*#ممنوع_الإقتراب《01》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ قلت ليها أنا حلفت يا أمي العده دي ما بغسلها تلات مرات ، بناتك ديل مكسرات ولا محننات ؟ قالت لي أخواتك وينن هسي شايفاهن قاعدات ؟قلت ليها يقعدن كيف يا أمي و انتي مخلياهن يمشن و يجن على كيفهن ؟ لو كنتي بتتكلمي معاهن و بتقعديهن في علبهن ما كانوا هيكون برا البيت للزمن دا و ما كانت العده هتتردم كدا ! قالت لي البسمعك بقول لافت في شارع النيل و ما بجن إلا أنصاص الليالي !...ما ياهن في بيت ناس هويدا عشان الليله حنة بتها هند و هي عزمتنا و وقت أنا ما قدرت امشي احسن يمشن هن ، قلت ليها بناتك مخليات شغل البيت و جاريات يغسلن و ينضفن في بيوت الناس ....متأكده انو هن حالياً يا بغسلن يا بضيفن في ضيوف الناس .....قالت لي ما ياهو حال الأعراس !و انتي ماف زول منعك من المرقه براك قلت ما ماشه ....قلت ليها أنا عندي كرامه و عزة نفس ما بتخليني اقلل من نفسي و اتذل للناس ....قالت لي يا بت هوي عليك الله ما تقعدي تنقي لي في راسي ! قلتي ما ماشه الحفله و سكتنا خليناك و ماف زول جبرك على حاجه هسي الكواريك في شنو ؟....مش العده دي خليها أنا بغسلها أصلو الزول ما يرجى منك حاجه .....قلت ليها يا أمي أنا غسلتها مرتين خلال اليوم دا ولو.....قاطعتني و قالت لي ما تنقي كتير ، قلت ليك بغسلها أنا ✋ قالت كدا و مشت المطبخ عشان تغسلها و انا خالص ما لحقتها لأنها في كل مره بتعمل كدا عشان تجبرني اعمل الحاجه ، بس اتضايقت ضيق من أخواتي ، طوالي لفحت توبي ، لبستو و غطيت بيهو جزو من وشي زي ما بعمل دايماً ، بزهجتي ديك طلعت من البيت و ما قلت لأمي ماشه وين ، الساعه كانت 8 أو 9 كدا بليل ، ناس هند ديل ساكنين في الشارع القدامنا طوالي ، المهم قلت الليله بمشي انادي اخواتي و اكذب عليهم و اقول ليهم ابوي جا و بناديكم ، أصلاً ماف زول بقدر عليهن غير أبوي ، الشارع كان مليان إضاءة و مليان ناس كتيره شديد لأنو ناس هند ديل معروفين و ذاتهم ما ناس هينين ، المهم و انا ماشه كدا جيت ماره بأكتر شله وهميه و عاطله في حلتنا قليلين أدب و بحبو مشاغلة البنات زي حبهم لعطالتهم دي ، بكرههم موت شلة الرمتاله دي و الغايظني انهم ناس كبار يعني ما اعمار الطاشرات ! ديل في نهاية العشرينات و لسه بتصرفوا تصرفات المراهقين ، اول ما مريت جنبهم كدا بدوا يشاغلوا واحد منهم قال لي على وين يا جميل !....اول ما قال كدا جاني صوت ضحكة عاليه شديد لمن ركزت لقيتو دا الرمتالي الإسمو فارس داك ، كان قاعد معاهم بس ما كنت منتبه ليهو ، قال لصحبو ذوقك بيئه يا حسن ، أيوه نعم هي مغطيه جزو من وشها بس أطمنك دي زينا كدا ، أول ما قال كدا شلتو انفقعت بالضحك !....اتغظت غيظ ما عادي و أصلاً أنا من يومي بشمو و بكره اسمع اسمو ذاتو ، قلت ليهو فعلاً والله انا زيكم ! كلنا بنات في النهايه 😊 لمن قلت كدا قال لي بنات في عينك ....قلت ليهو ما ه اقول ليك و في عينك لأنو أصلاً عيونك مليانه بنات ، صحبو قال ليهو ما تكتر معاها خلينا نشوف البعدها....