*BY KAMULEGEYA ACHILEUS KIWANUKA* . Mbalamusizza nnyo Bakristu abalungi ennyo mu linnya lya mukama waffe Yezu Kristu. Mbeebaza emirimu n’obuweereza obw’enjawulo naddala mu nnyaffe Eklezia. Eklezia Katulika alina okusoomoozebwa kwasanga naye Omukama amuvvuunusa anti yamuzimba ku lwazi! Nsaba munsaasire ngabaneko nammwe akantu kano, (Ebivuga eby’ekinnansi mu Eklezia) Bwetusoma ebyafaayo tulaba nga lwali lutalo kafungulankete okukkirizisa abakulu e Rooma ebivuga byaffe eby’ekinnansi (Eby’abaddugavu) mu Eklezia anti nga birowoozebwa ng’ebitaali bituufu olw’okuba byakozesebwanga nnyo mu “nsinza ey’ennono” kiyite Okusamira. Omuteerabirwa Emmanuel Kalidinaali Kiwanuka Nsubuga yeyakkirizisa Vatikaano ebivuga byaffe okutandika okuwulugumira mu Eklezia zaffe anti ng’ennyimba ezigenderako nazo ziyiiyiziddwa (Ganda Catholic hymns n’amawanga amalala Amafirika) Bwali buwanguzi bwamaanyi anti nga olwo Omukama tumutendereza mu mbeera yaffe yennini gyetutegeera obulungi omuli ebivuga n’ennimi (ezaffe abaddugavu) n’ebitabo nebikyusibwanebizzibwa mu nnimi zaffe, omulimu ogwali ogw’ettendo, abaakikola tubeebaza. Kyokka newankubadde omulimu ogwo tegwali mwangu kuggusa, tugenda tuddirira mpola mpola okwegobako ebivuga byaffe eby’ekinnansi omuli Engoma, Engalabi, amadinda, Enseege, emakondeere, entenga n’ebirala olwo netubisikiza ebivuga ebizungu (Ennanga ne jaz band, n’emirere emizungu kati byebinyaanyaagira mu Eklezia zaffe!) Tetwekotoggedde ffekka? Oli ayinza okugamba nti, anti tetulina bamanyi kubikuba, ye kituufu tetulina oba kale tulina batono nnyo, naye ssinga tuba tukitaddemuu amaanyi tusobola okubafuna nga tuviiridde ddala mu masomero gaffe nga tuyigiraza abaana baffe abato netuzuukusa ebyaffe era nga bwebayigirizibwa ebivuga ebizungu ne babikuba budinda. Ebyaddala Ennanga ensangi zino baagirunga ebivuga kyenkana byonna, naye tulina ebitone byetuziika n’omumunzi mu ntendereza yaffe netugutta! Nsaba bannange munsonyiwe, kino kirowoozo kyange naye bwekibaamu amakulu, abakulu nsaba tukitunulemu oba oli awo tunaakomyawo ebivuga byaffe naye binnumya nnyo omwoyo! Ekyewuunyisa Eklezia nnyingi ebivuga bino mwebiri naye bikukulidde mu materekero, anti twabivaako, tutunuulira bitunuulire. Oh, tukkirizza ebyaffe okuzikirira akagenderere nga tulaba?!, tetulinenyezebwa olw’okwesuulirayo ogwannaggamba n’okulabika ng’abataasiima omulimu amakula bakadde baffe gwebaakola okukkirizisa Vatikaano ebivuga byaffe? Mu mutima mulungi nsaba tukubaganyeeko ku birowoozo ku nsonga eno. Mpandiise mu Luganda lwendowoozezza nti lutegeerekeka abasinga obungi abali ku mukutu guno. Omukama abankuumire, Nze Kamulegeya Achileus Kiwanuka.