(أمي) الله يرحمها ويوسدها الباردة كانت بتتريق علي دايماً وتذكرني بعدد المرات الكتيييرة الكان عندها فيها رأي في زول وقلبها مابيهو وأنا دافعت عنه دفاع مستميت ودعكت يدي في الواطة علي أنه زول رهيب ونادر ومافي منه....وأثبتت الأيام لاحقاً إنو أنطباعها وإحساسها كانوا صاح وأنا سفيت التراب لسوء إختياري !!! وهسه أنا بعترف بأني مابعرف أفهم حقيقة الناس.... ودايماً بقع بي وشي.... والزول ولا الزولة البيدخلوا حياتي ببهل ليهم كل المشاعر الجميلة... وأشيلهم في راسي وأنقز بيهم... وأشوف الواحد فيهم أحسن زول... وأكشح ليهم كل الحلل..وأدخلهم البيت... وأعرفهم علي أهلي وأحبابي... وأخدمهم بي عيوني... وأطير بيهم السماء... ومابشوف فيهم إلا السمح.. ولو حاولت تنور بصيرتي ولا تنصحني، ماااابقبل عليهم كلمة ياخ الواحد لو ولع نار عشان يرميني فيها لظننت أنه يمنحني الدفء 🔥😂🤭 والمشكلة مابتووووب.... مليون مرة وقعت في (الخية) وماتبتا.... مليون مرة عرفت زول علي زول وأحرجني أو (بيشني) معاه.... وياما عاملت الناس بالطيب وأنكروا الجميل...وماصانوا الثقة والعفوية والحنية... وياما غدروني وخانوني وإستغلوني وأكلوا لحمي وشالوا حالي وصدموني وخذلوني ووجعوني وكسروا خاطري و... و... و.... 😭 لكن عارفين أساس المشكلة شنو؟!!... إني بضرب الناس (بولش) من قولة تيت... بسبغ عليهم جلال وجمال... وأفترض حاجات مافيهم... وأشوفهم بي عين موهومة مُزغللة وصورتها مموهة، وأفترض أنهم ملائكة!! وأعتقد كتار منهم شوية كده وبيبقي وجودي في حياتهم عبء عليهم لأني بحملهم فوق طاقتهم وبضطراهم يمثلوا ويتعبوا عشان يبقوا بمستوي شوفي ليهم وظني فيهم ويوازوا عطائي ليهم... وفي النهاية بيزهجوا وبيغلبهم فبيقرروا ينفدوا بي جلدهم ويكبوني في أقرب خور ويلا (فللي) . المهم بإختصار...أنا تأكدتا العيب فيني... انا زولة متطلبة في العلاقات ولايوقة وغير واقعية ومرهِقة وحالمة أكتر من اللازم!! وعموماً أنا زولة مريضة بداء الحب والوفاء وجزيل العطاء، وبحاول أسعد ناسي بشتي الطرق وأعيشهم في راحة وبهجة وإحتواء وده كلام كعب شديييد وفيه (أفورة) غير منطقية وما مطلوبة ونتائجها دائماً عكسية! دحين ياداليا يابتي... (أبردي) وحِلي عن سماء البشرية... وخلي الناس في حالهم. وبس خلاص... التوبة لي حبوبة✋ داليا إلياس تابعونا على 👇 👈 قناة الواتس آب https://whatsapp.com/channel/0029VanuOh7FCCoc0qp3gL26 👈 صفحة الفيس بوك https://www.facebook.com/alssaada