قال : لاحظت لزوجتي كل يوم قبل ما تنوم بتقيف في المراية كتير وتعاين لروحها وأنا كنت بظهر ليها إني ما ملاحظ ليها! كان واضح إنه عندها قلق ومتضايقة من شكلها مرة تهبش وشها وتجرجر جلدها عشان تروح التجاعيد ومرة تشفط بطنها شديد عشان الكرشة تروحكانت زي المخلوعة من التغييرات اللي حصلت ليها بعد السنين دي كلها يوم جيت داخل غرفتنا قبلها وشلت المراية دشيتها وأول ما هي جات داخلة قعدت تعاين تشوف المراية وين ... سألتني طوالي : وين المراية ؟ سؤالها ده كان زي الزول اللي فاقد حاجة غالية عليه صوتها كان مليان ألم و أسى قلت ليها : انتي ما محتاجة للمراية؛ لأنه المراية دي ما بتوريك أنا شايف شنو أنا شايف زوجة جميلة جدا ومسؤولة مهتمة بأولادها ؟ بتساهر عشان نحنا نرتاح شايف زوجة نشيطة قايمة بواجبها بأحسن طريقة وما محوّجانا لي حاجة .... زوجة مجتهدة وكل تعبها عشان البيت ده يكون في أعلى درجات الراحة والأمان والمحبة أنا عارف إنه الحاجات دي ما بتوريك ليها مراية لكن أنا شايفها ومقدّرها وبتخليني أشوفك ملكة يا أجمل النسوان . واصل كلامه : عيونها بقت تلمع بكت وهي بتضحك وقالت لي : أنا كنت محتاجة أسمع زي الكلام ده بالتحديد عشان أقدر أتخلص من القلق والخوف وأحس براحة وأمان . جبر الخاطر ما ساهل وإحساسه جميل خاصة لمن يكون من أقرب الناس ليك ومن شريك حياتك بالتحديد . الكلمة الطيبة بتزرع سعادة وشرور في البيوت وما بتكلف حاجة ولا فيها مجهود أبقوا عشرة على الحبايب ؟ هي الدنيا كلها يوم و نص