#صيفُ_أبريل23🦋 #حميده_عبدالحميد🦋 قلت ليو انا ؟ قال لي اي انتي!! ، م قدرت استوعب كلامو دا او افهم هو قاصد شنوو رجعت وعدت ليو السؤال تاني وقلت ليو انا أُمنيتك الوحيدة والممكن تخليك سعيد لدرجة إنو انت حتسامح خالتي وعم يوسف؟ قال لي ايوا ،سرحت مسافة وقلت ليو بس ،كيف؟ ،ضحك وقال لي بعد شجاعتك ونضمك الكتير دا ، كلوو طلعتي غبية وما بتفهمي التلميحات ، قلت ليو شايفني ذكاء اصطناعي، صلح قعدتو بحيثُ وجه نظرو ف الارض ، وقال لي طيب ح اشرح ليك ، قلت ليو حلوو طيب اشرح لي سامعاك انا ، قال لي تتذكري اول يوم لمن شتمتيني وقت كُنت مع عبق ، قلت ليو انا بس م شتمتك أنا بس قلت ليك الحقيقه ، ابتسم وقال لي امممم حقيقه لكن والمهم انا ف اللحظة ديك كُنت حاقد عليك تصدقي!! لكن ف نفس اللحظة حبيت شجاعتك وكونك بتنصحي صحبتك وتبعديها عن أي طريق غلط ف انتي انسانة م ساهلة ، وانا م اكذب عليك لمن عرفت إنو ف علاقة قرابة بتربطني بيك فرحت شديد ، هنا اتوترت اكتر لانو بديت افهم هو قاصد شنو ، قلت ليو طيب ليه م عايز تكون معانا وترجع ل خالتي ؟ قال لي ف حاجه جواتي م قادرة تتقبل خالتك ،قلت ليو طيب ،قال لي ع العموم انا ح اجيك من الاخر كدا واقول ليك ، بجد انا محتاج انسانة زيك ف حياتي محتاج انسانة ترشدني للطريق الصاح لو جا يوم وتُوهت فيهو ، محتاجك ف كل كبيرة وصغيرة عايز اتعلم منك اكتر واعرف عن الإسلام حاجات كتيرة كنت غافل عنها ، عايز اعرف الانسان الكويس المدفون جواي عايزك تكوني لي كتف اذا مِلت ، وانا عارف الدنيا دي فتنتها كترت واصبحت مُغرية لأبد حد ، ف انا بجد كدا محتاج إنسانة زيك ف حياتي وبشدة ،عايزك تكوني سبب ف صلاحي من بعد الله ، عايز اعيش معاك وانا مطمن وم خايف من الفقدان ،عايزك تدعميني وتسنديني زي م بتعملي كل مرة عايزك تكوني كل قوتي ، وانا بوعدك ح اكون ليك كل شي ح احارب عشانك وح اعمل المستحيل ف سبيل اشوفك سعيدة وانا عشانك قطعت علاقتي مع أي بت وتاني مستحيل أدخل ف علاقة غير شرعية انا عايز ارضي ربنا عشان يرضى عني وتكوني انتي العوض الجميل ، وحتي لو م وافقتي بي صديقيني من بعدك م عايز انسانة تانية تدخل حياتي ، وليك كل الحُرية ف القبول او الرفض٠٠٠ هنا سكته مسافة وم عرفت أقول ليو شنو كل العبارات خذلتني ، كنت ف المنتصف بين الضياع واللقاء، خصوصا إنو انا بعتبر أنس ك ولد خالة لا غير وم اتوقعت انو ف يوم من الايام نكون تحت سقف واحد ،يعني حاليا كلمة واحدة مني قادرة تصلح كل شي وكلمة واحدة قادرة تخرب أي شي ،شلت نفس عميق وقلت ليو اها لو رفض مثلآ ؟ قال لي ح اسافر قلت ليو وين قال لي مكان بعيد م بيقدر أي زول يلقاني فيو واصلا انتي أملي الوحيد ولو رفضي يبقى ماف داعي ل وجودي هنا ، قلت ليو طيب تقدر تنتظر ردي لي بكرة ؟ ابتسم وقال لي بنتظر وقام ع حيلوا وهو بيلبس ف الشنطه وقال لي، عايزك تفكري ب عقلك وم تجامليني ع حساب سعادتك وانا عارف انتي الان بالك ف خالتك وممكن تاخدي قرار غلط عشان تسعديها، انا عايزك تفكري بكل حب وتشوفي هل انا الانسان المناسب ليك او لا وم تبني تعاستك ع سعادة غيرك ،قلت ليو ان شاءالله قال لي طيب بستئذنك وفات طوالي، رجعت وسندت رأسي ف حافة الكنبة كنت محتارة شديد وماعارفه أعمل شنو هل اختار سعادة خالتي ام سعادتي ،طيب السبب البيخليني أرفض أنس شنو؟ هو ف النهاية ود خالتي وصح كان طايش شويه بس هو قعد يجاهد ف صلاح نفسو ،غمض عيوني لفترة طويلة ،ولقيت إنو لازم أحكي لي شهد ، طلعت تلفوني واتصلت ليها ،ردت لي طوالي وقالت لي اها الجديد شنو؟ قلت ليها تعالي لي ف مكان امس قالت لي طيب وقفلت الخط ، قعدت شويه وبعد مسافة لمحتها جايه على ، زحيت ليها وقعدت جمبي ،وقالت لي اها!!! شلت نفس عميق وقلت ليها هو ح يسامح خالتي ف حالة واحدة بس قالت لي ويلي هي؟ قلت ليها اذا وافقت اتزوجوا!!!قامت ع حيلها وكل لوحات التعجب اترسمت ف وشها ، وب ابتسامة عريضه قالت لي وربي نفس الكلام الفي بالي يبت كنت متاكدة انو الولد عايزك شفت نظرات الإعجاب ف عيونو، قلت ليها اصلا تحليلاتك دي ياها الجايبه لينا البلاوي ،رجعت قعدت تاني ومسكت يدي وقالت لي اكيد وافقتي صح ؟ قلت ليها م اديتو رد واضح لسه واحتمال كبير أرفض، صرخت ، وقالت لي يبت دا م إنسان يترفض، انتي عارفة لو حكيت ليك عن كمية البنات الميتات فيو م حتصدقي ، قلت.ليها وم يموتو انا اعمل ليهم شنو، ،وثم ثانيا انا ما ح اعرس إنسان عشان جمالوا انتي عارفة الجمال بيجي ف المرتبة الأخيرة بنسبة لي ، وف نظري بحب الإنسان المسؤول والغيور ع عرضو والصلاي والبيخاف ربو واخلاقو البتكون طغت ع كل شي ، وانتي عارفه انو الزواج دا مشروع عمر وحاجه الي الأبد فيبقي التريس والتأني لازمين جدا انا ما ح اعرس وخلاص انا ح اختار اب لاطفالي بعدينو لازم اضمن انو ح يتربو ع العقيدة الصحيحه ويلتزمو ب أوامر الله لأنو قبل اي شي بعدين نحنا رعية ،والرسول قال كلكم رأي وكلكم مسؤول عن رعيته يبقى انا ح ادخل ف إمتحان صعب والنتيجه لازم تكون حلوه ف عشان كدا قبل أدخل الإمتحان دا لازم اكون دارسة كل شي سمح ، ويبقي هنا الاختيار الصحيح مطلوب وبشدة ،سرحت مسافة وقالت لي صح كلامك بس يحميده أنس فيو كل الصفات دي صدقيني هو كان بعامل نفسو كدا ك عقاب نفسي فقط قلت ليها ح افكر قعدنا شوية وبعدو مشينا اشترينا إيسكريم ورجعنا البيت لقيت لجين نظفت وجهزت الفطور ، دخلت الايسكريم ف التلاجة وقلت لي لجين خالتي كيف؟ ردت لي وهي بتقطع ف السلطه وجمبها شهد واقفه وهي بتشرب ف موية باردة، قالت لي والله ي حميده خالتك كويسه ياهو بعد طلعتوا انتو هي دخلت غرفتها واظن نامت ، قلت ليها طيب طلعت من المطبخ ومشيت عليها فتحت الباب براحه شفتها صاحيه بس سارحه ف عالم تاني لدرجة م حست بي وجودي ، فتحت الباب ودخلت ،قعدت جمبها وسألتها بقت كيف ، قالت لي كويسه من دون م تعاين لي ،قلت ليها ي خالتي اذا أنس رجع ليك حتكوني سعيدة قعدت ف نص السرير وب ابتسامه شبه منعدمه قالت لي ح اكون اسعد انسانة والله و ح احبو شديد واعوضوا عن كل شي فات و مالي كلو حيكون ليو هو ، بس كيف يرجع لي ،قلت ليها طيب وناس حبوبه ؟ قالت لي هم حاليا م بيقدرو يعملوا اي شي لأنو أنس كبر خلاص ،قلت ليها كويس لو كدا والمهم انزلي عشان الفطور قالت لي م عندي نفس قلت ليها كدا ح تمرضي قالت لي ع الاقل يمكن ولدي قلبو يحن علي وقت يعرف بمرضي ،قلت ليها لو مرضي ح تكوني عاجزة وح تفقدي اخبار أنس للأبد هنا طوالي قامت ولبست نعالها وقالت لي صح كلامك وارح نمشي نفطر قلت ليها طيب انتي امشي وانا بلحقك ، خليتها طلعت وانا رجعت وقعدت ف السرير تاني و مسكت راسي مسافة بعد م شفت حالة خالتي ، بس لسة كنت م قادرة أحدد موقفي، نزلت تحت ولقيتهم كلهم حارسني ، وابتدينا نفطر كان كل زول ساكت ، لحظات بس وسمعت صوت الباب ،شهد قالت هي ح تفتحو قلت ليها طيب، قامت واتحركت ع الباب بعد دقيقه جات راجعة وقالت لي الضابط اخو يوسف ومعاهو اموو قالو عايزين يتكلموا معاك قلت ليها طيب خلي يتفضلوا ف الهول مسافة البس نقابي وعبايتي قالت لي طيب خالتي قالت ليها خلي يمشوا من هنا قلت ليها ي خالتي يمكن جاين ل موضوع مهم قالت لي لا بس يمشوا، حنستها كتير حتي واقفت امشي عليهم ،قمت من الاكل وغسلت يدي ودخلت غرفتي لبست عبايتي سريع وربط نقابي ومشيت عليهم ،اول م جيت ام عم يوسف قامت ع حيلها، جيت وسلمت عليها وهي مرة كبيرة ف العمر وسلمت الضابط من بعيد ،وقعدت، هنا الضابط اتكلم و قال لي طبعا ي بتي اخوي للان ف المستشفى وحالتوا صعبة شويه ،وطلب إنو يقابلك ، قلت ليو ربنا يواليه بالشفاء العاجل قال لي امين يارب ،امو قالت لي ح نطلع طوالي قلت ليها طيب بس اكلم اخوي قالت لي طيب شلت تلفوني واتصلت ليهو بس تلفونو قافل، كلمت شهد تكلموا لو جا وطلعنا، ع المستشفى، مسافة الطريق الضابط سألني من أنس قلت ليو كويسس قال لي قعد يجي لي خالتك قلت ليو لسه م اتقبلها ابتسم وقال لي راسو قوي وعنيد زي ابوو ،ضحكت وقلت ليو عم يوسف يتشاف غير كدا ضحك وقال لي عشان عجز زمن كان ف شبابوا كان مطلع عين اهلوا اموو ضحكت وقالت ليو بس برضو كان مسكين ي مصعب، معارفه حسيت ب أهل يوسف مساكين وحسيت انو أنس لازم يتعرف عليهم ويتم باقي حياتو معاهم ،وصلنا المستشفى ودخلنا ع طول وعم يوسف راقد ف العناية دخلت طوالي ،وسلمت عليه وكان صاحي ، جابو لي كرسي وقعدت جمبوا ،وقال لي = أنس كيف قلت ليو كويس قال لي حمدلله ،قلت ليو كيف انت قال لي حاسي ب يومي قرب قلت ليو الموت م بيقتل زول وان شاءالله لو ربنا كاتب ليك عمر تعيشوا ح تعيشوا قال لي انا بس اتخذلت كتير ولحظة وحدة دمرت كل شي بنيتو ، قلت ليو