*ISRAEL - IRAN INBEIH NI 5-NA* _(Tehran mipui te hmun him pan turin US leh Israel-in an hriattir)_ *Phuahkhawmtu:* ~ Zoa Tlau (17.6.25 zing dar 7:30) Buannel Cabin ⭕ Nimin lama Canada-a G8 Summit neih laiin Donald Trump chuan a social media-ah 'Iran hian nuclear ralthuam a nei tur a ni lo' tih a post a! A vei ngang a niang, 'nuclear deal' an neih a ngai, a ti a. Hemi hnu lawk hian Tehran aṭangin mipui te sahimna atana chhuak turin a tih thu a post leh bawk. ⭕ Israel - Iran buaina sosâng zel avangin G8 Summit awm tluan lovin Trump hian Washington DC a pan chûk chûk a. US National Security Council chu inring turin a ti a, he hmalakna hi Iran a bei ve dawn tihna ni lovin, US venhimna (defense) lam a ni. ⭕ Iran hian missile-in Israel a bei ve leh a, airport te pawh bomb-in hmun hrang hrang a beihna hnuhnungah mi 8 velin nunna an chân niin Associated Press chuan a ziak. ⭕ Israel-in Tehran chu 'warning' a pe leh a, mipui maktaduai 10 dawn chenna khawpui hi an mangang hle. Iran thuneitute pawhin heti zat mipui hmun hima sawnchhuah hi an huphurh tih an sawi. Israel erawhin mipui 3,30,000 chenna bawr an khawih tur thu an sawi. ⭕ Tehran-a an national TV station-a live news an tihchhuah laiin Israel hian a bomb hnan a, Israel chuan he hmun hi Iran sipaiten inhumhimna atan an hmang tih an sawi nghal. Sipai te inhumna Police headquarters leh hospital pathum pawh an bomb dawn a, Gaza leh Lebanon-a mipui te pawh hmun him pan turin an ti bawk. ⭕ China chuan Israel-a an embassy hnenah Israel-Iran inbeihna a tawp mai dawn loh avangin an khua leh tui te chu Israel chhuahsan vat vat turin thupek a chhuah nghal a. Beijing thuneitute chuan Jordan lama lirtheia kal turin a ti nghe nghe. ⭕ Iranian President Masoud Pezeshkian chuan nuclear ralthuam neih an tum lo tih a sawi nawn ve leh a, Israel-in an beihna rapthlâk tak chu a do lêt zel dawn tih a sawi. Iranian 240 vel an thi tawh a, Israel 24 vel an thi tawh bawk. ⭕ Iran nuclear hmun pawimawh Natanz chu Israel-in a bomb avangin International Atomic Energy Agency, United Nations nuclear ui fing, te chuan radiological leh chemical pût avangin hlauhawm a awm theih thu an sawi. ⭕ Iranian Foreign Minister Abbas Araghchi chuan Israeli Prime Minister Benjamin Netanyahu “a war criminal” ti hialin a sawi a. Iran leh US inremna tur tibuaitu-ah a puh. ⭕ Pakistan chuan Iran nena inkalpawhna hrim hrim a dang chat vek a, thil ṭha lo zawk a thlen loh nan a invêng lawk a ni. ⭕ Hetihlai hian Israel Prime Minister Benjamin Netanyahu chuan Iran Supreme Leader Ayotollah Khameini thah an tum chu an la ṭhulh lo tih a sawi. Iranian Itelligence Chief kha Israel-in an thah theih aṭang khan Khameini hian a hlau hle a, US President Trump khan Supreme Leader thah hi a remti lo bur (vetoed) a nih kha. Israel PM erawhin Khameini an thah chuan buai zualna lam aiin, engkim a tawp zawk ang, a ti ve leh ta mauh mai. _(Israel hian van boruakah Iran chu an thuhnuaiah an dah tawh niin an insawi a, hlauh tur nei lovin Tehran an thlawh khum thei niin an insawi.)_