*#صيفُ_أبريل《25》🦋♡* *#بقلم_حميده_عبدالحميد🦋* *★★★ــــــــــــــــــ♡♡♡ـــــــــــــــــــ★★★*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ أنس قال ليو ايلاف ؟ قال ليو اي رجع وكرر ليهو السؤال تاني وقال ليو ايلاف ؟ بس انت ي أسعد قُلت لي إيلاف ف دبي يبقي دي ايلاف كيف ؟ مسح وشوو بتوتر ، ومدا التلفون لي أنس وقال ليو هاك شوفها كم مامصدق ٠٠ أنس شال التلفون منو ومرر نظرو إتجاه الصورة ، غمض عيونو بهدوء ورجع التلفون لي أسعد ، وشكلوا انزعج شديد من حول المنظر الشافو وطوالي قام ع حيلوا وقال لي أسعد هسي دي تتصرف وتعرف مكانها وين وجات الخرطوم مع منو ،وحاليا هي قاعد وين وأهم من دا كلوو عايز اعرف التافه القاعد معاها دا منو ،قال ليو اصلا ح اتصرف و شايف عمي عمل شنو ي أنس دي نتيجة تربيتوا لي اختي ؟ عندو تلاتة ولد وواحد فيهم قادر ينهى المهزلة دي ماف ؟ معقولة اختي اتربت كدا بس اقسم بالله ألم فيها ثانية واحدة ما ح تقعد معاهم وما يبقي اسمي أسعد شعيب لو خليتها ليهم تاني ، كان الغضب ظاهر ف عيونوا ، طلع تلفونوا من جيبوا وف نفس اللحظة كان بعاين للصورة ب حُرقه شديده ، شهد قالت لي شيلي منو التلفون قلت ليها طيب أتقدمت كم خطوة لي قدام وقلت ليو أسعد انت حاليا غضبان وم تتصرف اي تصرف غلط وياريت تجيب التلفون وب رواقه ح نحل اي شي ،قال لي لا احمد قال ليو كلام حميده صح قال ليو ، يعني عايزني اكون رايق وهادئ ومستكين واختي لافه ليها مع واحد من مطعم ل مطعم ،وفوق دا كلو لبسها شاذ ،؟ وعايزين مني اكون هادئ كيف بس ؟، قال ليو كدا، قال ليو تمام ي زول وطوالي وقف ع حيلوا وقال انا ح اعرف اجيبها من وين وف نفس اللحظة اتصل مكالمة، ثواني بس وسمعناهو بتكلم وقال ٠٠ = ي عز الدين، اخبارك وصحتك ، قال ليو الحمدلله ي ود العم كيف انت ؟قال ليو كويس م علي عوجه قال ليو وشنو م شفناك جيت العرس ف سنار هناك طبعا الاسبكير كان فاتح قال ليو والله م لقيت طريقه ، وانا عايز أسألك ي عزو ،قال ليو اتفضل قال ليو ناس عمي عبدالله جو العرس ؟ قال ليو اي ماشاءالله جو وقبل يومين سافرو الخرطوم ل اخت مرت عمنا دي ياهو قاعدة هناك وقالو عايزين يقعدو معاها كم يوم ومنها يرجعوا دبي ، قال ليو أختها دي ساكنة وين بالضبط، قال ليو والله حسب كلام الوليد ،ساكنة ف اركويت قال ليو تمام شوف لي البيت وين بالضبط ورسل لي العنوان قال ليو عديله وقفل الخط ، شهد قالت لي، الله يستر بس والحمدلله الشي دا م اخوي ولا بيقربنا والا كان حمانا النفس زاتو عاينت ليها وقلت ليها شهد خليك جادة شويه ف حياتك والموضوع حساس شديد ،قالت لي صح بس انا م قصدي حاجه عاينت ليها بعدم مبالاة وحولت نظري إتجاه أنس كان منزعج جدا وكل مرة يحكم قبضه يدو وتاني يرخيها ،رفع نظرو من الفراغ وقال لي أسعد اها عرفت مكانا وين ؟ قال ليو ف اركويت بس راجي عزالدين يوريني البيت وين بالضبط قال ليو تمام لحظات بس وعزالدين، رجع ب اتصال وقال ليو ٠٠ = اسمع ي أسعد هسي سألت ليك الوالدة وقالت البيت ف المكان الفلاني ٠٠٠٠ قال ليو شكرا ي حبوب م قصرت معاي قال ليو ولو ي ود العم دا الواجب وقفل الخط عاين ل أنس وقال عرفت البيت وين ووصف ليهو المكان ، طوالي أنس قام ع حيلوا وقال ليو ارح ، خالتي قالت لي أنس م تتصرف اي تصرف طائش قال ليها لو قدرت امسك نفسي، اما أسعد وكانو ماشي معاهو جن الوضع ابدا م بيطمن من ناحيتوا، قلت ليهم ماشه معاكم احمد حمر لي وقال لي قلتي شنو ؟ قلت ليو عايزة امشي مع ناس أنس قال لي تعتبي العتبة دي ساي بكسر ليك رجولك ، قلت ليو بس انا٠٠٠ طوالي اتنهر فيني وقال لي م بس ولا تاني ، هنا خفت شديد منو والعبرة خنقتني أنس قال ليو ،انت مشكلتك شنو ي إنسان ؟ البت دي قلت ليك م تصرخ فيها مليون الف مرة ، قال ليو شنو ؟ هنا حسيت بالاوضاع اتوترت شويه وانس واحمد ح يتشاكلوا ف اي لحظة ،قلت لي أحمد ما ماشه انا ،أنس قال لي ح تمشي ، قلت ليو لالا م عايزة ،احمد قال ليو وانت منو عشان تقرر تمشي او لا ،قال ليو ود خالتها قبل اي شي ، ولي كل الصلاحيه انوو إتكلم ، قال ليو تمام نشوف تمشي كيف ،هنا لجين انزعجت شديد من احمد وقالت ليو انت لي عصبي كدا ؟ وحميده عايزه تمشي معاهم ما من فراغ ساي ٠٠ وف كل مشكلة لازم يكون ف زول عاقل وفاهم وواعي ، اسلوب التحكم والسيطرة دا م بينفع قال ليها كيف اخلي اختي تمشي اي مكان؟ قالت ليو بس هي ماشه مع ود خالتها وقبل اي شي انت شايف الوضع بقى حساس كيف وشايف الناس دي متوترة كيف ٠٠ قال ليها تمام نمشي كلنا سوا طيب ، خالتي قالت ليو شهد وحميده ح يمشوا معاهم ، وانت ح تمشي تستقبل ناس امي من الشعبي ولجين حتساعدني هنا ، كلنا عاينا ليها بصدمه واضحه وانا وشهد قلنا ليها ناس حبوبه جاين ؟قالت لينا اي لانو امي تعبت شوية ومن المستشفي هناك حولوها الخرطوم هنا وانا نسيت اكلمكم وع العموم قلت دي فرصتي زاتو عشان يعرفو بحقيقه أنس وهم ح ينزلوا معانا هنا شهد قالت ليها وتاني منو جاي مع حبوبه ؟ قالت ليها أسيا وسميه وخالكم بشير، قالت ليها الله يستر بس ،قالت ليها لحدي م يوصلوا بعدين الله كريم ، احمد طلع ع طول وشكلو زعل ، عاينت لي شهد وقلت ليها البسي سريع ، اما أسعد طلع ع طول وانس لحقوا، وانا طلعت ب وراهم طوالي ، عاينت إتجاه البيت بس شهد لسه م جات غمض عيوني و وقفت مسافة عشان تجي ومن بعيد جا واحد ورفع أسعد بالموتر شكلو دا صحبوا واتصل ليو ، وبالصدفه شفت السكينة الافيها ف خصرو هنا الفي راسي طار كوركت ل أنس وف نفس اللحظة كان بحاول يوقف أسعد، قال لي اها ،قلت ليو اخوك شايل معاو سكين ،قال لي انتي جادة قلت ليو اي جات عربية طوالي وقفها وركب وانا لمن شفت شهد اتأخرت ركبت ع طول ،واتحركنا ، وقعدنا ف مقعد نفرين ،أنس قال لي شكلوا ناوي علي الولد القاعد معاها قلت ليو بس ح يستفيد شنو قال لي ماعارف لكن لو لميت انا فيهو قبلوا ح إنتهى منو ،قلت ليو لا انتو الاولاد ديل مشكلتكم شنو بالضبط؟ اي شي عندكم حلو ي مشكلة كبيرة ي قتل ،الكلام دا قصر معاكم ف شنو؟ وسبحان الله الولد عادي يلف مع اي بت ووقت تبقي فيهو النار تولع ف قلبو ، قال لي حميده انا عارف الشي دا وداب عرفة قيمة انو اقيف مع البنات او اتكلم معاهم ويمكن طرف السوط هبشني من كلامك دا ،قلت ليو بعتذر وانا انفعلت شويه ،قال لي عادي جدا اصلا متعود منك اسمع كلام زي دا ، قبلت وشي منو ع الشباك لانو بجد زعلت من حركتهم دي مابحب العنف والمشاكل ،لحظات بس ودخلت مكالمة من شهد ،فتحت الخط وقالت لي ٠٠ = يخسي عليكم ي حميده انا واقفه ف نص الشارع وزل منكم ماف ،معقولة تمشو وتخلوني قلت ليها انتي اتأخرتي ولو قلت انتظرك ع القاهم فاتو مني ،قالت لي م مشكلة وياريت م تحصل حاجه غير متوقعة ي حميده وتمسخ علينا الدنيا قلت ليها م تخافي ماف زول ح يموت قالت لي بس الحمدلله ان شاءالله م ح يحصل شي ، قلت ليها ان شاءالله وقفلت الخط وسندت رأسي ف حافة المقعد ،أنس قال لي قبيل انفعلت ف احمد شويه وحتي انا ماعايزك تمشي معانا لانو اليوم لفيتي كتير بس عشان حركتوا بتزعل وانا حكاية يرفع صوتو فيك دي م راكبه راسي وخلي أعقد عليك بس ، تاني اف دي ساي حرمت عليهو ضحكت وقلت ليو بس دا اخوي ف النهاية قال لي تمام نشوف موضوعو شنو بعدين وعاين للطريق وقال للكمساري المنطقه الفلانية لسه ؟ قال ليو قربنا مسافة ربع ساعة بس ، قلت ليو شيل حبل الصبر بس قال لي خايف أسعد يوصل قبلنا ،قلت ليو اصلا ح يوصل لانو ماشي ب موتر ونحنا مواصلات والمواصلات بتقيف ف كل محطه قال لي فعلا بس ادعي م تحصل حاجه عكسيه، قلت ليو ان شاءالله ماف حاجه ح تحصل وكل الأمور حتكون طيبه ،قال لي ان شاءالله وكلامك دا قعد يطمني شديد، قلت ليو انا اصلا هنا عشان اهون عليك، وصادف عاصفه قويه قامت والعربية وقفت طوالي ،أنس قال ياااخ م وقتها حاليا، قلت ليو يود دا جند من جنود الله عيب نقول كلام زي ودي نعمة كبيرة كونو تجي عاصفة زي دي من بعد سخانه شديده وجو كاتم، قال استغفر الله وسكت ، والحمدلله العاصفة خفت شويه وتاني اتحركنا، وبعد نص ساعة كاملة وصلنا ، الكمساري صفر للسواق ووقف ،قال لينا دي المحطه نزلنا ع طول وانس بدا يستحضر ف الوصف الوصفو ليهو سعد ، قال لي ارح اتحركنا و دخلنا لي جوا لحدي م لمحنا اسعد وصحبوا واقفين جمب الباب واسعد بيضرب ف الباب بكل قوتو طوالي جرينا عليهو، أنس قال ليو دا شنو عدم الاحترام دا ؟ قال ليو أنس م تقفلها معاي عليك الله قال ليو تمام وعاين لي صحبوا وقال ليو تقدر تمشي أسعد قال ليو يونس ح يكون معاي ،أنس قال ليو لا ح يمشي، يونس اتحسس شويه وقال لي أسعد ح استناك ف القهوة الجمب الظلط ووقت تبقى ع المهمه أديني تلفون ، قال ليو تمام، أنس قال ليو ياتو مهمه ، وقبل يرد عليهو الباب فتح، ٠٠٠جا شاب متوسط الطول وقف ف الباب وقال لي أسعد بتضرب الباب دا كدا ليه ؟ قال ليو اوو وليد صح ؟ قال ليو طولو وعرضوا ياهو زاتو عندك اي فهمم عايز اكملوا ليك ؟ أنس قال ليو شنو ي حبوب جاي ع طول ب مشاكلك ؟ قال ليو انجدوني وقولوا عايزين شنو ،أسعد قال ليو عايز اختي ، سرح مسافه وقال ليو اختك؟؟ قال ليو اي اختي ايلاف ، هنا طق داب إتذكر ، عاين لي أسعد مسافة وب ابتسامه خفيفه قال ليو = اوو أسعد ي زول والله م عرفتك واتغيرت كتير ياخ ، واخبارك وصحتك شنو ؟ أسعد ردا ليو بطريقة باهته جدا و قال ليو ، كويس ،قال ليو معليش ياخ اول مرة م عرفتك قال ليو عادي حول نظرو إتجاه أنس وقال دا منو ؟أسعد قال ليو دا اخوها الكبير ل ايلاف ،قال ليو أنس؟؟ قال ليو بالضبط هنا أنس شال نفس عميق وقال ليو ممكن تنادي إيلاف ٠٠ جا صوت مرة طالع من جوا وقالت٠٠ = دا منوو ف الباب ي وليد ،مدا راسو ل جوا شويه وقال ليها ديل اخوان ايلاف ي امي ،لحظات بس وشفنا المرة واقفه قدامنا وكل لوحات الصدمه مرسومه ف وشها ، بالإضافة ل إنو جات طالعة من غير طرحه او غيرو ، أنس طوالي اتلفت ب ورا ، عشان يتجنب انو يعاين ليها او بالمختصر غض من بصرو هنا المرة انتبهت ل روحها وفهمت أنس لي اتجنب يعاين ليها بس م اشتغلت بالموضوع وقالت لينا اتفضلوا ،أسعد قال ليها شكرا نادي ايلاف ، قالت ليو طلعت مع صحبتها لكن بتجي بعد شويه وبعدين ايلاف دي بتنا بقت خلاص ،قال ليها طلعت مع صحبتها انتي متأكدة؟ قالت ليو اي قال ليها تمام وقال لي أنس ممكن ننتظرها لمن ترجع ،أنس قال ليو ح نقيف هنا جمب الباب لحظات بس وجا شاب من برا سلم علينا وكان مستغرب شويه ،حول نظرو إتجاه المرة الواقفه وقال ليها دا شنو ي امي واقفه براكدا ادخلي جوا والبسي ليك توب، عاينت ليو بس وسكتت، هنا انا طوالي ادخلت وقلت ليها بس معليش ي خالتي نحنا واقفين ف الشارع وفوق دا كلو قدامك اولاد اجانب ،يبقي من واجبك تحتشمي وتستري نفسك عشانك انتي وعشان الدين ،قالت لي مشغالة بيو كتير وانتو العاملات فيها شيخات ديل حيرتونا زاتو ، هنا أنس اعصابو باظت خلاص ، واظن داك ولدها ويمكن اتحسس شويه و قال لي معليش بس امي متعودة علي كدا ٠٠هنا أسعد ضحك وقال ليو وانا بقول اختي باقيه كدا لي طلعت خربانه من كبارها، هنا وليد اتكلم وقال ليو بتقصد شنو ؟ قال ليو بقصد انو انتو ك اولاد من كبيركم ل صغيركم اسرة ديووثه وانت أكبر ديوث واقف قدامي ،قال ليو احترم نفسك واعرف نفسك بتقول ف شنو،لحظات بس وشفنا بت حلوه جايه من بعيد والشعر دا يتطاير ساي مع الهوا ومعاها بت تانيه ،والروج دا من بعيد احمار ويلمع، طوالي حصلت لحظة صمت عجيبه ، والكل بقى مركز معاهم ، اتكلمت المرة وقالت ايلاف حبيبتي جات ودي بتنا ونحنا ربيناها ووليد وهمام ديل اخوانها أسعد قال ليها جد طيب نشوف ، لحظات بس ووصلونا خلاص ووقفوا طوالي البت ب ابتسامه عريضه قالت = أسعد!!! قال ليها م أسعد ولا زفت لملمي هدومك سريع عشان ح تمشي معاي ، طوالي جرت ع إتجاه اخوها الوليد وامها وقالت ليو ما ماشه معاك اي مكان قال ليها ايلاف ي بت اقسم بالله اسوقك غصبن عنك عشان تجي معاي براك ودا شنو الزفت اللابسه دا ؟ ايلاف نحنا متنا عشان تتبرجي كدا ؟ قالت ليو هسي انت طولت م شفتني وبدل م تستقبلني احسن استقبال تجي تعاملني كدا ، قال ليها نتفاهم بعدين وعاين لي وليد وقال ليو ، لو صحي كنت بتعتبرها اختك م كان خليتها طلعت كدا كان ع الاقل منعتها عشان مصلحتها قال ليو انا م بمنعها تعيش حياتا ، هنا أنس انفعل فيو وقال ليو اسكت ي ديوث ي حيوان ، انت بتحسب نفسك تبع الرجال ؟ يعني بكلامك دا وايلاف حتمشي غصبن عنك وعن اي زول واقف هنا ، ايلاف ادخلت وقالت ليو و انت منو كمان عشان تقرر عني ، أسعد قال ليها دا أنس ٠ طوالي عيونها رقرقو وكل نظرات الشفقه اترسمت ف وشها وظاهر عليها كانت بتعافر ف دموعها عشان م تنزل وقالت ليو أنس؟ عاينت ليو مسافه وتاني حولت نظرها وقالت لي أسعد انا م بعرف واحد اسمو أنس، كنت متابعة كل كلامهم واستغربت شديد لي هي نكرة أنس ؟، حسيت انو وراها سر كبير جيت ووقفت جمبها وقلت ليها ايلاف انا حميده ، قالت لي وعايزة مني شنو ؟ قلت ليها عايزة ليك الخير بس، وديل اخوانك كان شئتي ام ابيتي وصدقيني ديل هم العايزين مصلحتك ديل هم البحبوك ديل هم اخوانك لمن شافوك ف غلط قلوبهم ولعت نار و عشان انتي عرضهم وحته منهم واي حاجه بتحصل عليك ح توجعهم اول شي قبل توجعك انتي وصدقيني ماف ولد بيرضي اختو تكون كدا الا الديوث ع قول أسعد ولا خير ف رجل م بغير ولا بخاف ع عرضو و محارموا وصدقيني احسن ليك زول يمعنك حريتك ولا يديك ليها كاملة ومكملة وانتي ي جميلة بتأذي نفسك حاليا و ياريت تراجعي الدين والعقيدة واعرفي عن لباس المؤمنات اكتر و أسألك سوال انتي بتتكشفي كدا ليه وتضيقي ملابسك ، صدقيني قدر م ضيقتي ملابسك يعني ضيقتي قبرك بعدين وصدقيني أللبس المحتشم ستر ليك اول قبل اي شي انتي لمن تحتشمي حتخلي اي ولد يحترمك غصبن عنو، حتكوني مرتاحه ومطمنه هو ف أحلي من الواسع والفضفاض لي تباري الموضه؟ منو قال ليك لمن تلبسي بنطلون وتفكي شعرك انتي كدا حلوه ؟ دا منو الغشاك ولعب ب عقلك دا منو الماعايز ليك الجنة؟ انتي عرفة بلبسك دا فتنتي كم راجل ؟ انتي عارفة كم نظرة حرام حصلت لحدي م تمشي مشوارك وتجي انتي متخيلة كمية السيئات الحصلت ليك ، لا حول ولاقوة الا بالله بس و ي حلوه ،صدقيني أللبس الواسع امان ليك وبيحفظك ، وانتي حاجه غالية م سلعة رخصيه عشان تكوني معروضه ف الشارع والكل يشوفك وصدقيني لو عرفتي بعض نظرات الرُجال لمن يشوفوك كدا لكان غطيتي روحك بالحديد ف انا بقول ليك ،البسي واسع ي جميلة عشان الجنة تستاهل و الاسلام كرم المرأة شديد وانتي عارفة انو المرأة كانت وصية الرسول عليه افضل الصلاة والسلام ، فعيب انتي كوصيه من اشرف خلق الله تعملي كدا وانتي عارفة المرأة الكاسية والعارية من علامات الساعة ؟يبقى لازم تحتشمي هنا ف الدنيا قبل يستروك بالكفن ،كانت ساكته بس حتي أمها كانت ساكته بالاضافه ل اخوانها، قلت ليها فهمتي كلامي صح هزت راسها بس شكلها كانت مسيرة وبتلبس كدا ع حساب الناس و قلت ليها ماف زول ح يجبرك تخلي اهلك العشتي معاهم هنا، أسعد اتلبش ومسكها من يدها وقال ليها حتمشي معاي يعني ح تمشي لحدي م سمعنا صوت واحد وهو بقول فكها ي زول كلنا اتلفتنا وكان نفس الولد الكان قاعد معاها ف المطعم ٠٠٠ ‏*•••••••••••••••••••••••••••••••••••••••••••••••••••••••••••* *★★يتبــــــــــــــــــــــــــــــــــــــــــــع★★* *#♡♡عبد الباقي أحمد محمدزين♡♡* ‏​​‏​​‏​​‏​​‏​​‏​​‏​​‏​​‏​​‏​​‏