#صيفُ_أبريل26🦋 #حميده_عبدالحميد🦋 أسعد سحب يدو من ايلاف وكل لوحات الغضب اترسمت ف وشوو بعد ماشاف الولد الكان قاعد معاها ف المطعم ، مشى إتجاهو بخطوات كلها شر وقبل ينطق اي حرف إتلفت على أم ايلاف واخوانها وف نفس اللحظة كان بيأشر اتجاه الولد ، وقال ليهم ، التافه دا كان قاعد مع اختي ٠٠ هنا ام ايلاف شالت نفس عميق وقالت ليو اي عارفين ومصعب بحب إيلاف وايلاف بتحبوا من أيام كُنا ف دبي وهم ح يتزوجو ان شاءالله، هنا أنس إدخل بعد ماسمع كلامها المخزي وقال ليها شنوو ؟ بحب ايلاف وايلاف بتحبوا وعاين لي وليد وقال ليو انت سامع امك قعد تقول في شنو؟ قال ليو اي سامع م اطرش انا وبعدين وين المشكلة إذا حبو بعض ؟ نحنا م عندنا اي مشكلة موش اختنا مبسوطه ، أنس بقى يضحك بطريقة مجنونة وقال ليو سبحان الله طلعت ديوث ب شهادة ،معقولة واحد طالع ونازل ف بيتكم ياخ ولد غريب انسان أجنبي و م بيقربكم طالع ونازل مع اختك وتقول لي وين المشكلة؟ انت دينك دا ياتو دين زول ؟ ياخ عيب عليك بجد خجلت ليك والله ،وين الغيرة فيك وين الغيرة ف محارمك؟ لا!! ونفسك فاتحه كمان عشان تقول لي وين المشكلة؟ قال ليو اسمع حركات الناس المعقدة وفارضه سيطرتها دي م بتنفع معانا قال ليو اوكي، وطوالي مشى إتجاه مصعب وعلي حسب كلام ام ايلاف طلع اسمو مصعب مسكو من قميصوا وقال ليو انت حيوان؟ رفع يدو ونزل يد أنس وقال ليو حيوان انت دا وانت زاتك بصفتك منو ؟ وايلاف بطلع معاها اي مكان وانت م زيادة من امها وإخوانها عشان تحددها معاي ، هنا أسعد خلاص الغضب عمى بصيرتو وبحركة سريعة سحب السكينة الفي خصرو ورفعها عشان يطعن بيها مصعب بس أنس مسكو وهنا ايلاف صرخت بالإضافة لي الباقين وانا شويه كدا وقلبي كان ح يقيف ،أسعد كان بقاوم ف أنس وقال ليو لو مافكيتني بطعنك انت زاتك معاو ، الولد خاف وطوالي رجع كم خطوة ل ورا ، أم ايلاف قالت لي وليد الا يفتح فيهو بلاغ بتهمة انو اتهجم عليهم في بيتهم ، أنس مازال ماسك أسعد بكل قوتوا واسعد كان متجنن شديد ومُصر انو يطعن مصعب ، جيت وحاولت اتكلم معاهو بس كان م راضي يسمع اي شي ،ام يلاف مسكت ايلاف من يدها ودخلت بيها جوا وقفلوا عليهم الباب ، الوليد طوالي طلع من البيت بس فات وين م عارفه وهمام كان واقف جمب مصعب وف نفس اللحظة كان بشتم ف أسعد بالإضافة لي مصعب ، ومع كل كلمة بتطلع من مصعب أسعد كان بيفقد اعصابو اكتر من بعيد لمحت الولد الكسلاوي الكان مع أسعد جاي علينا مسك أسعد مع أنس وقال ليو ف شنو أسعد قال ليو فكني من أنس بس ،أنس قال ليو اوع تهبشوا اي حاجه ح يرتكبها أسعد ح تكون مسؤول معاهو ، لحظات بس وجا الوليد ومعاهو اتنين شرطي ،شكلو القسم كان قريب منهم طوالي أشر ليهم ع أسعد وقال ليهم دا ياهو ودي السكينة الشايلها، طوالي اتحركوا عليهو وقبضوا، أنس حاول يتفاهم معاهم بس م اتلفتو زاتو وقالو ليو كلامنا معاكم هناك ف القسم وفاتو ب أسعد ، هنا مصعب بقى يضحك وقال لي أنس طلعوا كان تقدر ي شوية شماسه ، قلت ليو عفوآ شماسه؟ علفكرة ديل اخوانها لي ايلاف٠ كل تفاصيل وشو اتغيرت وف نفس اللحظة وجه نظرو إتجاه همام بمعني دا شنو ،هزا ليو راسو ب ايجاب وقال ليو اي ديل اخوانها وايلاف بت عمي ، قال ليو اها م كنت عارف وهنا شكلو خاف كتير وقت عرف انو ايلاف وراها رجال طوالي عمل حسابوا، وقال للوليد احتمال اسافر دبي الليله، أنس قال ليو تسافر .؟ ونحنا لسه م حلينا مشكلتنا ؟ وموش قلت عايز ايلاف ، وعاين الوليد وقال ليو الليلة دي ح نقعد عليهو علي ايلاف كل تفاصيل وشو اتغيرت وقال ليو حاليا انا م جاهز ،أنس قال ليو م مشكلة م عايزين منك اي شي ء حول نظرو إتجاه وليد وقال ليو انا كلامي مع ديل بس ،همام قال لي أنس انت م تدخل بس واطلع منها ٠٠ أنس مشي عليهو وكان ناوي يتشاكل معاهو بس قلت ليو م تتهور نحنا ورانا مشكلة أسعد حاليا ،قال ليو طيب كلامنا لسه م انتهي وقال لي ارح ، اتحركنا من قدامهم ب الإضافة ل صاحب أسعد ومشينا القسم ،أنس اتكلم مع الشرطي وفهموا لي أسعد عمل كدا، ردا ليو الشرطي وف نفس اللحظة كان ماسك كمية من الملفات وقال ليو ٠٠ = اخوك حاول يقتل ، حاليا تهمتوا خطيرة واحتمال ياخد كم سنة سجن ، مسح وشو بتوتر وقال ليو بس ي جنابو م بقدر اضمنوا ؟،قال ليو لا لا اخوك ح يطلع ف حالة وحدة اذا جو وسحبوا الشكوى، قال ليو طيب وطلعنا ع طول ، أنس قال لي اصلوا الشغلة دي ماناوية تنعدل وكل م نطلع من مصيبه بندخل ف مصيبه تانيه ، قلت ليو ح تتسهل ان شاءالله عاين لي بس وسكت وقال لي ح اوديك البيت وانا ح ارجع عشان اشوف موضوع أسعد، قلت ليو طيب وصاحب أسعد فضل قاعد وانا وأنس اتحركنا من قدام القسم ومشينا ع الزلط مسافة الطريق اتذكرت مصعب عم أنس، وقفت طوالي ،أنس قال لي مالك ؟ قلت ليو اتصل لي عمك مصعب هو ضابط كبير واكيد ح يقدر يطلع أسعد، قال لي م عايز اي كلام مع الناس ديل قلت ليو عشان خاطر اخوك قال لي لالا و أسعد ح يطلع ب طريقه تانيه قلت ليو طيب ، صادف جات عربية وركبنا ع طول ،حرفيا الأحداث دي كلها صدعت بي وخلتني م فاهمه اي شي واتمنيت لو اقدر انوم نومه طويلة خالية من المشاكل ، مررت نظري إتجاه الشباك وبقيت اشوف ف المناظر الفي الشارع واتذكرت لمن انا وشهد كنا جاين الخرطوم هنا ولمن قلبي كان م مرتاح للسفرة دي ، والمصايب المرينا بيها دي كلها، أنس قال لي سرحانه وين قلت ليو ف كل شي حدث لينا ،قال لي فترة وح تعدي وانا عايز منك طلب ياريت م تتخلي عني ي حميده ف يوم من الايام وعايزك تصبري علي لحدي م احل مشاكلي دي كلها وأكون نفسي واتلم معاك بالحلال انا عارف حاليا مشاكلي كترت والوضع بقي م بستحمل بس م عايزك تزهجي او تملي ،ابتسمت وقلت ليو صدقني م قبلت بيك عشان اتخلى عنك وانا معاك ف كل شي قال لي وماتنسي تدعي لي معاك ف كل صلاة قلت ليو ان شاءالله، ابتسم ووجه نظرو ف الفراغ ،وانا رفعت تلفوني وعاينت للساعة كانت ٢شوكه ، الظهر اذن ليهو ساعتين ، فتحت الواتس ولقيت رقم غريب مرسل لي ومفتاح الدولة كان ماسوداني، دخلت ف الرقم وكان ف ريكود مرسل، عاينت ليهو بس وم اشتغلت بيو كتير لانو طوالي ف ارقام وهمية زي دي قعد ترسل لي دخلت التلفون ف الشنطه وعاينت للطريق ومافضل كتير عشان نوصل ، سندت راسي ف حافة المقعد وبديت استغفر لحدي م وصلنا ،أنس وقف العربية ونزل قدامي وانا نزلت بعدو،قال لي انتي أدخلي وانا عندي كم نفر كدا ح امشي عليهم واشوف حل لي أنس قلت ليو طيب قال لي مع السلامه قلت ليو قبل تمشي بنسبة ل ايلاف ح يحصل شنو ؟ قال لي بعد ءأمن سكن مناسب واطلع أسعد من السجن ح اسوقها غصبن عنهم قلت ليو طيب ودعتوا ومشيت ع البيت ، شفت عربية واقفه والعربية دي م قريبه علي بتشبه عربية خالي يحي ،وقفت جمبها وتاني جا ع بالي الرقم الغريب داك ، فتحت التلفون ودخلت ف الواتس ،وفتحت الريكود ،جاني صوت بت قد تكون ف منتصف العشرين ، وكان محتوي الريكود٠٠( السلام عليكم حميده كيف حالك ان شاءالله طيبه انا عارفة ح تنصدمي من الكلام ال ح تسمعي دا بس لازم تكملي المقطع للنهاية، واكيد مستغربة جبت رقمك من وين او انا عرفتك من وين دي كلها تفاصيل غير مهمه وح تعرفيها فيما بعد بس حاليا الوضع متأزم شديد و انا اسمي صفاء، مقيمه ف البرازيل ، وحاليا حبوبتي بتستحضر وهي ف فراش الموت وليها ذنب طالبه العفو من ستو، طبعا ي حميده قبل كم و٨٠سنة حبوبتي دي كانت دكتورة نساء وتوليد ف مستشفي من مستشيفات الخرطوم وكانت ماشاءالله زولة ناجحه في حياتها، بس حبوبتي دي غلطت غلط كبير وحاليا الغلط دا معذبها عذاب ،ف يوم من أيام أبريل كانت ماسكة اتنين عمليات توليد، وكانو حبوبتك ووحدة من سنار والمرة المن سنار دي للاسف حبوبتي بحركة غلط كسرت رقبة الطفل ومات وقتي والوقت داك الناس ديل كانو صعبين شديد وناس عندهم مناصب عالية ف الحكمومه وحبوبتي كانت ح تفقد شغلها لو عرفو انو هي قتلت الطفل وحبوبتك كانت ف نفس الغرفة وأهل حبوبتك كانو مساكين شديد وناس علي حالهم ف حبوبتي اتفقت مع الطاقم الطبي وبدلوا الطفل الميت وادو لي حبوبتك وشالو طفلها وادو للمرة ديك من دون م يعرف اي زول وحبوبتك قالو ليها الجنى اتوفي وحاليا حبوبتي عايشه ف عذاب وطالبة السماح ونحنا مستعدين نديكم سجل الاسرة ديك كلها وهم حاليا ربو طفل حبوبتك ع اساس ولدهم وهم زاتهم م عارفين شي بتمنى حبوبتك تسامح حبوبتي قبل تموت وانا حارسه ردك سريع ٠٠٠) الريكود انتهي وكل لوحات الصدمه اترسمت ف وشي ٠٠ بسم الله دا شنو دا ؟ دا شنو الفلم الهندي ال انا فيهو دا ؟ حاسه نفسي ف رواية مؤلفها خيالوا واسع جدا، حبوبتي وعندها ولد؟ يعني عندنا خال تاني واتربي مع اسرة مجهولة ، دا شنو دا؟ مسكت راسي شديد ودخلت البيت وأثار الصدمه لسه ف وشي، وف نفس اللحظه جا هواا كلوو تراب ،قفلت الباب وراي ولقيت حبوبتي راقدة ف السرير وجمبها امي وخالتي قاعدة بعيد منهم ووشها مورم من البكاء بالإضافة ل شهد الكانت بتبكي برضو وجمبها لجين بتحنس فيها واحمد واقف من دون اي حركة وخالي القاعد جمب امي وكل لوحات الغضب مرسومه ف وشو دخلت وقلت السلام عليكم ماف زول ردا لي غير لجين جيت ووقفت جمب امي وقلت ليها في شنو قالت هو فضل فيها شنو؟ وخالتك المحترمه دي مسحت بسمعتنا الارض ح نودي وشنا وين قدام الناس هناك ، ابوي أمنها ووثق فيها وجابها الخرطوم عشان تقرأ بس تعمل كدا لا وكمان عندها ولد ؟ ياخ عشانها هي نحنا حرمنا نفسنا من القراية وضحينا بنفسنا عشان هي تقدر تقرأ والوقت داك ابوي كان م مستطيع يقرينا كلنا فنحنا ضحينا عشان هي تقرأ بس هي عملت شنو؟ شالت كرامتنا وكرامة ابوي وضربتهم بيهم الارض خجلانه بالجد إنو أقول دي اختي، خالي قام من سباتو وقال لي بالإضافة ل شهد وعمايلها الشنيعة كمان؟؟!!قلت ليو عرفت كيف؟ قال لي هو ف حاجه بتتدسي ف الدنيا دي؟ وشكلها عايزه تمشي ع منهج خالتها المانافعة زيها دي قلت ليو بس ي خالي قال لي ولا حرف وهسي دي تلملموا عفشكم كلو وماف اي قراية ولا زفت وماف اي جامعة دموعي جات نازلة وقتي قلت لي امي بس انا عايزة اقرا قالت لي دي ياها خالتك وقت قرت عملت شنو ؟قلت ليها بس قالت لي ولا حرف قلت ليك قلت ليها طيب أنس عايزني ي امي قامت ع حيلها وقالت لي أنس ولد المرة دي وكانت بتأشر إتجاه خالتي وقالت لي على جثتي بتعرسيهو لمن اموت وتدفنيني بعدين عرسيهو، من الصدمه الدخلت فيني حسيت بشي تقيل واقف لي ف قلبي ٠٠٠ يتبع ٠٠٠