🔱 🕉 🔱 *"बाळूमामांच्या नावाने चांगभलं.."* 🔱🕉️🔱 🙏🏻 *" मामांचे भक्त सिध्दगौडा पाटील व कर्नाटकातील पहिला मुक्काम कमतनुर येथे..."* 🙏🏻 *संकेश्वर हे मोठे गाव निपाणी - बेळगाव या राष्ट्रीय महामार्गावर निपाणीपासून २० कि.मी. अंतरावर आहे. संकेश्वरपासून ५ किमी. अंतरावर पुर्वेकडे कमतनुर हे छोटेसे खेडे आहे. तेथे सिध्दगौडा पाटील हे सधन शेतकरी राहत होते. त्यांच्याकडे कमतनुर गावची पाटीलकी होती. गावात सिध्दगौडा पाटलांना मोठा मान होता, तसेच त्यांच्या हुक्केरी तालुक्यातही पाटलांचे चांगले वजन होते.* *सिध्दगौडा पाटील यांचे कौटुंबिक जीवन सुखात चालले होते. त्यांच्या पत्नीचे नाव गोदावरी होते. पाटलांचे श्रीमंत घराणे असल्यामुळे त्यांच्या घरात नोकरचाकरही भरपूर होते.* *काशव्वा भिमगौडा पाटील नावाची एक नात्यातील स्त्री नेहमी त्यांच्या घरी येत असे. ती बाळूमामांची भक्त होती. ती नेहमी मामांची किर्ती पाटलांच्या घरात सांगत असे. मामा आपली बकरी पावसाळ्याच्या आरंभी संकेश्वरहून विजापूरकडे ज्या रस्त्याने नेत असत, त्या रस्त्यावरच पाटलांचे एक शेत होते. तेव्हा मामांची बकरी त्या शेतात बसवून घ्यावीत म्हणजे मामांची कृपा प्राप्त होईल, अशी सूचना काशव्वाने पाटलांना केली होती. तसे पाटलांनाही हे म्हणणे पटले होते. मामांसारख्या सिध्दपुरूषाचे स्वागत करण्यास तेही तयार होते.* *इ.स. १९४१ चे साल होते. जून महिना लागला होता. नुकताच पावसाळा सुरु होणार होता. मामांची बकरी संकेश्वरहून पूढे निघाली. पाटलांनी मामांची आणि बाकी इतरांची माहीती उत्तम प्रकारे घेतली होती. आपल्या शेताच्या जवळपास मामांची बकरी येण्याच्या सुमारास पाटील मामांजवळ गेले. त्यांनी मामांचे पाय धरले व मोठ्या भक्तीभावाने संकेश्वर हुक्केरी रस्त्यालगतच्या आपल्या शेतात त्यांची बकरी बसावीत यासाठी त्यांना कळकळीची विनंती केली. भक्तीयुक्त मनाने केलेली मागणी देवाला का आवडणार नाही ? मामांनी सिध्दगौडा पाटलांची मागणी मान्य केली. त्याबरोबरच मामांच्या बकऱ्यांचा तळ पाटलांच्या शेतात पडला. मामांच्या बरोबर जवळजवळ त्यादिवशी १०० ते १५० माणसे होती. मामांनी शेतात मुक्काम केल्याने पाटलांना खूप आनंद झाला. याबरोबरच ते गावात गेले व त्यांनी सर्वांच्या स्वागतासाठी पोतेभर शेंगा, गुळाची ढेप व टोपलीभरुन पिकलेले आंबे आणले. सगळ्यांनी त्या फराळावर यथेच्छ ताव मारला. रात्र झाली तेव्हा पाटलांनी सर्वांना पोटभर पुरेल एवढे अन्न शेतावर पाठवून दिले होते. भात, भाकरी, आमटी आणि आंबिल असे पदार्थ जेवणात होते. दुसऱ्या दिवशी दुपारच्या जेवणासाठी पाटलांनी खीर, भात, आमटी, पुरणपोळ्या आणि सांडगे-पापड अशी ही मेजवानी सर्व मंडळींना दिली. हा भोजनप्रसादाचा कार्यक्रम सर्वांच्या लक्षात राहील असाच होता. विशेष म्हणजे पाटलांचे उदार अंतकरण आणि आपल्यावरील भक्तीभाव पाहून मामांनी पाटलांच्या शेतात दरवर्षी मुक्काम करण्याचे ठरवून टाकले. त्याप्रमाणे दरसाल प्रवासाच्यावेळी कोल्हापुरातील गडहिंग्लज तालुक्यातील औरनाळ गावच्या मुक्कामानंतर कर्नाटकातील पहिला मुक्काम कमतनुर या गावी पाटलांच्या शेेतातच होत असे. हे मामांच्या हयातीतच नव्हे तर त्यांच्या समाधीनंतरही आजदेखील चालू आहे. गेली अनेक वर्षे पाटील घरणे मामांची सेवा आनंदाने करत आहे. सिध्दगौडा पाटील व गोदावरी ह्या दांपत्याच्या पश्चात त्यांचा मुलगा शंकरगौडा आणि त्याची पत्नी हौशाबाई या उभयतांनी आपल्या वाडवडिलांनी घालून दिलेला मामांच्या सेवेचा पायंडा कायम ठेवला आहे. त्यांचीही मामांवरील श्रद्धाभक्ती ओतप्रोत भरलेली आहे.* 🙏🏻 *' बोलाss, बोलाss बाळूमामांच्या नावाने चांगभलं..'* 🙏🏻