*#ممنوع_الإقتراب《02》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ تاني يوم صحيت بدري كالعاده عشان ألحق المواصلات اقرب عبايه لبستها و لفحت لي طرحه ، أمي عملت الشاي و كبت لي ، شربتو بإستعجال و اتحركت ، طبعاً نحنا ساكنين في الأزهري جنوب جامعة الرازي ، لمن مشيت مسافه بعيده شويه عن البيت فجأه جات عربيه و وقفت قدامي ، لمن سيد العربيه نزل القزاز لقيتو دا خليل جارنا لكن ما بالحيطه ، قال لي السلام عليكم كيفك ....قلت ليهو و عليكم السلام و انا ماشه ، حرك عربيتو و وقف قصادي و قال لي بسم الله يا بت الناس كدي اقيفي !في شنو !!....وقفت و قلت ليهو خير ؟ قال لي انتي طبيعي اسلوبك حاد و جاف كدا ؟...سكته ما رديت ، قال لي المهم بما انو طريقنا واحد خليني أوصلك ...قبل ما افتح خشمي جاني صوت ضحك ، لمن عاينت يميني شفت العاطل داك و معاهو إتنين من أصحابو ، كانوا عاملين نفسهم بضحكوا في حاجه بيناتهم بس متأكده بضحكوا عشان يغيظوني و يشمتوا ! مع إنو ماف حاجه بتضحك ، اول ما فتحت خشمي كدا هم ضحكوا تاني و قاطعوني ! ....خليل نزل و قال ليهم في شنو يا شباب البضحك شنو ؟ فارس قال ليهو انت مالك و مالنا سألناك هسي ؟! ...عاين لأصحابو و ضحكوا تاني ، عاينت ليهم بقرف و إتلفت على خليل و قلت ليهو شكراً ليك بمشي براي و طوالي اتحركت و ديلك ضحكوا بأعلى حس عندهم ، سبحان الله حتى ضحكهم ضحك عواره و عبيط زيهم ، سامعه واحد قال : ادوك شاكوش يا فارس ....فارس قال ليهو استاهل عشان تاني أجري ورا الزباله 😂 المهم عرفتهم شمتانين فيني و في خليل عشان حسوا إني أحرجتو ، المهم قلت ما تركزي معاهم يا مها ، مشيت الموقف و ركبت طوالي ، العربيه كانت لسه ما إتملت ، كنت قاعده جنب الشباك ، فجأه لمحت خليل سايق عربيتو و جا ماري بجنب العربيه الراكبه فيها ، عاين لي كدا و إتلفت مني و واصل طريقو ، المهم بعد حكاية 5 دقايق كدا العربيه إتملت و اتحركت ، كانوا في 3 بنات قاعدات وراي و كانوا بضحكوا بصوت واطي ، شويه كدا سمعت وحده منهم قالت : اتخيلي بس انك عرستيهو ..وااااي يا سوسو ما قادره اتخيل منظركم يوم عرسكم .....ردت ليها صحبتها و قالت ليها توووفي من خشمك انتي عويره ولا شنو ! أنا أعرس لي كمساري ! شوفيهو عامل كيف....غيتو استغفر الله بس.....التلاته ضحكوا بعدها التالته قالت ليهم خلاص خلاص اسكتوا يا بنات راجل سوسو بعاين لينا ....قصدي الكمساري😂🤣 طبعاً اتغظت منهم غيظ ما عادي ! بنات جاهلات و متخلفات خلاص! بعدها الكمساري بقى يجمع في القروش و هو بعاين ليهن ساي! مدوا ليهو القروش و هم لسه بضحكوا ! طبعاً كل الركاب بقوا مركزين معاهم و ما فاهمين ديل بضحكوا على شنو بالظبط !....شويه كدا طقطقوا و نزلوا جنب جامعة الرازي ...واضح انهم بدرسوا هناك ، لحد ما دخلوا الجامعه كنت بعاين ليهم بغيظ ، المهم بعد ربع ساعه كدا وصلنا افريقيا ....نزلت و ركبت مواصلات لحد العماره الكويتيه / شارع النيل .... طبعاً أنا مذيعه في إذاعة هلا fm , أول ما دخلت كدا أسامه قال لي دائماً في الموعد ، قلت ليهو لازم و طوالي مشيت دخلت استديو البث ، الاء جات و أدتني ورقه مكتوب فيها عنوان الحلقه و الأسئله المفروض تنطرح و المحاور المفروض نناقشها بالإضافه لتوزيع الوقت لكل متصل و الفواصل الإعلانيه ، لمن زمن البث الصوتي قرب ، أسامه جا قعد قصادي لأنو حيقدم معاي ، من غرفة التحكم أخدنا إشارة بدء البث ، بدا أسامه و قال أعزائي مستمعي إذاعة هلاfm , صبحكم الله بكل