شوف شوف المزه الجايه علينا ديك.....كلهم إتلفتو على البت الكانت جايه علينا ، كانت لابسه لبس قصير و ضيق شديد...فارس إبتسم و قال لصحبو نحنا بنشاغل الزي ديل و عمرنا ما بنعاين للزباله الزيها.....طبعاً لمن قال كدا أنا دمي فار ، إنفعلت و قلت ليهو ماف زباله غيركم ...مالين الشوارع و عاملين لينا زحمه في البلد ...انتوا زيادة عدد ساي ، رمتاله باطلين و تافهين و ما منكم فايده ، انتوا البنات احسن منكم ، انتوا نوعية الذكور البترقدوا و اخواتهم أو أمهاتهم بصرفوا عليهم .... طبعاً لمن قلت كدا كلهم إتلفتوا علي ، فارس قام من مكانو و جاني بإندفاع ، رفع اصبعو و قال لي اتخارجي من هنا و ما تخليني اديك كف انسيك بيهو إسمك ، قلت ليهو لو راجل مد يدك دي عشان ترجع ليك مكسوره ... طبعاً جاط و غضب غضب ما عادي و حسيتو بالجد هيضربني كف إلا أصحابو مسكوهو مني و هو شغال ليهم فكوني ليها عشان أربيها ....قلت ليهو كدي ربي نفسك بالأول أنا هينه ، انفعل شديد و الغايظو إنو ما قادر يتفكى من اصحابو عشان يجيني ، واحد من شلتو الفاسده دي قال لي يا بت الناس خلاص اتخارجي من هنا فارس دا لو فيكناهو فيك اهلك ذاتم ما هيقدروا يعاينوا ليك مرتين ....ربعت يديني و قلت ليهم أساساً الوقفه معاكم ما عاجباني ، حالياً حاسه بالقرف ، المهم من اليوم و لقدام تاني ماف اي واحد منكم يرفع عينو علي أو يتكلم معاي ، احسن تحترموا نفسكم ، و لو الحصل دا اتكرر تاني صدقوني مستعده اشتكيكم و اتهمكم بتهم من الله خلقكم ما سمعتوا بيها، فارس قال ليهم تستاهلوا عشان تاني تعاينوا للزباله دي مع انها بتكون ذاتا ما مصدقه إنو لقت ليها زول اشتغل بيها و شاغلها ، قلت ليهو انت غبي ! مشاغلاتكم و تفاهتكم دي أنا بستفيد منها شنو ؟ و بعدين.....قبل ما أتم كلامي عم الماحي جا و قال خير يا شباب في شنو ؟ حسن قال ليهو ماف حاجه يا عم مشكله و اتحلت ، عم الماحي عاين لي و قال لي يا بتي انتي ليه بتحبي المشاكل دي كدا ؟ هسي وقفتك وسط الرجال دي صح ؟ قلت ليهو معليش بس ما شايفه راجل هنا ....طوالي فارس بالشده اتفكى من أصحابو و جاني بإندفاع و اول ما وصلني عم الماحي وقف في نصنا و ثبتو و قال ليهو لا لا ما كدا يا فارس ، فارس قال ليهو من قبيل ساكت ليها زح لي عشان اكفتها ، قلت ليهو يسكت حسك إن شاء الله لو راجل مد يدك علي ، عم الماحي قال لي بنهره يا بت الناس ما تتلمي ياخ و تمشي من هنا ...أصحاب فارس جوا مسكوهو تاني و هو ينبذ فيني و يصارع فيهم ، قال ليهم ياخ دي وحده وسخه ساي و عديمة موضوع و عايزا زول يحددها معاها ، عم الماحي قال ليهو ما تشتغل بيها ....قلت ليهو فعلاً لو من البدايه احترمت نفسك ما كنت هسي في الحاله دي ....قال ليهم فيكوني ليها الحيوانه دي ، اتحركت من جنبهم خطوتين و تاني رجعت و قلت ليهم على فكره منظركم و انتوا مرصوصين كدا زي قزاز البارد تحت الحيط زي الغنم الداقاها مطره ، عم الماحي قال لي بصوت عالي يااااا بت الناس ياخ !!....