#صيفُ_أبريل15🦋 #حميده_عبدالحميد 🦋 سكت مسافة وشكلو أتراجع وقال لي انا زاتو داير منكم شنو ولا الدخلني ف قصة بت خالتك شهد شنو داك اخوك وود خالتها نايم ومرتاح امشي اتصلي ليهو هوو وكلميهو، شلت نفس عميق وقلت ليو عليك الله لو فيك ذرة من الإنسانية وريني شهد وين ، سكت وتاني قال لي ، م عشان حُبا فيكم او عشان انا انسان كويس بس انا ح اوريك ساي قلت ليو طيب ، قال لي حاليا بت خالتك قاعدة مع أخطر عصابة هنا ف الخرطوم وصراحه الناس ديل سُمعتهم كعبة شديد و عندهم ملفات كتيرة ف المحاكم وناس إجرام جدا وكل حاجه كعبه هم بيعملوها بالمختصر ديل ناس م بتخاف الله ٠ هنا حسيت بقلبي انقبض وماقادرة أتنفس قلت ليو ناس ؟ لي هم كم نفر وهم اولاد يعني ؟ قال لي اي اولاد ، عاينت لي لجين بصدمه وبصوت بعيد قلت ليها شهد قاعده مع الاولاد ي لجين، انتي قادرة تتخيلي انو شهد حاليا وين ، قالت لي حميده احسني الظن ،قلت ليها بس كيف لكن ؟ وريني ي لجين والله لو احمد عرف بقتلها ، ويمكن يلحقني ليها ، هنا جاني صوت أنس وهو قعد يقول ع العموم هم عندهم بيت وانا للان م عرفتو وين ،لكن ل بكرة الصباح ح اتصل عليك بعد م اجمع التفاصيل كلها و ارويك، قلت ليو ل بكرة ؟ بس انا فيني حيل ولا صبر عشان انتظر لي بكرة ،قال لي مغلوب على أمرك مجبورة تنتظري ولو م عندك صبر فتشي ليك زول تاني وانتي حاليا قاطعة لي نومتي ي استاذة ، ياخ حرفيا الإنسان دا دمو بارد ،شديد قلت ليو خير وقفلت الخط طوالي ، ودموعي جرت نيل ، لا حولا ولاقوة الا بالله معقولة شهد ،لالا م قادرة اتخيل مستحيل طبعا اكيد هو بيكذب علي وعايز ينتقم مني شلت التلفون ورجعت ليهو تاني طوالي فتح الخط وقال لي هو علكيفك إنتي تفصلي الخط وقت عايزة وتتصلي وقت عايزة ، مفتكراني خادم عندك ؟ قلت ليو أنس احلف ب الله انو الكلام القلتوا لي عن شهد دا صح ٠٠ قال لي م مجبور احلف ليك وانتي حُره تصدقي ولا لا وقفل الخط ، لجين قالت لي كلامو واضح قلت ليها هي شهد طلعت مع روان لكن فكيف تكون قاعده ف بيت كلو اولاد ؟؟ قالت لي وروان هي شنو ماوحدة تافه بس وربنا يهديها واكيد بتكون هي زاتها قاعدة معاهم ، قلت ليها طيب والحل قالت لي ماف حل غير ننتظر لي بكرة ونشوف كلام أنس قلت ليها طيب قالت لي لو م عرفنا اي شي حنكون مجبورين انو نوري احمد وناس البيت لانو دا الموضوع بقى خطير بعد دا ، حسيت بنفسي كاتم ، م اتخيلت ابدا الأمور تمشي ع المنوال دا ، غمض عيوني ورجعت فتحتهم ب رضا وقلت لي لجين الحمدلله ، امتحان وح ننجح فيهو ان شاءالله وصدقيني موش شهد انا بعرفها حق المعرفة واكيد قاعدة هناك وهي مجبورة لأنو شهد أقصي أحلامها تلبس لبس ع الموضه وتتجدع وتعيش حياتها