خير و عافيه ، اتمنى ليكم يوم سعيد و هادى و جميل زي جمال قلوبكم ، و صباح الخير عليك يا مها طبعاً مها حتكون زميلتي في مشوار الحلقه دي ، قلت ليهو صباح النور على كل الناس الإنضمت لمتابعتنا و أن شاء الله نقدم ليكم الجديد و المفيد ، قبل ما نتكلم عن موضوع الحلقه خلونا نسمع اللحن الصباحي و نرجع ليكم مره تانيه.... طبعاً أسامه عاين لي بغيظ لأنو لمن قال لي صباح الخير عليك ، خليت ردي يكون عام و ما رديت ليهو رد خاص بس ما بهمني كتير ... اول ما اللحن الصباحي خلص و رجعنا للبث الصوتي ، أسامه قال رجعنا ليكم مره تانيه......موضوع حلقتنا اليوم بتكلم عن الغلاء المعيشي منتظرين مداخلاتكم.......طبعاً مفروض أنا الأتكلم بعد الفاصل بس أسامه أخد دوري ! بقيت ساكته و هو بتكلم ! أصلاً أنا سكته لأنو موضوع الحلقه ما عجبني و مية مره قلت ليهم غيرو المواضيع دي لأنو في قنوات كتيره و إذاعات إتكلمت عنو ! ف ليه نعيد الحاجه مراراً و تكراراً في حين إنو في مواضيع كتيره و مهمه مفروض نناقشها ! طبعاً ناس غرفة التحكم و عبر السماعات اللاسلكية بدوا ينبهوني عشان اتكلم ...في سري قلت ليهم سكتوا لي الغياظ دا أول عشان أعرف أتكلم !....المهم فتحت خشمي و شاركت في الموضوع و استقبلت كذا إتصال بس من دون نفس ، لمن جينا لنهاية الحلقه أسامه استلم الختام و ما خلى حاجه ما قالها و بعدها طوالي أنهى الحلقه و ما خلاني أضيف حاجه ! ضايقني ضيق ما عادي بحركتو دي ، اول ما خلصنا كدا الاء معدة البرامج جات و قالت لينا مها و أسامه خير في شنو ؟!!! قلت ليها اسأليهو ! على ما اعتقد الحلقه دي شراكه بيني و بينو ! قال لي اعمل شنو إذا انتي ساكته و ما متفاعله لا معاي لا مع الحلقه ! اديتيني إحساس انك مجبوره ! الاء قالت لينا خلاص حصل خير ! بتمنى يكون في تعاون أكتر بيناتكم ، المهم الإتنين طلعنا من إستديو البث ، في بوفيه صغير كدا في مقر الإذاعة كنت ماشه ليهو بس إتذكرت إني نسيت تلفوني جوه ، طوالي رجعت و لمن وصلت أستديو البث الباب كان فاتح ف سمعت أروى مهندسة الصوت قالت ل الاء : أسامه ما غلط و البت دي ذاتا لئيمه و متعجرفه و شايفه نفسها و هي الما كانت عايزا تقدم الحلقه....شغاله بمزاجها بس ... أسامه أصلو ما غلط لمن استلم الحلقه كلها ..... طبعاً دخلت طوالي و هي إتخلعت و عرفتني سمعت كلامها ، شلت تلفوني و طلعت مشيت البوفيه و بعدو طوالي طلعت على المواصلات ، لغاية ما أصل البيت الساعه وحده جات ، لمن وصلت البيت و دخلت اتفاجأت ب هيثم راقد ! قلت غريبه مالو ما من عوايدو ينوم زي الزمن دا ! ناديت أمي بس شكلها بعيده و ما سمعتني ، لمن هيثم إتلفت علي قلت ليهو صحيتك ! مالك عيان ولا شنو ؟ قال لي مصدع ، لمن ركزت في وشو لاحظت إنو جبينو وارم ! قلت ليهو معقوله مصدع لدرجة انو جبينك يورم ! قال لي ما بهظر معاك أنا و كان زهجان شديد ، قلت ليهو طيب وريني مالك ؟ أمي جات داخله و هي شايله مويه سخنه و قطن ، قالت لي اتشاكل مع أصحابو ، قلت ليها شنووو ؟ إتلفت على هيثم و قلت ليهو اتشاكلت مع منو و السبب كان شنو ؟ قال لي اتشاكلت مع حمودي و عمرو ، قلت ليهو عمرو ولد عمتي نوره ؟ قال لي آي ، قلت ليهو يصبروا لي بس مالهم معاك ؟...