*WALUMBE (LWAKUBIRI), 10 SSEBAASEKA, 2025* *LWAKUBIRI OLWA WIIKI EYEKKUMI MU BUDDE OBW’OMWAKA C.* *ESSOMO ERISOOKA*   _Yezu tiyali “yee” oba “nedda”, naye ye “Yee” bulijjo._   *Bye tusoma mu Bbaluwa Eyokubiri Pawulo Omutume gye yawandiikira ab’e Korinti 1: 18-22*   Ab’oluganda, ndayidde amazima ga Katonda: ebigambo bye tubagamba timuli nkulu bbiri ezo: Yee, ate: Nedda. Omwana wa Katonda Yezu Kristu gwe twabayigiriza: Silivano, Timotewo nange, tiyali nkulu bbiri ezo: Yee, ate: Nedda: mwalimu Yee, bulijjo. Nandibadde Katonda bye yasuubiza bingi, Yee, eyanukula byonna ebyo, eri mu ye. Ky’ova olaba nga bwe tuba tutendereza Katonda “ku bubwe”, tukyanukula, nti: Amiina. Katonda Oyo y’atunyweza awamu mu Yezu Kristu ffe nammwe, era y’atusiiga n’atussaako akabonero, n’atuwa omusingo, Mwoyo, gwe tutwala mu mitima gyaffe.   _Ebyo Omukama yabyogera._   *OLUYIMBA OLW’OKWEBUULIRIRA: Zab. 119: 129, 130, 131, 132, 133, 135.* _Ekiddibwamu: *Omuweereza wo mutunuulize amaaso amasanyufu.*_   By’okuutirira byewuunyisa, omwoyo gwange kye guva gubituusa. Okulangirira kw’Ekigambo kutangaaza, kuyigiriza abatamanyi. _Ekidd: *Omuweereza wo mutunuulize amaaso amasanyufu.*_ Njasamya akamwa kange ne nzisa ekikkowe, kuba nneegomba Ebiragiro byo. Kyukira gyendi onsaasire, nga bw’otera okukolera abaagala Erinnya lyo. _Ekidd: *Omuweereza wo mutunuulize amaaso amasanyufu.*_ Entambula yange girambike ng’enjogera yo, wabulewo obubi obunneefuga. Omuweereza wo mutunuulize amaaso amasanyufu, njigiriza bye wateesa. _Ekidd: *Omuweereza wo mutunuulize amaaso amasanyufu.*_ *OKWANIRIZA EVANJIRI* _Ekidd: *Alleluya, Alleluya.*_ Ebigambo byo, Ayi Mukama, biba mwoyo, biba bulamu. Ggwe olina ebigambo by’Obulamu Obutaggwaawo. _Ekidd: *Alleluya, Alleluya.*_   *EVANJIRI*   _Mmwe kitangaala ky’ensi._   *Ebigambo by’Evanjiri ya Mukama waffe Yezu Kristu ebivudde mu Matayo 5: 13-16*   Mu budde buli, Yezu yagamba Abayigirizwa be, nti: Mmwe munnyo gw’ensi. Kale oba ng’omunnyo gusaabulukuka, guddamu gutya ensa? Guba tigukyalina mugaso, wabula okumansibwa ebweru, abantu ne bagulinnyirira. Mmwe kitangaala ky’ensi. Ekibuga ekikubiddwa ku lusozi, tikiyinza kukisibwa. Era tibakoleeza ttawaaza kusaanikira nsaanikire mu kibbo: wabula ewanikibwa ku kikondo, n’emulisa bonna abali mu nju. Ekitangaala kyammwe kyakire abantu, balabe ebikolwa byammwe ebirungi, balyoke bagulumize Kitammwe ali mu Ggulu.   _Ebyo Omukama yabyogera._