_*indian Airlines ki Woh Parwaaz Kitney Hi Musafiraun ki Umeedaun Aur Khawbaun ka Markaz Thi. Koi Apne Piyaraun sey Milney ki Khushi Mein Sarshaar Tha, To koi Ek Nai Manzil ke Tasawwur Mein Gum. Har Chahray Per Muskuraahat Thi, Har Dil Mein Ek Mansuba Tha Aur Har Aankh Mustaqbil ke Sapney Dekh Rahi Thi.*_ _*Chand hi Lamhaun Mein Hansti Muskuraati Zindagiyan Ek Khamoosh Daastaan Ban Gai.*_ _*Zindagi ka Safar kis Qadar Ghair Yaqeeni Hai, us ka Ahsaas Achanak Pesh Aaney Waley Hadisaat Dilatey Hain. Yeh Waqi'aat Hamein Ghaflat sey jhinjodh ker Yaad Dilatey Hain ke Yeh Dunya Mahez Ek 'Aarzi Padau Hai Aur Hamari Asal Manzil Aakhirat Hai.*_ _*Yahan ki Har Kamyaabi, Har Rishta, Har Shaiy Faani Hai. Baaqi Rahega To Sirf Hamara Emaan Aur Woh Nek Aa'mal jo Hum Aagey Bhej Rahey Hain. Aisey Hadisaat Ek Khamoosh Paigham Hain ke Dunya ki Ranginiyaun Mein Gum Ho kar Apni Daimi Zindagi ko Bhool Mat Jana.*_ _*Yeh Zindagi Ek Muhlat Hai Taakey Hum us Daimi Thikaaney ke Liye Zaad-e-Rah Ekhatta karein. Aur Hum sub Ek Aisey Safar Per Hain jahan Agla Mod kiya Laey ga, koi Nahin jaanta.*_ _*Lehaza, is sey Pahley ke Muhlat ki Dor Cut jaey, Hamein Apney Rab sey Rishta Mazboot karna Hai Aur Apney Aa'maal ko Sanwaar kar us Daimi safar ki Taiyyaari karna Hai jahan koi Saath Na Hoga.*_ _*ALLAH TA'ALA Hum Sub ko Achanak Aane Wali Musibataun sey Mehfooz Rakhey. Hamein Dunya ki Haqeeqat Samajhney, Aur Apni Aakhirat ki Behtareen Taiyyaari karney ki Taufeeq A'ta Farmaey. Aameen*_ Umme Zainab