كل حاجه ح تتصلح قال لي م ظنيت وقال لي ع العموم انا جبتك هنا عشان تخليني اشوف ولدي لآخر مرة قبل اموت نفسي احضنوا ويسامحني العبرة خنقتني وقلت ليو ان شاءالله، قعدت معاهو شويه واخو قال ح يوصلني قلت ليو بمشي براي قال لي لا قلت ليو عندي مشوار قريب من هنا قال لي طيب طلعت من المستفشي وحسيت بنفسي مسخنة شديد يمكن دي الأحداث الحاصلة دي كلها خلتني احس كدا والشمس كانت ساطعه بطريقة عجيبة ومسخنه سخانه م طبيعيه عاينت يمين وشمال شفت كافتريا، طوالي مشيت هناك دخلت والتكيف كان شغال شكلو شغالين ب طاقة لانو الكهرباء قاطعة، دخلت وطلبت لي عصير فراوله وقعدت ، لحظات بس وجا شاب داخل ،قعد ف الطاولة القدامي ، جا الويتر وقال ليو عايز شنو قال ليو شوية بس راجي زول قال ليو طيب وانا جابو لي العصير شلتو وبديت أشرب لحظات بس وجات بت لوهله حسيتها مصرية بنطلون وكعب عالي والطرحه ف نهاية الراس وشايلة ليها شنطه صغير بطرف اصابعها لفت جميع الأنظار الفي المطعم والناس بتعاين ليها و وصلوها لين م جات ووقفت ف طاولة الشاب القدامي، طلعت النظارة وقالت ٠٠ = هاي مصعوبي ابتسم وقال ليها اهلين ايلاف والليلة شنو الحلاوة دي ،؟ رجعت خُصل شعرها ل ورا وهي بتقعد ف الكرسي وقالت ليو بجد طالعة حلوه ؟ قال ليها مُكملة الحلاوة ي ستي ، قالت ليو وشنو المفاجأت دي ، قال ليها بالنية بس ي قلبي ، قالت ليو حلو برضو ع الاقل قدرنا نتقابل قال ليها تاني ع طول ح نتقابل ،ورائيك شنو بكرة المسا نتلاقة ف مكان برانا كدا وحرفيا جمالك يهبل ي بت قالت ليو اوكي معندي مشكلة ،كنت بعاين ليهم بس والمغصه كاتلاني خصوصا البت م كبيرة وعمرها بين ال١٨ او ال١٧ سنة وظاهر عليها إنها بتحب الشاب دا ،بس هو نواياهو ابدا م كانت كويسه، بقيت اعاين للبت مسافة وقلت ف سري هسي لو شهد كانت هنا ، كان شبهتها ب زول وطلعت ليها اهل من تحت الارض ،طلعت تلفوني عشان اشوف الساعة كم وبالغلط ضغط ع الكاميرا وصورتها والصورة طلعت صوت لمن انتبهوا لي من الخلعة دخلت التلفون ف الشنطة وقمت ع طول ، مشيت ع المواصلات ومن بعيد شفت أحمد، قلبي لمن ضرب ، وقف قدامي وقال لي بتعملي شنو هنا ؟قلت ليو جيت لي عم يوسف قال لي وعم يوسف قاعد ف الكافتيريا؟ قلت ليو سخنت وجيت اشرب عصير ،قال لي تمام وقف العربية وقال لي اركبي ركبت وهو فات وانا رجعت البيت وقضينا يومنا عادي وبالعصر شهد ظبطت لينا جبنة ب طقوسها ،وحرفيا لجين بقت لينا زي الأخت واكتر ، المغرب اذن صلينا وكل زول شاف موضوعو وانا دخلت غرفتي فتحت اللابتوت حقي وقريت شويه ، لين م أذن العشا ، صليت ودعيت ،وقررت انو أوافق ب انس ،عشان خاطر خالتي ، فرشت سريري ورقدت عشان انوم غمض عيوني و هنا طق جات صورة البت الفي الكافتيريا ف بالي وهنا ملامحها بدت توضح لي ورجع بي الزمن شوية واتذكرت قبل مره كنت انا وامي قعد نشاهد ف ألبوم