ہندوستانی حجاج کے لیے "حج والنٹیر کور 2025" کی مفت خدمات کا اعلان نئی دہلی – 23 مئی 2025: ہندوستانی حجاج کرام کی خدمت اور ان کے سفرِ حج کو آسان و سہل بنانے کے لیے سنی اسٹوڈنٹس فیڈریشن (SSF) انڈیا نے اپنی عالمی ذیلی تنظیموں انڈین کلچرل فورم (ICF) اور رسالہ اسٹڈی سرکل (RSC) کے اشتراک سے "حج والنٹیر کور 2025" کے عنوان سے ایک جامع اور وسیع خدمت منصوبہ متعارف کرایا ہے۔ اس منصوبے کے تحت مخصوص تربیت یافتہ والنٹیئرز پورے حج سیزن کے دوران سعودی عرب میں تعینات رہیں گے، جو کہ ان تنظیموں کے گزشتہ 15 سالوں کے تجربے کا نچوڑ ہے۔ یہ خدمات مدینہ منورہ ایئرپورٹ پر پہلے حج فلائٹ کی آمد سے شروع ہو کر آخری حاجی کی واپسی تک بلا ناغہ جاری رہیں گی۔ خدمت کے یہ مراکز مکۃ المکرمہ، مدینہ منورہ، مزدلفہ، منیٰ اور جدہ ایئرپورٹ سمیت دیگر اہم مقامات پر قائم کیے جائیں گے۔ خصوصی توجہ ان حاجیوں پر دی جائے گی جو بیماری، بڑھاپے یا دیگر مشکلات کے باعث پریشانی کا شکار ہوں یا راستہ بھٹک جائیں۔ ہر حاجی کو ایک "ویلکم کٹ" بھی پیش کی جائے گی، جس میں چھتری، بنیادی خوراک، چپل وغیرہ جیسی ضروری اشیاء شامل ہوں گی تاکہ سفر زیادہ آرام دہ بنایا جا سکے۔ اس کے علاوہ "حج والنٹیر کور" درج ذیل خصوصی خدمات بھی مہیا کرے گا: الیکٹرانک وہیل چیئرز کے ذریعے معذور یا ضعیف حاجیوں کی نقل و حرکت میں مدد فوری طبی امداد کے لیے ایک مستعد میڈیکل وِنگ دینی رہنمائی کے لیے ایک "اسکالرز ڈیسک" ہر وقت دستیاب 24/7 کثیراللسانی ہیلپ ڈیسک حاجیوں کو ان کے اہل خانہ سے جوڑنے کے لیے "رابطہ سہولت سروس" "لبیک حج نیویگیٹر موبائل ایپلیکیشن" کے ذریعے مقدس شہروں میں آسان رہنمائی یہ تمام خدمات 15 مربوط شعبہ جات پر مشتمل ایک منظم ڈھانچے کے تحت انجام دی جائیں گی، جنہیں SSF، ICF اور RSC کی قیادت میں قومی سطح پر متحرک کیا گیا ہے۔ پورے ملک میں چلائی گئی "حج والنٹیر کور ڈرائیو" نے ان شعبوں کو مؤثر انداز میں متحد کیا اور ان خدمات کی بروقت اور مؤثر فراہمی کو یقینی بنایا۔ SSF، ICF اور RSC کی یہ مشترکہ اور بامقصد کوشش نہ صرف قابلِ ستائش ہے بلکہ یہ ہندوستانی حجاج کے لیے ایک محفوظ، آسان اور روحانی طور پر پُرسکون حج کے سفر کو یقینی بنانے میں ایک اہم سنگِ میل ثابت ہوگی۔