#صيفُ_أبريل5🦋 #حميده_عبدالحميد 🦋 طردت كُل الأفكار السلبيه من عقلي وعاينت لي شهد و كانت سرحانه ف الشارع ومركزه مع كل حاجه بتصادف طريقنا ، اتنهدت وقلت ليها شهد٠٠ ردت لي بصوت ناعس جدا وقالت لي احكي ٠٠ قلت ليها ، ياريت الصور الشفناها ف صندوق خالتي ابتهال تفضل سر بيني وبينك والسر دا ما لازم يطلع ، وخليك عارفه انو ف الاسلام حرام نتجسس ع الناس وندخل ف شوؤن الناس ولازم نحترم خصوصيات غيرنا ، عاينت لي بطرف عينها وقالت لي طيب بس دا لو قدرت امسك خشمي قلت ليها بتقدري ، قالت لي بتمنى ، قلت ليها المهم انتي عارفه انو احمد ح يكون شغال قريب من داخليتنا ، نططت عيونها وظهرت ملامح الصدمه ف وشها ، وقالت لي أحلفي؟ قلت ليها والله ، رجعت لورا وهي بستند نفسها ف حافة الكُرسي وقالت لي يعني م ح اقدر البس ب كيفي ، وبعدين انتي عارفه اخوكي دا إنسان مجنون وعادي يقتلني ويخفي جُثتي لو لقى خُصله من شعري ساي ، ضحكت وانا بطلع تلفوني من الشنطة وقلت ليها يعني خايفه من احمد اكتر من ما تخافي من الله؟ معقوله بس ، قالت لي والله بخاف من الله بس حب دنيا ساي وانتي عارفه اوضاع الجامعة هناك كيف، قلت ليها لو بتخافي من الله كان ع الاقل حاولتي تغيري من طريقة تفكيرك ، قالت لي حميده ادعي الله يهديني بس قلت ليها ربنا يهديك وينور بصيرتك ، رفعت يدها وقالت لي امين ، وسكتنا ع كدا ، شهد نامت وانا كُنت زهجانه شوية ، وقلبي م مرتاح، دخلت مكالمة من اخوي احمد ، فتحت الخط وقال لي اتحركتوا قلت ليو اي قال لي طيب لمن توصلوا أديني جرس عشان اطمن عليكم قلت ليو طيب وقفلت الخط ، الباص وقف عشان نستريح شوية ومنها نفطر ، صحيت شهد ونزلنا ، وصادف الساعة ١٠ص دخلنا المطعم و قعدنا ف اقرب طاولة ، وعشان تطلب ليك اكل الا تمشي شخصيا وتوري صاحب المكان عايز شنو ، شهد قالت لي بمشي انا قلت ليها طيب ، طلعت القروش واديتها ليها ،هي مشت وانا ، سرحت شويه والجو كان مُسخن لدرجة بعيدة شديد، بجد ماقادرة استوعب نار الاخرة حتكون كيف وقت دي سخانة الدنيا بس و حاجه بسيطه كدا بس ماقادرين نستحملها رفعت عيوني فوق وبدعوات صادقه جدا دعيت انو ربنا يجعلنا من أصحاب الجنه وينجينا من عذاب النار ، صادف راجل كُباري كدا عمرو بين 60سنة لكن باين عليهو شباب لسه من طريقة لبسو المُهندم وهو بيقول لي امين يارب وكررها اكتر من عشرة مرة ، عاينت ليهو وقلت ليو يارب ورجعت وجهت نظري ف الفراغ جرا كرسيهو شوية وهو بيعقد ف طاولتنا وقال لي ي بتي ممكن طلب ؟ قلت ليو اتفضل ي ابوي قال لي ماشاءالله باين عليك بت محترمه شديد، قلت ليو قبل اي شي من واجبي انو احترمك ، قال لي طيب ، انا عايزك تدعي لي معاك ف كل صلاة انو ربنا يغفر لي ويتوب على قلت ليو ان شاءالله، قال لي جزاك الله خير وقام من الكُرسي واتجه ع عربية فخمة جدا فتح الباب وركب ، واتضح انو هو زول ماشاءالله ، هزيت راسي بتعجب وحسيت كانو وراهو سر كبير ، وملامحو ماكانت غريبة علي كانو