و مستحيل توصل لي نقطة زي دي وانا متاكدة من الناحيه دي ، ابتسمت وقالت لي دا الكلام الصح ،وارح نصلي لينا ركعتين وقت جا الثلث الأخير من الليل قلت ليها طيب مشينا اتوضينا ،وصادف جات سحابة داكنة مامعروف اذا هي هوا او مطر غطت السماء كلو وحجبت القمره والنجوم ، حتي الجوو كتم شديد ، قلت لي لجين الله اعلم دا هو ولا مطر ، قالت لي احتمال كبير مطر، فرشنا المُصلاية اصلا هي كبيرة وبتشيل نفرين ، ولك ان تتخيل ي إنسان إنو ف الثلث الأخير من الليل ربنا بذات نفسو، ، الله عزو وجل يعني رب السموات والأرض، قادر تتخيل ؟ انو ربنا بنزل للسماء الدنيا ف الوقت دا وقت الناس كلها غارقه ف نوم عميق الاا من أحب لقاء الله ، يعني انت ح تبكي وح تشكي وح تفضفض وح تدعي بكل حاجة عايزها اي حاجه انت شايفها مستحيله بس عند الله لا شي، قادر تتخيل انو ربنا بنزل ف الثلث الأخير من الليل الي السماء الدنيا ويقول هل من داعي ف استجيبُ له ؟ ي الله ي رب ربنا بذات نفسو بسألك هل انت عندك دعاء عشان استجيب ليك عليهو ، قيام الليل بالنسبة لي حياة أخري، صلينا انا ولجين وكل زول دعاء ب الحاجة العايزها وقعدنا شوية ، بعدو جات عاصفة شديدة لدرجة الأشجار كانت بترقد ف الارض وتقوم ،من شدة وحول العاصفة الجات بنات الداخلية كلهم صحو وانا ولجين جرينا ودخلنا جوا ، وبقينا مُراقبين ف الشي القعد يحصل دا، العاصفة هدأت شويه وطوالي جات وراها أمطار قوية ،هنا الناس كلها فرحت لأنو الأمطار حتبرد الجو شوية ، كل زول رجع سريرو ولجين فاتت غرفتها وانا قعدت ف السرير حرفيا النوم طار من عيوني ، طلعت تلفوني وبقيت احاول ف رقم شهد بس كان قافل ، فضلت ع الحال دا لحدي م أذن الفجر صحيت البنات كلهم بس عبق رفضت تقوم نظام ماعايزة تتكلم معاي وكدا ، صلينا وكالعادة البنات بعد الصلاة م بنوموا ، و اول م الشمس شرقت ، مشيت لجين طوالي لقيتهم بجهزو ف الشاي، جات لجين طالعة وشايلة معاها كُبايتين شاي بنكهة النعناع وبسكويت رويال، قالت لي ارح نمشي المظلة قلت ليها طيب شلت الطربيزة ومشينا هناك وحرفيا الجو كان حلوو والأرض مندية وكان ف زي غمام خفيف كدا، ختيت الطربيزة ف النص ولجين ختت الكبابي، وقعدنا ناولتني وحدة وشالت وحدة وقالت لي = شايفاك اليوم احسن ،ابتسمت وقلت ليها الحمدلله ، ي لجين قعد اصبر نفس وان شاءالله لحدي بعد شوية ح نعرف شهد وين قالت لي واحتمال كبير ترجع براها قلت ليها ان شاءالله يارب ، شربت شوية من الشاي ونزلت الكباية ف الطربيزة لجين قالت لي ي بت دا شنو قلت ليها والله ي لجين م عندي نفس قالت لي طيب ، قلت ليها ثواني اجيب تلفوني واشوف أنس عمل شنو قالت لي طيب دخلت جوا وفصلتوا من الشاحن لقيتو