*MUKASA (LWAKUSATU), 11 SSEBAASEKA, 2025* *LWAKUSATU OLWA WIIKI EYEKUMI MU BUDDE OBW'OMWAKA C.* *BARUNABA / BANABASI OMUTUUKIRIVU- Mutume.* *ESSOMO ERISOOKA* _Yali muntu mulungi ng’ajjudde Mwoyo Mutuukirivu n’Okukkiriza._ *Bye tusoma mu Kitabo ky’Ebikolwa by’Abatume 11: 21b-26; 13: 1-3* Mu nnaku ezo omuwendo gw’Abakkiriza abazze eri Omukama ne gweyongera nnyo. Ebigambo ne bigwa mu matu g’Ekeleziya y’omu Yeruzalimu, nga boogera ku ebyo; ne balyoka batuma Barunaba mu Antiyokiya. Bwe yatuukayo, n’alaba enneema ya Katonda, n’ajaguza. N’abakubiriza bonna banywerere ku Mukama n’omutima omugumu. Yali muntu mulungi ng’ajjudde Mwoyo Mutuukirivu n’Okukkiriza. Abantu bangi ne basenga Omukama. Barunaba n’agenda e Tarisi okunoonya Sawulo. Bwe yamuggukako, n’amutwala mu Antiyokiya. Ne bamala mu Ekeleziya eyo omwaka mulamba; nga bayigiriza abantu bangi nnyo; kwe kulaba nga mu Antiyokiya Abayigirizwa mwe baasookera okuyitibwa Abakristu. Mu Ekeleziya y’omu Antiyokiya mwalimu Abalanzi n’Abayigiriza abakulu. Mu abo nga mwe muli Barunaba ne Simoni eyayitibwanga omuddugavu, ne Lusiyo ow’e Sirene, ne Manayeni omunnabbeere wa Erode, ne Sawulo. Bwe baali nga baweereza Omukama ate nga bwe basiiba, Mwoyo Mutuukirivu n’abagamba nti: Munjawulire ne Sawulo ne Barunaba, nina omulimo gwe mbalondedde. Bwe baamala okusiiba n’okwegayirira, ne babassaako emikono ne babasiibula. _Ebyo Omukama yabyogera_ *OLUYIMBA OLWOKWEBUULIRIRA: Zab. 98: 1, 2-3ab, 3cd-4, 5-6* _Ekiddibwamu: *Omukama amanyisizza Obulokozi bwe mu maaso g’Abakafiiri.*_ Muyimbire Omukama oluyimba oluggya, kuba akoze ebyewuunyisa. Ddyo we yamutegekera buwanguzi, ate Omukono gwe Mutukuvu. _Ekidd: *Omukama amanyisizza Obulokozi bwe mu maaso g’Abakafiiri.*_ Omukama amanyisiza Obulokozi bwe, ayolesezza Obutuufu mu maaso g’Abakafiiri. Ajjukidde Ekisa n’Obwesige bwe, ku lw’ennyumba ya Yisirayeli. _Ekidd: *Omukama amanyisizza Obulokozi bwe mu maaso g’Abakafiiri.*_ Enkingi zonna ez’ensi zaalaba Katonda waffe nga bw’alokola. Ayi nsi mwenna, mujagulize Omukama, musanyuke, mujaguze, muyimbe ku ndongo. _Ekidd: *Omukama amanyisizza Obulokozi bwe mu maaso g’Abakafiiri.*_ Muyimbire Omukama ku nnanga, ku nnanga nga n’endongo evuga. N’eŋŋombe nga n’ekkondeere litadde okwo: mujaguze mu maaso g’Omukama Kabaka. _Ekidd: *Omukama amanyisizza Obulokozi bwe mu maaso g’Abakafiiri.*_ *OKWANIRIZA EVANJIRI* _Ekidd: *Allelluya Allelluya*_ Ggwe Katonda tukugulumiza, Ggwe Omukama tukutendereza. Ekibinja ky’Abatume eky’ekitiibwa kikutendereza. _Ekidd: *Allelluya Allelluya*_ *EVANJIRI* _Kye mwaweebwa obuweebwa, nammwe mukiwenga buwi._ *Ebigambo by’Evanjiri ya Mukama waffe Yezu Kristu ebivudde mu Matayo 10: 7-13* Mu budde buli, Yezu yagamba Abayigirizwa be nti: Mugende, mubabuulire, nti: Obwakabaka obw’omu Ggulu busembedde. Abalwadde mubawonyanga, abafu mubazuukizanga, amasitaani mugagobanga; kye mwaweebwa obuweebwa, nammwe mukiwenga buwi. Timubeeranga na Zawabu newankubadde Ffeeza, newankubadde ssente mu busawo; newankubadde ensawo y’entanda, newankubadde ekkanzu ebbiri newankubadde engatto n’omuggo. Kubanga omukozi asaanira okuweebwa emmere ye. Buli kibuga na buli kyalo kye munaagendangamu, musookenga mubuuze asaanye okusulirwa ewuwe, we mubanga musinziira, okutuusa lwe muvaamu. Ate nga muyingira mu nnyumba eyo, mugisabirenga emirembe, nga mugamba nti: Emirembe gibe ku nnyumba eno! Ennyumba eyo bw’eneesaaniranga omukisa gwammwe, omukisa gwammwe gunaagijjangako; naye bw’eteesaanirenga, omukisa gwammwe gunaabaddiranga. _Ebyo Omukama yabyogera._