شفتها ف زول بس وين ماقدرت احدد ، قطع سرحاني شهد وهي بتخت صحن العدس قدامي وكل لوحات الزعل مرسومه ف وشها قلت ليها خير قالت لي اتخيلي غير فول وعدس ماعندهم شي بجد انا زهجت من حاجه اسمها عدس ، رديت ليها وانا بشيل ف كُباية الموية الباردة عشان اروي عطشي وقلت ليها، علفكرة دي نعمة كبيرة وغيرنا مالاقيها، ياريت نحترم الأنعام السخرها لينا الله ، قالت لي طيب ، وغايتو ي حميده م بسألك التقول ابوك شيخ ، ضحكت وقلت ليها الله المستعان وبدينا ناكل صراحه عدسهم كان ظابط شديد ، شهد قالت لي غايتو امي دي طلعت ظالمة العدس ساي ، ولابتعرف تعملوا ضحكت وقلت ليها والله خالتو سمية لو سمعتك تاني جوع ساي يقتلك قالت لي عارفاك م ح توصلي ليها الكلام ، خلصنا اكل وطلبنا عصير ، وطلع عندهم كركدي وعرديب ، طلبنا عرديب رغم بساطة المطعم بس حاجاتهم معملومه بكل حب واخلاص ، طلعنا برا وركبنا الباص واتحركنا طوالي لانو باقي الركاب كلهم جوا وماوصلنا الا بعد ٨ساعة مع اذان الظهر ، نزلنا الشنط واجرنا تاكسي عشان يوصلنا الداخلية، بعد ١٠دقيقه وصلنا حاسبتا بتاع التاكسي ودخلنا الشنط جو ، وصلنا الغرفة الممكن نقعد فيها وكان معانا ٤طالبة ، اصلا غرفتنا فيها اربعة سرير ، شهد قالت لي البنات وين قلت ليها اكيد ح يكونو متجمعين تحت ضل الشجرة ، قالت لي ارح نمشي عليهم قلت ليها خلي نرتاح اول ونرتب الشنط دي ونصلي ، قالت لي خليهم بعدين لحظات بس وجات عبق داخلة وهي بتتكلم بالتلفون واول ماشافتني نزلت التلفون من اضانها وب ابتسامة عريضة قالت لي حميده نوورتو والله وجات سلمت علي بالاحضان وقالت لي، لي طولتو كدا شهد قالت ليها والله اصلو دي م سخانه ينزلو فيها جامعة قالت ليها ي زفت اخبارك ايه وشنو م بتردي علي ف الواتس شهد ابتسمت وقالت ليها زول داير زول مافي حمرت ليها وقالت ليها تخلي جنك دا متين ي بت ، ادخلت وقلت ليها م تعاتبيها ي عبق وصحى باقي البنات وين ؟ قالت لي م عندك خبر المحاضرة الساعة ٢قلت ليها ف الشمس الحارة دي قالت لي والله تقولي شنو بس قلت ليها وانتي ماماشه قالت لي عندي مشوار والله قلت ليها اجلي المشوار المحاضرة اهم من اي شي ، قالت لي م بقدر وكان تركزيها ف التلفون ، شهد قالت ليها اجي ي ستي ودا شنو الشي الاهم من المحاضرة عاينت ليها وقلت ليها م تضغطي عليها ، قالت لي خلاص سكت ي حميده، رتبنا عفشنا وصلينا الظهر ولبسنا ع طول عشان نلحق محاضرة ٢ وصادف عبق برضو لبست ، عاينت ليها وقلت ليها طالعة هسي ؟ ردت لي وهي بتشيل شنطتها الصغيرة والمممكن تشيل فيها تلفونها وشويه قروش وقالت لي اي ،و طلعت قدامنا وانا وشهد طلعنا وراها طوالي ، طبعا جامعتنا م بعيدة شديد من الداخليه مسافة شارعين بس ، فضل لينا شويه ونوصل شهد ضربتني ف كتفي وقالت لي حميده عايني عبق رفعت عيني ووجهت نظري مكان شهد أشرت لي وكانت واقفه مع شاب وهو واقف جمب موتر وصراحة الشخصيه دي شفتها قبل كدا٠٠٠٠ يتبع٠٠٠ حيكون ف بارت بعدين ...