الصور حقهم وشفت صورتها هي وحبوبه وزمن حبوبه كانت شابه هنا طوالي قعدت ف السرير والبت فيها شبه كبير ل حبوبه ،طوالي طردت الأفكار دي كلها من بالي وقلت ف سري يجازي محنك ي شهد خلاص عادتيني، رجعت ورقدت نمت وما صحيت الا نص الليل ، وكان الجوو مغمم واظن بداية أمطار فتحت الُشباك ودخلت نسمه باردة صليت القيام ودعيت انو ربنا يسهل أمري ويوفقني ف حياتي، ويكتب لي الخير ف كل شي ، صلاة قيام الليل متعة لايعرفها الا من أراد لقاء الله، تاني م نمت لانو موضوع أنس كان شاغل حيز كبير من عقلي قعدت ف المُصلاية وبقيت اسبح لين م أذن الفجر صليت وقمت ع شغلي ،وشوية شويه ناس شهد صحو وخالتي حضرت لينا الشاي ،قلت ليها الليله مزاج الف قالت لي م عارفه بس متفائلة قلت ليها ان شاءالله تجي بُشارة ترضيك وتفرحك قالت لي امين يارب ، طلعت ومشيت الهول وقعدت مع ناس لجين وشهد ،الحمدلله الليلة م شغالين ،جات خالتي وختت الشاي لجين كبت ليها السكر وانا كنت بحول ف القنوات وجبت الجزيرة جا احمد داخل صبح علينا ودخل المطبخ وتاني طلع ، خالتي كبت لينا الشاي وناولت كل زول كبابتو، وبقينا نتونس ،لحظات بس وسمعت نغمت تلفوني ، نزلت الكُباية ف الطربيزة ومشيت عليو واتفاجأت ب رقم عبق هي المتصلة ، فتحت الخط و سلمت عليها، وطوالي بقت تبكي ،قلت ليها خير ي بت ف شنو قالت لي انا ي حميده بحب أنس كتير وهو امس اتصل لي ونهى علاقتو بي وصدقيني انا م بقدر بلاو وانا عرفت إنو هو طلع ود خالتكم و ياريت ي حميده ترجعينا ل بعض خاته فيك الامل وانتي انسانة كويسه شديد ياريت م تخذليني وخلي بس يجي يعرسني وانا ح اتنازل من كل شي و صدقيني لو عرس وحدة غيري بموت ي حميده بقتل نفسي ، هنا حسيت ب راسي ح يتفجر قلت ليها طيب ،وقفلت الخط طوالي ،ي الله دي مصيبة شنو دي قعدت ف السرير وسرحت ف الفراغ ، من المصايب البقت تنزل دفعة وحدة ، قطع سرحاني نغمة تلفوني تاني شلتو وعاينت للمتصل وكان دا أنس، سلمت عليه وقال لي انا ف مكان امس وعايز اعرف ردك شنو عشان الباص ال ح اتحرك بيهو ح يقوم الساعة ٧ عاينت للساعة الفي يدي ولقيتها ٦وربع ، قلت ليو طيب ثواني جاية عليك قال لي كلميني ف التلفون هنا قلت ليو لا قال لي طيب قفلت الخط وطوالي لبست ونزلت تحت شهد قالت لي خير ماشه وين قلت ليها جاني موضوع طارئ قالت لي طيب لجين قالت لي م تتأخري عشان اخوك دا بيجي يسأل قلت لبها بجي هسي دي وطلعت طوالي وعلي حُسن حظي ،من طلعت لقيت عربية طوالي ركبت واتحركنا بعد ١٥دقيفه وصلت ولمحت أنس قاعد ف نفس مكان امس ، بس كان مختلف شديد عن أول كان حالق شعرو ولابس لبس مرتب وعادي كان كل شي فيو مختلف، حسيت بيهو انسان تاني ، قلت ليو السلام عليكم قال لي وعليكم السلام ، وقعدت طوالي كنت متوترة وخايفة شديد ، شال نفس عميق وقال لي اهاا ،قلت ليو بصراحه انا مواقفه علي انو اتزوجك٠٠٠ يتبع٠٠٠