بالنسبالك الليلة هيّ أهم ليلة في السّنة واليوم بكرة هوّ أهم يوم في السّنة اتعامل معاهم بذكاء وتركيز علشان تفوز بأجرهم كامل يعني بديهيًا كده مافيش ريلز، مافيش رد على شاتات بالساعات، مافيش مكالمات فون بالساعات، مافيش نوم بـ ١٢ ساعة فيه أذكار، فيه صلاة، فيه قرآن، فيه دعاء، فيه قيام ليل، فيه سحور، فيه جلسة ضُحى، فيه أدعية من السنة علشان لو عطلت في نص اليوم، فيه هانفتح التليفزيون على قناة السّعودية ونبكي ونتمنى نكون من حجاج العام القادم بإذن الله من غير حولٍ منّا ولا قوة. واسئل نفسك إذا ماكنتش هاصلّي النهاردة قيام ليل بجزء وجزئين، هاعمل ده إمتا؟ وإذا ماكنتش هدعي النهاردة بكل الأدعية الدينية والدُّنيوية وكل الأمنيات الصغيرة والكبيرة وهلحّ بيها على الله، هاعمل ده إمتا؟ وإذا ماكنتش هاصلّي بكرة كل الفروض في وقتها وبالسُّنة وبأذكار بعد الصلاة، هاعمل ده إمتا؟ وأخيرًا.. إذا ماكنتش هاستغل اليوم وهتوب عن الذّنب اياه وهستغفر منه واقفل كل الأبواب اللي توصّلني لُه هاعمل ده إمتا؟ - ليلة ويوم مناسبين جدًا علشان نكسر فيهم رتم العبادة المتعوّدين عليه علشان انا وانت وهمّ وهيّ وكلنا دايمًا عندنا ليڤيل عبادة أحسن بس بنتكاسل الله يهدينا استغلّها فرصة علشان تبدأ شخصية جديدة منك ولا تفتُر ولا تتكاسَل في أن تطلب وتتمنى وترتجي العَفو والمغفرة وصلاح الباطن والظاهر منك مِن مَن لا يُعجزُه شئ في الأرض ولا في السّماء . تسنيم بكري