أنا اكتشفت إني بعاني من الخوف على مشاعر الآخرين… برغم إن مفيش حد بيفكر في مشاعري بنفس الدرجة. بخاف أجرح حد، بخاف أزعل حد، بخاف أقول كلمة تضايق حد حتى لو هو قالي اللي يهد جبال. بنسى نفسي، وبحط راحة اللي حواليا قبل راحتي، وبحاول أكون الشخص اللي محدش يطلع منه مكسور… لكن في المقابل، مين بيسأل نفسيتي عاملة إزاي؟!!!! بقيت أحس إني في حرب بيني وبين نفسي…بقعد أبرر للناس تصرفاتهم في دماغي، وأدور لهم على أعذار، عشان أرتاح… بس الحقيقة؟ أنا اللي مش مرتاح. لما بلاقي نفسي بعتذر عن حاجات أنا ما غلطتش فيها، ولما بحاول أصالح حد هو اللي غلط، ولما ببرر أفعال غيري، عشان بس ما أزعلوش… فهمت إن المشكلة مش فيهم بس، المشكلة إني ما علمتش الناس يشوفوا إن ليا حدود، وإن ليا طاقة، ومش معنى إني طيب، إني ما بتعبش. كفاية... أنا كمان ليا حق أرتاح.