عامل ٦٧% شلتو وجيت قعدت جمب لجين وقلت ليها م اتصل قالت لي بكون نايم اصبري شويه قلت ليها انتي عارفه لو دا كان احمد كان ثانية م قعد ، قالت لي بس هو لو عرف انو شهد بت خالتو كان موقفوا حيكون نفس موقف احمد قلت ليها م ظنيت لانو هو مابعرف حنان الاهل هزت راسها وقالت لي بتتسهل قلت ليها ان شاءالله فتحت الشبكه ودخلت الواتس ، لقيت رسالة من أنس طوالي عاينت لي لجين وقلت ليها رسل قالت لي اها قال شنو ، فتحت الرسالة وكان كاتب لي ( انا حاليا طالع من البيت ويمكن شبه عرفت مكان بت خالتك وين و لو عايزة تعرفي تعال لي ف المركز الصحي البعد الجامعة ح اوديك مكانها، وانتظري من مكالمة بس ) قريت الرسالة وحسيت ب راحه شويه وقلت ليها الحمدلله عرف مكان شهد وين قالت لي م قلت ليك ح تتحل ، قلت ليها طيب ح امشي براي انتي امشي المحاضرة قالت لي لا مستحيل اخليك براك مسكت يدها وقلت ليها لجين بجد انتي م قصرتي وانا عارفة محاضرتك مهمة قدر شنو قالت لي طيب بس بيناتنا تلفون قلت ليها حاضر ، دخلت جوا لبست عبايتي وربط نقابي وشلت تلفوني وقعدت ف المظلة الجمب باب الداخلية وكنت مستنية مكالمة أنس ٠٠٠ وبجد بقيت ماقادرة اصبر ف جانب آخر٠٠٠٠ صحيت ولقيت نفسي نايمة ف الكرسي وحسيت برقبتي مُتشنجة يمكن الرقدة كانت غلط عاينت يمين وشمال واتذكرت الشي الحصل امس ، قلبي لمن ضرب ، طوالي جريت ع الباب عشان افتحوا بس كان مُطبل من برا ، جريت غرفة روان وضربت الباب بقوة وقلت ليها افتحي بس كان ماف اي صوت لزيت الباب طوالي فتح دخلت جوا وبقيت افتش روان ب عيوني بس كانت ماف ، فتشتها ف كل مكان م شفتها، جريب ع باب شارع وبقيت الز فيهو بقوة ، لحدي م حسيت بصوت كركبة زول وهو بيفتح فيهو رجعت خطوة ل ورا وقلت ف سري اكيد دي روان لحظات بس والباب فتح ، وجا معتصم داخل، قلت ليو انت ؟ ابتسم وهو برجع شعرو لي ورا وقال لي اي انا ، اشتقتي لي صح ٠ قلت ليو روان وين ؟ قال لي م ورتك قلت ليو توريني شنو ؟ قال لي مع الأذان الاول سافرت النيل الأبيض وشالت معاها بضاعة بس م تخافي انا ح اهتم بيك قلت ليو شكلك مريض نفسي ، ومجنون وسفاح ومجرم ، قال لي انتي موش جيتي للدرب دا براك يلا اتحملي وع العموم ح نطلع من البيت دا لانو بقا مشكوك فيو امرو صرخت فيهو وقلت ليو وانا مالي ومالكم اختوني ياخ وبقيت ابكي ، جا علي وقال لي بس م بقدر اخليك ف حالك وانا كلمتك صح ، وانتي لي م عايزة تكوني معانا، حتلقي حب وحنان واهتمام اكتر من البتلقي ف بيت اهلك ضحكت وقلت ليهو اكتر من بيت اهلي انت عايز تقارن اهلي بي ملقطين زيك ؟ قال لي كل كلمة منك مقبولة ي حلوه وع العموم ارح يلا ، قلت ليو ما ماشه قال لي بخليك تمشي بالغصب فاحسن تمشي معاي عديل ، وكانت عيونو حمرا شديد ، شكلو ساطل ، استسلمت وقلت ليو طيب ، طلع قدامي والعربية كانت مُلاصقة الباب ، وقال لي اوع تفكري تجري لانو انا ولد وانتي بت ، قلت ليو حسبي الله ونعم الوكيل فيك وفتحت الباب وركبت وهو ركب أمن الأبواب كلها واتحركنا وانا دموعي كانت نازلة زي المطر م عارفه الورطني شنو مع الناس ديل لو قدرت و رجعت لي اهلي تاني جامعة زاتو م عايزة أقرأ ولا عايزة البس بناطلين ولا عايزة اعيش حياتي ح اسمع كلام حميده بس ، ٠٠ ف مكان ثاني٠٠٠٠ واخيرررا ي عمك دخلنا الخرطوم بعد رحلة شاقة ويوووم كامل ماشين ف الطريق حتى وصلنا ، خال يونس نزلنا ف المحل حقو وقال من دربوا دا ماشي بحري ، قلنا ليو م قصرت ي خال قال لينا اعملوا حسابكم بس قلت ليو معقولة ي خال معاك شفاته عديل ضحك وقال لي ي زول اعملوا حسابكم بس ودور وفات ،دخلنا جو المغلق ول جوا ف مخزن دخلنا شنطنا وقعدنا شوية، يونس قال لي والله هنا في جنس مزز ي فردة تعاين لمن تقول بس ، قلت ليو انت جادي أمزز من المزز الفي كسلا يعني قال لي بالذوق بس ، ضحكت وقلت ليو قدام بس ، مشينا اقرب قهوة وقعدنا شربنا جبنة ، طبعا نحنا نظامنا لمن نشرب جبنه بتكون عبارة عن زنجبيل تقيل ، يونس قال لي اهلك م سألو منك ،قلت تصدق لمن قلت لي عمتي مسافر قالت لي دربك أخضر وكانو عايزة تتخلص مني وانا زاتو مافاضي ليها ،قال لي وح ترجع تاني هناك ، قلت ليو لو ربنا كاتب لي ارجع ارجع بس حاليا شفت كسلا دي دا طرفي منها ومفكر امشي قدام ي مصر يا ليبيا ، قال لي الخرطوم دي زاتها بتقدر تعيش فيها قلت ليو نشوف ونجرب ، خلصنا قهوتنا وبقينا نلفلف ٠٠٠ ف ناحية أُخري ٠٠ م عارف بس بعد م سمعت خبر بت خالت حميده م قدرت انوم نهائي وكانو ف صلة بتربطني معاهم ، وبقيت اضرب لي كل زول بعرفو عشان اعرف معتصم حيكون وين وأخير لميت ف واحد اسمو وائل ولقبو كابوس ،وسالتو منو ، شكلو عندو تار قديم مع معتصم ف طوالي وراني مكان تواجدهم وين واداني معلومات كتيرة عنو ، وحسب الشي السمعتوا عنو ، بت خالتهم دي الله يحميها بس ، طلع شبه مريض ومتهم ب كم جريمة قتل ، المره دي صحيت قبل الشباب حتي احمد خليتو نايم ، غشيت عمر وقلت ليو ح اتأخر شويه قال لي اعذارك كترت وانا بطريقة دي ح انزل التيم تبعكم كلو واشوف ناس جُدد قلت ليو التشوفوا مناسب كلو اعملوا، قال لي انا هسي واقف هنا وراجي بتاع العمارة يجي قلت ليو حلو المهم انا ماشي ، قال لي الله معاك دورت الموتر وما وقفت الا جمب المركز واتصلت لي حميده ،قلت ليها اتحركي بعد ربع ساعة حتي جات وقفت قدامي وقالت لي وينها شهد قلت ليها اول شي الناس بتسلم ،شالت نفس عميق وقالت لي السلام عليكم ، قلت ليها وعليكم السلام ، قالت لي وين شهد، قلت ليها انتي راجيه اجيبها ليك ل عندك يعني ؟ قالت لي وهي وين يعني قلت ليها ف البيت مع معتصم ،قالت لي ياريت تصلح كلامك قلت ليها بس دي الحقيقه ولو ماشه ارح اركبي معاي ف الموتر ٠٠٠ بلسان حميده ٠٠ اول شي اترددت كتير كيف يعني امشي معاهو يمكن كذاب، ويمكن شهد قاعدة ف مكان تاني اليضمن لي شنو هو صادق، قلت ليو انت وصف لي المكان بس قال لي لو مشيتي براك مصيرك حيكون نفس مصير بت خالتك قلت ليو ولو مشيت معاي ال ح يتغير شنو مثلا ؟ قال لي انا عادي بتفاهم معاهم قلت ليو كيف ؟ قال لي لانو انا نفس تركتهم، قلت ليو شنو؟ م فهمت قال لي داخل ف الشغلة دي قلت ليو وهي الشغلة دي شنو؟ قال لي ممنوعات ختيت يدي ف خشمي وقلت ليو شنو شنو قال لي عايزة تعرفي مكان بت خالتك ولا لا ، ياخ انسانة مزعجة بجد انتي وانا زاتو م عارف قعد ادي واخد معاك ف الكلام لي ،قلت ليو انت إذن م بتفرق عنهم ف شي وخليك عارف اي انسان اتعاطى وشال منك الشي دا فهو علي حسابك انت اول شي اتخيل بس تكون مشترك ف فساد أمة كاملة وخليك عارف انت الان بتساعد ف اكبر مصيبه ويمكن ولد صغير أو شافع او راجل كبير شربو ودخلو ف الحاجات دي انت اول مذنب لانو ساعدته ف دمارهم وفسادهم وح تحمل ذنوبك وذنوب الناس الإتعاطت دي كلها ويا ويلك لو مت وانت ف الدرب دا و ياهو زاتو خسرت الدنيا والآخرة، سكت مسافة وقال لي نصايحك دي خلي توريك مكان بت خالتك طيب ولف الموتر عشان يرجع بس اشوف ليك احمد ف وشي ووش أنس وكل لوحات الغضب مرسومه ف وشو، مسح وشو بعصبيه وقال لي قعد تعملي مع الزفت دا شنو ؟ طبعا انا حيلي برد خلاص وجسمي حبط ، صرخ وقال لي بتكلم معاك انا بقيت ارجف وم عرفت اقول ليهو شنو ، شكلو أنس حَنه على حالتي وقال لي أحمد م تصرخ فيها احمد قال ليو قلت شنو ؟ م اصرخ فيها وانت بصفتك منو عشان توريني اعمل شنو ، يعني عشان لقيتني مديك وش بقيت تتمادى لي درجة انو واقف مع اختي ؟ انت عايز توريني نظام الراجل فينا منو صح ؟ نزل من الموتر وقال ليو انت مشكلتك شنو بالضبط ي إنسان، قال ليو مشكلتي شنو ،انت واقف مع اختي وتقول لي مشكلتك ، شنو ، أنس طلع مستفز جدا وقال ليو اي واقف مع اختك يلا ح تعمل شنو ، احمد متعود يشيل سكينة معاو وشكلو كلام أنس غضبو شديد طلع السكينة وقال ليهو عيدها تاني، أنس طلع مجنون بجد وقال ليو قلت ليك اي واقف مع اختك عايز تعمل شنو؟؟ الشيطان اتملك احمد خلاص والغضب عمى بصيرتو ورفع السكينة عشان يطعن أنس وانا خلاص حبطه وم لقيت نفسي الا وانا قافلة وشي بيديني الإثنين وف نفس اللحظة بقيت ابكي واصرخ ولساني فلت وقلت ليو م تقتلووا ي أحمد دا وخالتو إبتهال٠٠ يتبع٠٠٠