#صيفُ_أبريل2🦋 #حميده_عبدالحميد🦋 قال لي ح تعمل ليو شنو يعني ؟ قلت ليو م ح اعمل ليهو اي شي ولا لي بتو رزان بس ح اعمل ف نفسي اي شي قال لي والمعني؟؟ قلت ليو وقت الحياة م عايزة ترحمني ف انا م ح ارحم نفسي كفاية اهلي جدعوني وأهلي الربوني ماتو ف اسوأ من كدا ي فردة ضحك وقال لي دا حالنا ودي قسمتنا ي صحبي وع قولك ي جاطت ي اتصلحت ، عاينت ليو وقمت من الحجر الكُنت قاعد فيهو ، وإتوجهت ع السوق ، اشتريت بطاطس ولحمة وطماطم ورجعت البيت العايش فيو ومعاي مجموعة من الشباب دخلت المطبخ ع طول وختيت الحاجات ف المصطبه ، لقيت مدثر وهو واقف ف باب التلاجة ، طلع ليهو قارورة موية وقال لي، الليله الغدا عليك يعني ، قلت ليو اي قال لي لالا ظابط وقبل يطلع عاين لي وقال لي ماتنسى تفكر ف كلامي القلتوا ليك الصباح وصدقني دا عرض مُغري جدا لو مشينا عليهو تاني مافي زول ح يرمينا ح نكون أساطير ي صحبي حاجه كدا كبيره ، قلت ليو شوف غيري ، قال لي هو م ينفع اشوف غيرك وانا بقدر اتكلم مع كم نفر ف الموضوع دا بس انا شايفك انت مناسب للشغلة دي عاينت ليو بعدم مُبالاة ووجهت نظري للحاجات الكانت ف المصطبه طلعت السكين من الدرج وبديت اقطع ف البطاطس واتذكرت كلامو قبل يومين لمن جاني وقال لي نشتغل ف المخدرات، بس انا رفض ، لكن ف حاجه جواتي بتقول لي وافق ٠٠٠ خلصت شغلي وطلعت من المطبخ مشيت ع الغرفة الخاصه بي انا ومحمد ، طلعت لي بنطلون جينز اسود وقميص بيجي استحميت ولقيت محمد جاهز قال لي نمشي قلت ليو اي ، طلعنا من البيت وإتوجهت ع بيت ناس رزان ، وقفت قصاد البيت ورفعت يدي ع الباب وطرقتو طرقات خفيفه لحظات بس وجا اخو رزان فتح الباب ، اول م شافني قال لي انت م بتفهم يعني؟، قلت ليو ممكن اقابل عم ابراهيم ، زح من الباب وقال لي جدا بطريقه مستهترة كدا ، دخلنا جو واتوجهنا ع الديوان وبالصدفه شفت رزان واقفه ف الحوش هي وامها وظاهر عليها متوترة ، لقيت عم ابراهيم راقد ف سريرو المُعتاد والمُلاصق للشباك وجمبو الرادي حقو ، اول م شافني مسح وشو بعصبيه وقال لي ي ود الناس بت للزواج م عندي انت بتفهم ب ياتو لغة ؟ ، قعدت ف الكرسي المقاصد سريرو وقلت ليو ي عم ابراهيم عيبي شنو ؟ لو لي شغل شغال وانا مستعد اعمل اي حاجه تطلبها مني ف سبيل انو توافق بي ، ضحك وقال لي عيبك شنو ،؟ قال لي ببساطه انا م بدي بتي ل واحد م معروف اصلو من فصلوا ولي واحد م عندو اهل وكمان جايب لي معاك واحد من شماستك ديل وهو بعاين لي محمد بقرف ، محمد عايز ينفعل فيو بس هديتو ، قلت ليو والمشكلة وين ، قال لي عاين ي شاب ، عتبة باب بيتي دي تاني م تعتبها قلت ليو جدا وقمت ع حيلي وقبل اطلع قلت ليو كان ب إمكانك ترفضني ب طريقه احسن من كدا بس انت اخترت الاسلوب الكعب قال لي انت م بتفهم الا ب الكلام الزي دا ، لفيت وشي منو وطلعنا طوالي لقيت رزان جمب الباب عاينت ليها بس وطلعت طوالي ، مشينا الميدان وقعدنا هناك ، محمد قال لي شفت ؟