عاينت لفارس و شلتو بقرف كدا و مشيت منهم و خليتو بتزهج في أصحابو لأنهم مسكوهو مني .... طبعاً انبسطت شديد لأني فورت دمو ، لأنو آخر مره ذلاني قدام كميه من الناس و أحرجني و ما خلاني ارد عليهو و آخد حقي بس اليوم أخدتو و اتكيفت..... المهم وصلت بيت ناس هند ، بيتهم و شارعهم كان مليان ناس داخله و طالعه ، طبعاً الحفله كانت جوه ، الناس كلها قاشره إلا أنا داخله ليهم بتوب و هزاز كمان !...المهم بقيت أفتش على أخواتي ، أثناء ما أنا بفتش كدا جاني صوت بنده علي ، لمن إتلفت لقيتهم ديل بنات جيرانا ، وحده اسمها شروق قالت مها !!! غريبه الجابك شنو ؟ قصدي انتي ما قاعده تجي حفلات و أساساً ما بتطلعي من بيتكم ! عشان كدا مستغربه ! قلت ليها جيت انادي أخواتي بس ...اختها شيراز بتعاين لي من فوق لتحت ، أنا و هي ما بنتفق خالص و عداوتنا واضحه ، قالت ليها انتي مالك و مالها يا شروق ! تجي أو لا ما عندك بيها شغله !...ما وقفت معاهم كتير طوالي اتجهت على المطبخ و انا حاسه انو هلقى وحده من أخواتي هناك .... فعلاً أو ما دخلت لمحت ملاذ و مآب بشتغلوا! ملاذ كانت بتغسل في العده و مآب بتجهز العصير عشان تقدمو للناس ! اتغظت منهم غيظ ما عادي بس عشان المطبخ مليان نسوان ما قدرت اكورك فيهم ، طلعت برا المطبخ و انتظرت مآب لحد ما جات طالعه و هي شايله صينية العصير ، قلت ليها اصبري لي الليله ، قالت لي مالك عملت شنو أنا ؟... قلت ليها لمن نمشي البيت بوريك عملتي شنو و.....قبل ما أتم كلامي جات خالتو هويدا أم هند سلمت علي و قالت لمآب في نسوان جوا هسي جوه البرنده امشي قدمي ليهم العصير دا عليك الله ، مآب قالت ليها حاضر يا خالتو و طوالي مشت و انا من جوه محروقه ، بعد ما مشت خالتو هويدا قالت لي امك مالا ما جات ؟ قلت ليها تعبانه ، قالت لي اهااا سلامتها و مشت طوالي ، مآب لمن جات راجعه قلت ليها على فكره أبوي اتصل و قال جاي الليله و انتي براك عارفه لو ما لقاكم في البيت هيعمل شنو ، قالت لي كذابه !! قلت ليها والله لو ما مصدقه بطريقتك أنا برجع البيت و لو سألني عنكم طوالي بكلمو ، ....قالت لي خلاص دقيقه اكلم ملاذ ، دخلت كلمت ملاذ و طوالي جوا طالعين الإتنين ....ملاذ قالت لي بالجد أبوي جاي ؟قلت ليها ايوه ، قالت لي سأل عننا ؟قلت ليها ما سأل بس قال هسي جاي ، خليك من دا و شوفي مروه وين ! مآب قالت لي مروه قاعده جوه مع البنات بظبطوا في مكياجهم ، قلت ليها امشي كلميها ، ..... طبعاً مروه دي أختنا الكبيره ، بعديها أنا و بعديني ملاذ في تانيه ثانوي بعدها هيثم في سابع و مآب آخر العنقود في رابع ، المهم مآب مشت كلمت مروه و هي طوالي جات طالعه مخلوعه و بقت تسأل فيني إذا أبوي جاي بالجد ، لمن أكدت ليها كلامي طوالي جرت غسلت المكياج العلى وشها و جاتنا بإستعجال و قالت لينا اطلعوا سرعه ياخ ، لمن طلعنا الشارع لقينا العطاله ديلك جوا و قعدوا جنب بيت ناس هند عشان في بنات كتار ، عاينت ليهم بقرف و مشيت مع أخواتي .. طبعاً الحيوان داك ما كان معاهم ...