من خبرتي في رحلة حفظ القرآن اللي استمرت لسنوات والحمد لله ربنا من على بإتمامه فاتعلمت عملي ايه اللي بيوقّع وايه اللي بيثبِّت الإنسان في الطريق لحد ما يوصل للختم.. على مدار سنوات وقعت وقُمت وقعت وقُمت، بس فهمت فيهم انا كنت بقع ليه ومش بكمل في الحفظ او بقصر في المراجعة.. ف انا جاية اقولكم خبرتي فقط يمكن تفيد حد في طريقه مع القرآن اللي هو أعظم وأشرف العلوم، 🌱 وبدل ما يتعلم عملي لوحده ويعيش التجارب بنفسه.. لأ ياخد خبرة من حد سبقه في الرحلة ووقع كتير، ياخد الخُلاصة ان شاء الله تنفعه.. انا كنت دايمًا اسمع إن القرآن عزيز وإنه بيتفلت بسرعة وطبعا كنت مقتنعة بالكلام ده لإنه في ديني ومن كلام نبيّي صلى الله عليه وسلم، ولكن انا عشتها عملي وتيقنتها بجد على مدار سنوات، لما كنت ادخل حلقة واسبها بعد فترة مكنتش ببقى فاهمة هو انا مشيت من الحلقة ليه مع إن في ناس اللهم بارك مكملين وممكن اكون انا حِفظي اسرع منهم مثلًا، كنت بتسائل بيني وبين نفسي ليه بقع كتير هحاول اختصر في عدة نقاط عشان البوست ميطولش.. الغلط اللي كنت بعمله يخليني مكملش هو عدم التخلية قبل التحلية يعني ايه تخلية؟ - هي ترك اي حاجة بعملها غلط تخلي قلبي وعقلي منشغل بيها، أقطع علاقتي بيني وبين المعاصي عمومًا والقلبية خاصةً لو عملت تخلية.. التحلية هتيجي لوحدها بدون مجهود كبير مني ايه هي التحلية؟ - هي كل ما يحبه الله ويرضاه من العبادات، اتسمت تحلية لإنها بتعمل حلاوة في القلب وتطهره وتخلي الشخص ايمانه عالي وعنده إقبال على ربنا سبحان الله. اول ما تخلي وتتركي هتلاقي قلبك بقى فاضي ونضيف يقدر يستقبل أي تحلية تحطيها فيه ببساطة ويُسر وقبول.. جداا - مينفعش مسلسلات وأفلام مع قرآن، بصي مهما تحاولي تظبطيهم سوا مش هتعرفي كان غيرك اشطر بجد! 😅 - ولا ينفع تتفرجي على ام ابراهيم اللي بتتكلم عن حماتها ولا ينفع تتفرجي على ام سيد اللي بتشرد سلفتها! مش هتعرفي تدخّلي القرآن وتثبتيه في قلب مليان بالحاجات دي انسي بجد! بما إني قُلت مسلسلات وأفلام مش هيجوا مع القرآن في سكة واحدة، يبقى الأغاني نظامها إيه مع القرآن! أظن واضح! - القرآن والأغاني لا يجتمعوا في قلب رجل واحد مهما الواحد عمل وحاول يظبطها يمين شمال الأمر ده سبحان الله محسوم.. قران وأغاني سوا محدش عِرف يعملها دي!.. دخّلتي أغاني في قلبك، القرآن اللي جوه هيطلع، دخلتي قرآن الأغاني هتطلع.. أمر مفروغ منه ف انتي اختاري! عايزة قلبك يكون مليان بإيه؟ - محتاجين نفكر ثواني والله في هدفنا، الإنسان اللي حابب يختم القرآن ده انسان عايش لهدف قوي وعظيم جدًا.. ف بلاش تضيعي سنوات من عمرك ف إنك تحاولي تجمعي بين حاجتين مش هيجتمعوا لو عملتي ايه! - مجالس الغيبة والنميمة بتخلي القرآن ميثبتش، كثرة اللغو في اي حاجة تافهة عمومًا بتخلي القرآن ميثبتش! نقطة ومن أول السطر - عدم الدعاء عدم الدعاااء من هنا للسنة الجاية.. من الحاجات اللي بتوقّع الانسان في طريقه، انا افتكر على مدار السنوات دول مكنتش بطلب من ربنا أصلا انه يثبّت القرآن في قلبي، ولا كنت بستعين بالله قبل كل مرة احفظ فيها كنت معتمدة على دماغي وإني سريعة الحفظ وكنت شايفة اني اقدر احفظ كم كويس في وقت قليل، لحد ما حصل المفاجأة وكان درس من ربنا ليا، إن قوة حفظي قلّت جدًا ومبقتش اركز زي الأول ده يعلمنا ايه؟ والله مهما نكون أشطر الشطار وذاكرتنا فل إن بدون توفيق ربنا وتيسيره علينا مش هنعرف نعمل شئ! احنا ولا حاجة من غير توفيق ربنا واستعانته لما كانت ذاكرتي قوية مكنش مني انا.. الموضوع إن ربنا اللي كان سامحلي وميسرلي الحفظ بسهولة فقط.. - الأذكار من الأشياء المهمة جدًا وهقولكم السبب اللي عشته بنفسي خلاني اقطع رحلتي في حفظ القرآن لمدة تقريبًا سنتين وممكن اكتر.. وده بسبب عدم التحصين {خلينا نحط قاعدة الأول إن اللي هيمشي في طريقه لحفظ القران هيكون عدو الشيطان الأكبر! والشيطان هيبقى طول الطريق بيحاول يوقعك بشتى الطُرق.. واللي عرفته من معلمتي وقتها إن مش بس الإنسان بيحسد، لا الجن كمان بيحسد..} كنت بروح معهد مع معلمة بحبها جدا جدا ربنا يحفظها ومكنتش بتحصن خالص مقصرة جدا في الأذكار ومازلت والله ربنا يهديني.. حفظت معاها من النساء للأعراف لحد ما بدأت ف نص الاعراف اقع واحدة واحدة والمعلمة تثبتني لحد ما ف مرة نمت حلمت إن المعلمة جاتلي في الحلم على هيئة شيطان بتضربني جامد وكان حلم سئ جدا خلاني اقفل من الحلقة كلها ووقتها قعدت (طبعا ده كان غلط مني اني اقعد وقلة إيمان وفَهم مني بس ده اللي حصل) ف الأذكار لازم لازم ورسالة ليا قبلكم.♥️ - من ضمن الحاجات اللي بتخلي الإنسان يقع هو الملل.. وده علاجه عن تجربة فهم القرآن قبل حفظه.. بمعنى إنك هتقعدي دلوقتي تحفظي الربع اللي عليكي أو الجزئية أيًا كانت، قبل ما تحفظي افهمي حتى لو مش هتتعمقي افهمي فقط الآيات المقصود منها إيه، ده بيخليكي تحبي كلام الله وتستشعريه ف تحبي تحفظيه وكمان الحفظ بيبقى سهل لإنك بتربطي الربع كله على بعضه بفهمك ودي نقطة مهمة جدا جدا عشان الملل ميبقاش موجود ف تسيبي الطريق - الخطة من أهم الحاجات لإن العشوائية بتخليكي مشتتة، بتبقي مش عارفة النهاردة هتراجعي ايه وازاي هل سماع او قراءة او سرد او تثبيت او تكرار مثلًا، او تفسير، ولا هتحفظي ولا هتعملي ايه! ف الخطة الأسبوعية او الشهرية بتخليكي عارفة يومك هيمشي ازاي (انا بحبّذ الخطة الأسبوعية) - إنك تحددي وقت معين في اليوم للقرآن مهم، ليه؟ لإن طبيعة الإنسان بيألف الروتين وبيبقى جزء من يومه واتعود ان الوقت ده يعمل فيه كده زي الصلاة مثلًا اللي متعود يصلي هيلاقي نفسه وقت الصلوات تلقائيًا بيقوم يتوضى ويصلي لإنه اتعود على الروتين ده، مع إن الإنسان يكره الإلتزام لكن عشان فِضل فترة يعوّد نفسه يصلي في الأوقات دي ف بقت بالنسباله زي الأكل والشرب ومش مُرهقة ليه بالعكس. - من الأخر أي حاجة هتعملّها روتين لفترة هتبقى بتتعمل بعد الفترة دي بسهوله عن الأول بكتير.. وأعظم ما يتعِمله روتين هو أي حاجة هتقربنا من ربنا والجنة ♥️ - متنساش خلِّي قبل ما تحلِّي.. ☘️ أسفة طولت عليكم، أتمنى تستفادوا ♥️ لصاحبته غفر الله لها