الامتحانات لعبة نفسية! مش دايمًا بالشطارة ولا بالمذاكرة الكتير وأكل الكتب، لكن بالهدوء والذكاء.. عشان كدا وارد جدًا ناس تجيب تقديرات كويسة بمذاكرة ليالي الامتحانات بس! لو كنت هادي هتعرف تفتكر أي معلومة، أو على الأقلّ هتخمنها صح أو تحلّها بالاستبعاد.. إنما لو اتوترت؛ لا هتعرف تحل اللي ذاكرته، ولا اللي ما تعرفوش! الدراسة والامتحانات أصلًا اختبارات نفسية؛ يا تسيب أثرها فيك وتعلّم عليك، يا تطلع منها كسبان وسليم نفسيًا. الامتحانات مش نهاية المطاف، ولا مقياس حقيقي لأي حاجة! روّق على نفسك، واعمل اللي تقدر عليه، حتى لو مش على أكمل وجه.. بس أكيد أحسن من ولا حاجة. وربنا دايمًا كريم ولطيف، والأيام بتمشي، والامتحانات بتعدّي، وإنت كمان هتعدّي زي غيرك، اللي مكانش متوقّع ينجح، ونجح في الآخر! نسأل الله لنا ولكم التوفيق.