Yezu. Bwe baamala okuwulira ebyo, ne babatizibwa mu Linnya ly’Omukama Yezu. Pawulo bwe yamala okubassaako emikono, Mwoyo Mutuukirivu n’abajjamu, ne boogera ennimi, ne balanga n’okulanga. Abasajja bonna awamu bali bawera nga kkumi nga babiri. Awo n’ayingira mu Sinagoga, n’ayigirizayo emyezi esatu nga tatya; ng’awakana ate ng’abakkirizisa Obwakabaka bwa Katonda. _Ebyo Omukama yabyogera_   *OLUYIMBA OLW’OKWEBUULIRIRA: Zab 68: 2-3, 4-5ac, 6-7ab.* _Ekiddibwamu: *Obwakabaka bw’ensi muyimbire Katonda.*_ Katonda asituse abalabe be babune emiwabo, abamukyawa bamwetegule nga bukyali. Bataabuukana ng’omukka bwe gutaabuukana, ng’envumbo bw’esaanuuka ku muliro, n’aboonoonyi bwe bazikirira batyo mu Maaso ga Katonda. _Ekidd: *Obwakabaka bw’ensi muyimbire Katonda.*_ Naye abatuufu basanyuka, bajaganya mu Maaso ga Katonda, ne beesiimira mu ssanyu. Muyimbire Katonda, Erinnya lye muliyimbire ku ntongooli. _Ekidd: *Obwakabaka bw’ensi muyimbire Katonda.*_ Kitaawe wa Bamulekwa, alabirira Bannamwandu, Katonda ali mu kisulo kye ekitukuvu. Katonda abasuuliddwa abategekera enju, abasibe abaggyayo n’abatuusa mu kwesiima. _Ekidd: *Obwakabaka bw’ensi muyimbire Katonda.*_ *OKWANIRIZA EVANJIRI* _Ekidd: *Alleluya, Alleluya.*_ Mwoyo Mutuukirivu alibayigiriza byonna, n’abajjukiza byonna bye nnabagamba. _Ekidd: *Alleluya, Alleluya.*_    *EVANJIRI*   _Mugumanga, Nze ensi ngiwangudde._   *Ebigambo by’Evanjniri ya Mukama waffe Yezu Kristu ebivudde mu Yowanna 16: 29-33* Mu budde buli Abayigirizwa ne bagamba Yezu nti: Ggwe wamma, kaakano oyogera kyere, toyisa lugero n’akatono. Kaakano tutegedde ng’omanyi byonna; tiweetaaga muntu akubuuze. Awo nno kye tuva tukkiriza nga wava wa Katonda. Yezu n’abaddamu nti: Kazzi kaakano mukkiriza? Kale ekiseera kijja n’okutuuka kituuse mubune emiwabo mundeke obw’omu. Sso era siri bw’omu kuba Kitange ali wamu nange. Ebyo mbibagambye, mulyoke mubeere n’emirembe ku bwange. Ku nsi mulikabirirwa; naye mugumanga, Nze ensi ngiwangudde.   _Ebyo Omukama yabyogera._   *OKWEBUULIRIRA KU KIGAMBO KYA KATONDA.* _Omulamwa: *Mugumanga, nze ensi ngiwangudde.*_ Mukama waffe Yezu Kristu akakasa n’aggumiza ekinyusi ky’obulamu bwa buli Muyigirizwa we: okwetikka omusaalaba ne tumugoberera; ebigezo kitundu ku bulamu bw’Omuyigirizwa: _“ku nsi mulikabirirwa.”_ Kyokka atusuubiza obutatwabulira ne mu budde bw’okugezebwa atutuuse ku buwanguzi: _“mugumanga, Nze ensi ngiwangudde.”_ Ebigambo by’Omukama bino bitujjukizenga okubeerawo kwa Katonda waffe mu buli mbeera gye tuyitamu; atukakasa nga tuli ba kugabana ku kwagala kwe okutagooka, obwesige bwe n’obuwanguzi bwe mu budde bwaffe buno. Kikafu nti Omusaalaba kitundu ku bulamu bw’Omukkiriza, era okukabirirwa n’obulumi mu nsi mwebuli ate tetuyinza kubudduka; olw’ebigambo bya Mukama waffe; _“Mugumanga”_ bituzzaamu amaanyi obutaterebuka mu kugoberera Kristu. Wakati mu misaalaba by’obulamu bwaffe, twongera kuwera nga bwe watali kintu na kimu kisobola kutujja ku Kwagala kwa Katonda okweyolekera mu Kristu Yezu Mukama waffe. Nga tulindirira okujja kwa Mwoyo Mutuukirivu Omukama Yezu gwe yasuubiza okutuukiriza, naffe twegayirire Katonda Kitaffe atujjuze amaanyi, okwagala n’okwagala bannaffe, awamu n’obuvumu bw’okusigala nga tunyweredde ku Ye yekka ne budde obwa kazigizigi; addamu okutukubiriza; _“Mugumanga, Nze ensi ngiwangudde."_ _Ayi Mukama Yezu Omulokozi waffe nkwebaza okumpanirira bulijjo ne mu mbeera ey’ebisoomooza n’ebikemo, jjuuza mu mitima gyaffe emirembe gy’omu Ggulu gy’oli ngowaŋŋamye wamu ne Patri ne Mwoyo Mutuukirivu, Amiina._ *PADRE PIO OMUTUUKIRIVU SABIRA ABOONOONYI BONNA AWAMU NABO BONNA ABAVA KU EKELEZIYA WA KATONDA OMUTUKUVU BADDE ERI YEZU ALI MU SAKARAMENTU ETTUKUVU ENNYO.* *©2025: PADRE PIO OMUTUUKIRIVU TUSABIRE.*