غير الاهانة والذلة م لقينا شي تاني ، م اتكلمت معاهو وطلعت تلفوني من جيبي ولقيت ٤مكالمة من رزان اول شي عملتوا حظرت رقمها من كل مكان وبعدو اتصلت لي مدثر٠٠٠ ف جانب اخر٠٠٠ (البورت)٠٠٠ بعد يوم طويل جدا وشاق ، داب فضيت عشان أرتب شنطتي واجهز حاجاتي للسفر ، مشيت ع الدولاب ونزلت الشنطه من فوق ، حسيت بحركة ف الباب ، لحظات بس وجات شهد بت خالتي سمية داخلة ، إبتسمت ابتسامة عريضه وفي نفس اللحظة كانت داسه حاجه وراها إتحركت ناحيتي بخطوات سريعة جدا وقفت قدامي وقالت لي اتخيلي واخيرا قدرت اسرق صندق خالتنا ابتهال واخيرا ح نعرف السر الفيهو، شلت نفس عميق وقلت ليها شهد متين حتبطلي تحشري نفسك ف حاجات م بتخصك ، زحت من قدامي وهي بتقعد ف السرير وقالت لي بس لو م عرفت سر خالتو ابتهال دا شنو بموت، خطفت الصندوق منها وقلت ليها حرام نعاين ف حاجات غيرنا، اتنهدت بزهج وقالت لي حميده بطلي ياخ وجيبي الزفت دا قلت ليها ي بت الناس انا وانتي ورانا سفرة طويلخ وهل جهزتي شنطتك خلاص ؟ ، انتي عارفه الجامعة ليها اسبوع من فتحت ونحنا لازم نسافر بعد دا قالت لي خبر م عندك انا من امس جهزت نفسي ، قلت ليها طيب قالت لي طيب شنوو ارح جيبي الصندوق دا قلت ليها ابيت جات علي وبقت تقاويني عشان تشيل مني الصندوق وف النهاية قدرت تشيلوا ، وجرت نهاية الغرفه ، قلت ليها شهد الله يهديك ، قالت لي حميده انتي لو ملاحظة خالتنا ابتهال دي ماشاءالله تبارك الله ظاهر عليها كانت جميلة جمال ما طبيعي وهي ف شبابها و حتي وهي كبيرة مافقدت نورتها وفوق دا كلو هي أكبر من امي وامك بس اليشوفها يقول لسه ثلاثينيه بس الشي المحيرني لي م اتزوجت؟؟ ، قلت ليها يمكن قسمه ماف قالت لي انا سالت امي كم مره لي خالتو ابتهال ما إتزوجت قالت لي جوها عرسان كتار بس هي كانت بترفض ، وماعرفنا سبب رفضها شنو ، قلت ليها شهد انتي هسي سايبه الدنيا دي كلها ومركزة ف خالتو إبتهال؟ قالت لي حميده انتي لو مُلاحظه ليها برضو قدر م تمشي غرفتها لازم تفتح الصندوق دا وتفضل تبكي ؟ ولو لاحظتي اكتر خالتو ابتهال بتسرح كتير ، رغم انو هي موظفه وشبه غنية وامورها طيبه شديد بس بحس بيها حزينه من جوه ووراها سر كبير ،؟ قلت ليها وانتي حتعملي فيها المحقق كونان صح وتكتشفي السر دا!!لوت لي خشمها وقالت لي المهم ح افتح الصندوق ، قلت ليها اوع ي بت ، بس م اشتغلت بي وفضلت تعافر فيهو لين ما انفتح ليها وصرخت صرخه وحده وهي بتعاين جوا الصندوق بتعجب واضح ، قلت ليها خير شفتي شنو رفعت لي يدها وقالت لي تعالي تعالي سريع اتحركت عليها وفي نفس اللحظة كُنت بعاين ف تفاصيل وشها ال ما بتتفسر ، وصلتها ووجهت نظري داخل الصندوق وكان فيهو صور شافع صغير وظاهر عليهو شافع حديث الولادة كان حلو جدا وعيونو قريبه لعيون خالتي عيون واسعة مايلة للبني ، كان في كمية من الصور ليو ، شهد عاينت لي ورجعت عاينت للصندوق تاني وقالت لي حميده تفتكري بكون تفسير الصور دي شنوو ؟ يُتبع٠٠٠٠