شفتو من بعيد واقف ليهو مع وحده لابسه لبس أضيق من أخلاقي ، و هو طبعاً بحب العواليق الزيو ، المهم لمن وصلنا البيت و هم عرفوا اني كذبت عليهم قوموا الدنيا و ما قعدوها ، جطت معاهم و قلت ليهم بدل تمشوا و تشتغلوا للناس احسن تشتغلوا شغل بيتكم و بعدين تعالي هنا يا مروه ، هند دي قبل كدا مش شاكلتك و قالت انك شلابه و قولتك كلام ما قلتيهو ؟البوديك حنتها شنو ؟قالت لي هي اعتذرت مني و بعدين انتي مالك ، حارقه بصلتك ليييه ؟ الكلام دا قالتو لي ولا ليك ؟....ملاذ قالت لي سيد الحق راضي شن دخل القاضي !...قلت ليها اسكتي يا حبشيه أنا لسه ما اتكلمت معاك ، قالت لي ولا تتكلمي معاي ذاتو ، ما ناقصه وجع راس أنا ، أمي قالت لي والله بالغتي ! لو عارفاك ماشه تناديهن والله كنت منعتك ! هسي هويدا هتقول شنو ؟ هتقول اني رسلتك عشان تنادي أخواتك ، قلت ليها ما تقول كان قالت بتخافي منها انتي يا أمي ؟ المهم جطنا كدا و بعدها هم سكتوا و خلوني لسه جايطه و الوجعني شديد انهم بدلوا ملابسهم و ظبطوا نفسهم و رجعوا تاني ، لمن طلعوا مشيت ليهم جنب الباب و قلت ليهم امشوا يا حبشيات يا عديمات الكرامه ، طبعاً أنا بنبذهم و هم بضحكوا علي !! مآب إتلفتت علي و قالت لي يا حسوووده موتي كي ! بعدها واصلوا مشيهم و انا بعاين ليهم ساي لحد ما اختفوا من قدامي ، قفلت الباب بزهج و دخلت جوه ، أمي قالت لي لو لبستي و مشيتي لحقتيهم مالك !...قلت ليها معليش كرامتي و عزة نفسي ما بتسمح لي أنا ما زي بناتك مفقوعات المراره ديل ...قالت لي غيتو انتي ربنا يهديك بس ، المهم مسكت تلفوني و قعدت أتصفح بس من جواي محروقه و مغيوظه من أخواتي ....شويه كدا سمعت صوت الباب بعدها طوالي صوت عمتي نوره ، جات لقتنا أنا و أمي بس في المظله ، جات مع ولدها الصغير عمرو زي 6 سنوات كدا ، قال لينا باقي الناس مشوا حنة بت هويدا ولا شنو ؟ أمي هي الردت عليها و أنا غير سلمت عليها ما عملت شي ... طبعاً أنا و هي زي الشحمه و النار ، أمي قالت لي امشي جيبي ليها مويه ، عملت نفسي ما سمعت ، عمتي قالت ليها مويه من بتك دي ما بشربها ...بري إحتمال تخت لي سم فيها ....عاينت ليها بس ما رديت عليها ، قالت لأمي المهم جايه اقول ليك اني ماشه أودي عصام للدكتور ، عشان كدا خلو عمرو دا معاكم لغاية ما أرجع ....أمي قالت ليها ما عندك مشكله ....سلامتو عصام مالو ؟ قالت ليها عندو حمه من أمبارح ، وقفت على حيلها و قالت لولدها عمرو اقعد هنا لحد ما أجي راجعه و لو زول عمل ليك حاجه كلمني سمح ؟ قال ليها طيب .... طبعاً غاظتني شديد ، قلت ليها قصدك منو يعني ؟...لو خايفه عليهو سوقيهو معاك ماف زول غصبك تجيبيهو هنا ! أمي قالت لي بنهره : مها احسن تسكتي !....عمتي نوره قالت لي قاعد ليك في راسك ؟ دا بيت أخو اجي فيهو على كيفي ، أمي قالت ليها معليش يا نوره.... عاينت لي و قالت لي قومي أدخلي جوه ، قبل ما أدخل جوه قلت ل عمتي خليك عارفه ولدك دا لو قل أدبو ما تتوقعيني أسكت ليهو ، قالت لي خليهو بس يقول لي انك مديتي يدك عليهو عشان أكسرها ليك ، قبل ما افتح خشمي أمي جرتني من يدي و دخلتني الأوضه الجنب المظله و قالت لي أصبري لي الليله ، رجعت لعمتي و إعتذرت منها ، و أنا في غرفتي قربت أطق من الغضب ، أمي جات داخله و هي هايجه و شبكتني ليك كيف تتكلمي مع عمتك كدا و ترفعي صوتك عليها و و و ، عايزاها تقول إني ما عرفت أربيك ! عمتك دي أنا مش قلت ليك مية مره ما تتجادلي معاها ! ما بتحترمي الأكبر منك ليه قلت ليها براك شايفاها بتتكلم معاي كيف ، إذا هي ما إحترمتني فماف شي يخليني أحترمها ، طبعاً جاطت و هاجت شديد ، لحد لحظة وصول أخواتي للبيت هي لسه كانت ماسكه السيره و حكت ليهم ، ملاذ قالت ليها مها و عمتي نوره ديل زي بعض فخليهم يحرقوا بجازهم و ما تشتغلي بيهم ، ..... طبعاً مروه كانت ساكته ساي و بتعاين لي ، شويه كدا ناس أمي طلعوا سرايرهم برا و أمي فرشت السرير ل عمرو ولد عمتي ، قالت ليهو نوم لحد ما أمك تجي راجعه ، هيثم أخوي جا داخل و قال لي قاعده هنا براك ليه ؟ قلت ليهو عايزا أنوم هنا ، هو طلع كدا مروه جاتني و أصلاً كنت متوقعاها تجيني ، ما قعدت ، كانت واقفه و مربعه لي يدينها ! قالت لي زمان لمن كنتي انتي و عمتي تتشاكلوا أنا ما كنت بتدخل لأني عارفه إنو ماف وحده فيكم هينه و الإتنين ألسنتكم طويله ، بس هسي الوضع إختلف و انتي عارفه الحاجه دي كويس فياريت تحاولي تقللي نقاشاتك مع عمتي ، قلت ليها ليه ما بتقولي الكلام دا ليها هي ؟.....و بعدين كونو انو ولدها هيعرسك دا ما معناهو إنو الناس تسكت ليها و تتحملها ، ولدها دا ما اول ولد ولا آخر ولد ، لو انتوا مجبورين تسكتوا ليها ، فأنا ما مجبوره ، عاينت لي بزعل و مشت ، رقدت في مكاني ولا طلعت ليهم برا ......بعد مسافه كدا ، سامعه صوت عمتي نوره جات داخله ، سامعاها قالت لأمي ياخ ليه خليتيهو ينوم هسي ما بصحي لي بسهوله ! ما كان تنوميهو و انت عارفه إنو قومتو صعبه ، أمي قالت ليها ما مشكله خليهو ينوم هنا و يجيك بكرا ، قالت ليها بري عايزا راجلي يقول اني بشتت أولادي في بيوت الناس ! أمي قالت ليها لكن دا بيت خالو !....عمتي ما ردت عليها و بقت تحاول تصحي في ولدها ، أمي قالت ليها اها عصام قالوا ليك مالو ؟ قالت ليها عندو ملاريا ، أمي قالت ل عصام يا حليلك يا ولدي هسي بقيت كيف ؟ عمتي قالت ليها يبقى كيف يعني و لسه ما أديتو الدواء ، في نفسي قلت حقو الزول يطلع ليها و يسكتها ، ما بتعجبني الطريقه البتتكلم بيها مع أمي ، بس أمي ساكته و راضيه و دا الزعلني منها و منعني أطلع و أدافع عنها ، المهم بعد عمرو صحى ليها سامعاها قالت ليهو في زول شاكلك ؟ قال ليها لا ، قالت ليهو متأكد ؟ قال ليها آي يا أمي ....المهم ساقت أولادها الإتنين و طلعت و مروه و أمي قدموها لحد الباب و جوا راجعين ....بقيت بعاين للسقف و بفكر لحد ما نمت *كنت اتألم في الخفاء ، أحارب في الظلام و أبكي في الزاوية ، كنتُ أشد أزري بنفسي و اضمد جراح نفسي بنفسي لكن ما كان كل هذا الضعف و الإنكسار إلا مصدراً لكل تلك القوة 💜😴* #مها_حولي *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*