*Лукашенко: Беларус меҳнат муҳожирларини қабул қилишга тайёр* Беларус президенти Александр Лукашенко мамлакатда ишчи кучи етишмаслиги, бу муаммони ҳал қилиш учун бошқа давлатлардан ҳам одамларни ишга таклиф қилиш зарурлигини айтди. Маҳаллий ҳукуматнинг янги раҳбарлари билан учрашув чоғида у дунёнинг кўплаб мамлакатларида бўлгани каби Беларусда ҳам меҳнат ресурслари кам эканини айтган. Унинг сўзларига кўра, вазият ҳозирча унчалик оғир эмас, лекин, ҳалокат даражасига олиб боориш керак эмас. Шунинг учун Беларус биринчи навбатда собиқ иттифоқ республикаларидан меҳнат муҳожирларини таклиф қилишни таъкидлаган. Лукашенконинг таъкидлашича, ҳеч ким одамларни ишлашга таклиф қилиш учун бошқа мамлакатларга атайлаб бормайди. Белоруссияга ўзлари келмоқчи бўлганлар бор ва уларни кутиб олиш лозим. Президент, шунингдек, яқинда иш берувчилар хорижлик ишчиларга қандай муносабатда бўлиши кераклиги ҳақидаги фармон имзоланганини эслатди. Энди бирор киши муҳожирни ишга олса, унинг яшаш шароитини билиши шарт. Ишчиларнинг яшаш жойларига бориб уларнинг ҳолатини текшириш керак бўлади. Муаммолар аниқланса, уларни хабар қилиш ва ечиш чоралари кўрилади. Бундан ташқари, иш берувчидан муҳожирлар учун рус ёки беларус тилларида имтиҳон ташкил этиш талаб қилинади. Янги қоидаларга кўра, мигрант Беларусга келган пайтдан бошлаб иш берувчига у билан расмий меҳнат шартномасини тузиш учун 30 кун вақт берилади. Шу билан бирга, ходимни бошқа иш берувчига ўтказиш тақиқланади - бу қоидабузарликларнинг олдини олиш учун дейилмоқда.