#صيفُ_أبريل7🦋 #حميده_عبدالحميد 🦋 ضحك زيادة وقال لي معقولة بس ؟ قلت ليو صدق ي صحبي صلح قعدتو وقال لي عايز اعمل ليهم شنو قلت ليو م تعمل ليهم اي شي انا ح اتصرف براي ، قال لي عديله ي زول واها موضوعنا حصل فيو شنو؟ ، قلت ليو م عارف والله لكن الشغلة دي حاسي بيها م ح تنفع معاي قال لي انت بس جرب وما ح تندم بعدين وبعد صلاة العِشاء جايه بضاعة نستلمها انا وانت سرحت مسافة وقلت ليو خير وصادف عمر واحمد طلعوا من المسجد وجايين علينا قمنا انا ومدثر ووقفنا ع حيلنا ،عمر قال لينا شنو م شفتكم ف المسجد مدثر قال ليو صلينا هنا ، احمد عاين ليو مسافة وقال ليو ااا جد ، وشكلوا فهم الموضوع انو م صلينا، مدثر قال ليو انت هسي جاي تحاسبنا يعني ،؟ قال ليو أبدا والله وزح من قدامنا ، عمر قال لينا ف شنو ي شباب ؟ مدثر رد ليو بضيق وزهج وقال ليو المخلوق الجبتوا لينا دا م بينفع معانا ، عمر قال ليو دا عامل و دا شغل وانا محتاج عُمال زيادة عشان كدا جبتو وبعدين صاحب العمارة ح يجي الليله من السفر او احتمال كبير يكون جا ف انا عايز أنجز سريع ، قلت ليو ح نخلص ان شاءالله قال لي شدو الهمه بس وحاليا نحنا خلصنا خلاص وبكره نواصل و نجي من 5صباحا مدثر قال ليو ظابط قال لينا يلا معاكم سلام ، مشي ع الظلط وقف عربية واتحركو وانا مشيت بدلت ملابس الشغل بملابسي العاديه وركبت موتري عايز اتحرك جاني مدثر وشايل معاهو كيس اسود ، قال لي وصلني معاك ماشي مشوار قلت ليو وين قال لي السوق ، ماشي لي انور عندو معاي حاجه ، قلت ليو تمام ، استعدلت الموتر وركب واتحركنا مسافة الطريق قال لي شايف عمر بقى يهينا ويتفرعن فينا كيف ؟ انا غايتو شغلو دا ح اخلي ليهو وانت شوف برنامجك شنو اذا عايز تكون معانا ف الشغلة دي بتلقانا واذا لا ف انت حر تاني م ح اضغط عليك، قلت ليو لو انا اصلا م عندي مشكلة بس عايز ادخل في الشغلة بنسبة مية ف المية قال لي تمام ، وصادف وصلنا السوق خلاص نزلتو وقلت ليو واصل ب رجولك حاليا انا م بقدر ادخل جوا ف الزحمة دي نزل وقال لي م قصرت قلت ليو م بيناتنا، اتحرك من قدامي وفات وانا لفيت ورجعت الظلط وواصلت طريقي مشيت النادي ، وقعدت هناك عشان احضر المبارة وصادف ف غبار شديد لمن احمر شكلو ناتج عن السخانة ولوهلة إتذكرت اخواني ايلاف واسعد كنت بحبهم شديد ، والجو دا ذكرني بيهم وبي امي وابوي واتمنيت لو اقدر اقابلهم ف يوم من الايام، من بعيد لمحت احمد وهو داخل اول م شافني شال كرسي وجا قعد جمبي من دون م يتكلم معاي ، وانا م اتكلمت معاهو ومثلت نفسي زي المابعرفو ٠٠ ف الداخية٠٠٠ بعد م خلصنا العصير قلت لي شهد ارح الداخلية لانو بجد كنت فترانة من تعب السفر واثناء ما نحن ماشين في الطريق شفت الشاب الكان واقف مع عبق ومعاهو واحد شهد قالت لي طلع شغال هنا، قلت ليها اعملي رايحه بس قطعنا من قدامهم ودخلنا جوا ، صليت العصر وحاولت انوم بس م قدرت ، جاتني عبق وقالت لي، حميده ، قلت ليها نعم قالت لي بنسبة للشي الحصل قبيل ياريت م يتكرر صلحت قعدتي وقلت ليها المفروض انا اقول ليك كدا ، قالت لي بالطريقه دي حنخسر بعض ، قلت ليها شوفي ي عبق ، انتي جايه من بيت ابوك عشان تتعلمي صح ، يبقا لمن انتي تعملي كدا حتكوني فقدتي الهدف الأساسي، قالت لي انا بعرف مصلحتي وين ، وبنسبة لي أنس انا بحبو حب م طبيعي وهو ح يتزوجني عما قريب عاينت ليها ب إستفهام وقلت ليها يعني اسمو أنس ، قالت لي المهم انا وريتك وطلعت بخطوات سريعه جدا سرحت مسافة وهنا داب بديت استوعب وانو أنس دا نفس الشخص الشفت صفحتو ف الفيس، غمض عيوني وحاولت انوم بس م قدرت جاتني شهد وقالت لي ارح برا نشرب جبنه مع باقي البنات قلت ليها ف التراب دا ولا طالعة قالت لي خفه شويه ، قلت ليها طيب لبست طرحتي وطلعنا برا الجو كان ما مفهوم، زي خريف وزي صيف حاجه كدا ما مفهومه والجو كان كاتم شديد ماف اي حركة للاشجار، مشينا ع البنات وكانو فارشين فرشة تحت شجرة النيمة سلمنا عليهم وقعدنا جاتني رونق وقالت لي عايزة اوريك حاجه قلت ليها اها طلعت تلفونها ودخلت الماسنجر وفضلت تقلب ف الدردشه لين م وقفت ف دردشة واحد وقالت لي عايني الولد دا قبل يومين رسل لي شنو شلت منها التلفون وكان كاتب ليها والله ي بت الناس انا معجب بيك وحبيتك ممكن نرتبط ، قلت ليها جاده انتي ؟ قالت لي كيف ، قلت ليها عايزه نصيحتي صح قالت لي اي قلت ليها بلكي بس احظري ي عفيفه دا عايز يلعب بيك ساي وبعدين اسمو منو ؟ قالت لي اسمو أنس وشغال ف العمارة الجمبنا دي ٠٠٠ يتبع٠٠٠