Hak sa Lua ei! Zogam ah Sum Demand te Mipi te'n ka pe zou non kei uh By Js Tonsing, New Lamka Kum 2 paisa akipan meitei gal suanlam in ZRO/A, CVDF, Veng sung Defence Force leh min tuamtuam zang in sum a kimat in hong kidong hi. Neih sunsun thumang tak in ana kipe zel a, lungsim khat ah "meitei gal lah dou kha ngel lou, bang a zang bei zel na hi ua" chih hun om mah leh zep thuak ut louh man in bang mah ana ki gen lou hi. Mahni deihtel na a mahni sum, anntang leh donation dangdang te nasan pia theilou in mipi te ki om hi. Tu in meitei gal hu sa hong dai deuh ta ahi ding a, Kuki Hmar gal suanlam in campaign khat hong kipan non leuleu hi. Meitei gal suanlam a sum kidong te le piak haksa isak nak lai in Kuki Hmar gal a di chi in mipi te sum tampi phutluih in ki om non hi. ZRA kum 30 val hita, tuni tan a galvan kidaih di neizoulou. Bang chidan hita? Galvan hoih leh kining ching neihlouh suanlam a Burma galmun a taisiat thil zum huai hilou hiam? Kum 30 sung a mipi sum ki la khawm te, contract work a ZRO cut, business tax, leh adang tampi sum hong lut te bang suah khin ahi ua le? Building, apartments, Farm land, Thar, fortuner suah gai uhia? Pawlpi a ki hel kha peuh mah hausa hulhul, a sawl tawl a pang thei maimai tax collector te nasan hausa hulhul, a lubok lam ten khutzung kaih theih di khop multiple buildings, khopi tuamtuam a apartments, farm land, resort nei. Mipi ten kho ul kai a nasem a hiai pawlpi heutu te building lam nang, apartment lei nang, farm land lei nang khateng a Rs 2000 piapia di mo? Solkal nasem inn kuan a khat om ziak a Rs 50,000 Kuki Hmar gal suanlam a hon demand lai un huai khaloh pen innkuan kingak na uh omsun, amau nekkhop le daih hia chih a ngaihtuah kha di uam? ..to be continued..