أدعي بإيه يوم عرفة؟ ♥️ سؤال بشوفه كتير عشان كدا حابة أشاركك بـ 8 خطوات هيساعدوك جدًا بكرة بإذن الله.. بس الأول خليني أطمنك وأقولك: ادعي بكل اللي نفسك فيه بكل تلقائية وبطريقتك العفوية نفسك تنجح وشايل هم الامتحانات والنتيجة ادعي إنك تنجح ولح في الدعاء يعني كرر الدعوة كذا مرة على قد ما تقدر - نفسك تتزوج وأمور زواجك متعسرة ادعي إن ربنا يسهلها عليك ويزوجك أو يرزقك الزوج أو الزوجة الصالحة - عندك تعب معين ادعي إن ربنا يشفيك - نفسك يبقى معاك فلوس عشان تجيب حاجة معينة ادعي إن ربنا يرزقك - بتحب أهلك اوي وخايف عليهم ادعيلهم - حالك مش عاجبك وتعبت من نفسك ادعي إن ربنا يهديك - في ذنب معين حسسك باليأس ادعي إن ربنا يخلصك منه - نفسك تجتهد والكسل مخليك واقف مكانك ادعي إن ربنا يخليك نشيط وتكره الكسل - خايف من الموت ادعي إن ربنا يحسن خاتمتك ادعي بكل اللي نفسك فيه بأي طريقة المهم إنك تاخد بالك من الحاجات دي: ١- يبقى عندك يقين إن ربنا هيستجيب دعائك ده ٢- إنك وانت بتدعي إن ربنا يرزقك بالحاجة اللي نفسك فيها دي ادعي إنها تكون في عفو وعافية. بمعنى: - متدعيش إن ربنا مثلا يرزقك بمال حلال وفير وبس لإن ممكن يجيلك فعلا ولكن يجيلك ووقتها يبقى عندك بلاء معين يمنعك إنك تتمتع بالمال ده زي ما كان نفسك.. فدايما خلي دعوة العفو والعافية ملازمة كل دعواتك. ٣- ادعي بالخير مش بالشيء نفسه لإنك لا تعلم الغيب وممكن الشيء اللي بتلح بيه ده يبقى سبب شقائك بعد ما كان دعوتك.. بمعنى: - متدعيش بشخص معين إنك تتزوجه لا ادعي إنك تتزوج بشخص صالح ولو الشخص اللي بتدعي بيه فيه الخير يرزقك بيه لو فيه الشر يصرفه عنك.. - متدعيش إنك تشتغل شغلانة معينة وبس لإنك ممكن تتعب فيها ادعي إن لو فيها الخير تجيلك لو فيها شر يعوضك عنها.. ٤- متنساش الآخرة من دعائك. صحيح الدنيا وخدانا بس احنا في الآخر كلنا لينا نهاية فادعي إن ربنا يعفو عنك إنه يرزقك الفردوس الأعلى إنه يعتقك انت وأهلك من الن*ار إنك يكتبلك حسن الخاتمة ٥- متنساش الأموات والمرضى وأصحاب البلاء (من فقد عائلته، من حرم الأطفال، من حرم الزواج، ..) ٦- متنساش تدعي لأخواتنا بالنصر والفرج العاجل. ٧- متنساش تدعي لأهلك وأصحابك ٨- حاول تلتزم بآداب الدعاء اللي فعلا تأثيرها سحري في الإجابة عن تجربة وهي: - إنك قبل الدعاء تتوضى - تتوجه للقبلة - ترفع يدك - تسبح الله ١٠ (يعني تقول سبحان الله ١٠ مرات) - تحمد الله ١٠ (الحمدلله ١٠ مرات) - تكبر ١٠ (الله أكبر ١٠ مرات) - تصلي على النبي بالصيغة الإبراهيمية (اللهم صل على محمد وعلى آل محمد كما صليت على إبراهيم وعلى آل إبراهيم، اللهم بارك على محمد وعلى آل محمد كما باركت على إبراهيم وعلى آل إبراهيم) - تبدأ الدعاء باسم الله الأعظم (يعني تقول اللهم إني أسألك باسمك الأعظم، أو اللهم إني أسألك بأنك الواحد الأحد الصمد الذي لم يلد ولم يولد ولم يكن له كفوا أحد، أو يا حي يا قيوم) لإن في خلاف ف إيه بظبط هو الاسم الأعظم - وبعد كدا تدعي بكل اللي نفسك فيه بطريقتك عادي جدا وبأسلوبك وبكل اللي في قلبك. - وتختم دعائك بالصلاة على النبي - والحمد وفي البوست اللي قبل ده على بروفايلي هتلاقي قائمة لتقسيم الدعاء عشان متنساش. وبس كدا، لا تنسوني وأهلي من صالح دعائكم بكرة إن شاء الله. - حبيبة محمد.