قال لي لمن جينا راجعين من المدرسه مشينا الميدان و قعدنا نلعب كوره هناك لغاية ما جا حمودي و شال الكوره مننا و قال لأيمن ما بديك كورتك إلا تطلع هيثم دا من الميدان و ما تخليهو يلعب معاكم ، قلت ليهو بلعب جوا عينك ، خت الكوره و بقى يضرب فيني و أنا ساكت ليهو لكن لمن ضربني بنيه في بطني طوالي ضربتو و عمرو بقى يضربني معاهو ، بعدها عمرو مشى و خلانا أنا و حمودي لسه بنتشاكل ، مشى نادى أم حمودي و هي لمن جات كفتتني و مسكتني لولدها حمودي و هو ضربني اكتر من بنيه و لمن أمو قالت ليهو خلاص أرح البيت شال حجر و فلقني بيهو و مشى مع أمو.... طبعاً هيثم بتكلم و أنا دمي بغلي ! ما قادره استوعب !!أمي قالت ليهو ذاتو كورة شنو البتلعبوها في نص النهار يا ولدي!....قلت ليها عملتي شنو انتي يا أمي ؟....يعني مشيتي اتكلمتي مع عمتي أو شذى بخصوص الحصل ؟ زي ما كنت متوقعه قالت لي لا و ذاتو أقول شنو !...عاينت ليها بضيق و ختيت شنطتي بزهج و طلعت من الأوضه ، أمي جات لاحقاني جنب باب الشارع و قالت لي ماشه وين ؟ قلت ليها ماشه المكان الكان مفروض تمشي ليهو انتي ، ما إنتظرتها ترد و طلعت طوالي و أنا ما شايفه قدامي من شدة الغضب ، اول شي مشيت بيت عمتي نوره ضربت الباب أكتر من مره في النهايه جات فتحت لي و لمن شافتني قالت لي خير ؟!! قلت ليها ولدك عمرو وين ؟قالت لي عايزا منو شنو ؟...لمن لمحت عمرو جوا طوالي دخلت و مشيت عليهو و هو من شافني أقرب غرفه مشى دخلها و قفل الباب ، وقفت ليهو جنب باب الغرفه و قلت ليهو الليله إلا ما تطلع من الغرفه دي يا عمرو ، اقسم بالله ما أخليك ، عمتي جات هايجه و قالت هييي هييي مالك مع عمرو ! عايزا تعملي ليهو شنو يعني ؟قلت ليها خليهو يطلع عشان تعرفي ح اعمل ليهو شنو ....قالت ليهو اطلع يا عمرو نشوفها حتعمل ليك شنو..... طبعاً هو ما طلع ، قلت ليها ما حيطلع لأنو عارف نفسو عمل شنو ....ما تطلع يا عمرو لكن حق هيثم أنا ما بخليهو ....الزمن كلو كان بدافع عنك و لو شافك بتبكي ساي بشيل ليك هم و انت يا كلب تمشي تغدرو و تتفق إنت و حمودي عليهو ؟! لا و كمان مشيت ناديت شذى عشان تجي تضربو ! حمودي الوقفت معاهو ضد هيثم امبارح القريبه دي كان فالقك لمن قرب يشق ليك راسك و ياريتو شقاهو ليك ، عمتي رفعت أصبعها علي وقالت لي أحسن ليك تلمي لسانك دا عليك !قلت ليها لمن تلمي ولدك و تقعديهو في الأرض دي و تعلميهو الصح من الغلط أنا بلم لساني ، قالت لي نظام انو انتي لموك و قعدوك في الأرض و علموك الصح من الغلط !!؟ قلت ليها فعلاً دا الحصل و ياريتهم لا لموني لا علموني الصح من الغلط لأنو نحنا في زمن القوي يأكل الضعيف ما في زمن الصح و الغلط ، و انت يا عمرو ما تقول انو الغرفه دي حتحميك مني شفت لو حفرت ليك حفره و دخلت فيها ما حتسلم مني و ليك يوم يا ولد عمتي .....قلت كدا و طوالي طلعت من بيتهم و أنا بنفس درجة الغضب ، من هناك و إتوجهت على بيت الكريها الإسمها شذى ديك يلي هي أم الزفت الإسمو حمودي دا ، أثناء ما أنا ماشه على بيتها كالعاده العطاله ديلك طلعوا في وشي ! واحد منهم قال براحه براحه يا فارس حتطرشق كدا ، واحد تاني قال ليهم الله يلطف و يستر على المسكين الماشه عليهو القنبله دي ، فارس قال ليهم أنا مش قلت ليكم ما تعاينوا للزباله ! في الفتره الآخيره ذوقكم بقى معفن شديد يا اصحابي....إتلفت عليهم و قلت ليهم لحسن حظكم اني ما فاضيه ليكم ، ما ضيعت معاهم زمن و طوالي مشيت ، لمن وصلت كنت ح انفجر عديل من شدة الغضب ، و غضبي كان بزيد في كل لحظه اتذكر فيها انها كفتت هيثم و مسكتو ل ولدها عشان يضربو ، بقيت اضغط على الجرس كتير بس ماف زول فتح لي ، قلت الليله ما بتحرك من هنا إلا الباب دا يتفتح ... *التراكمات و الصمت المستمر مع الزمن حيتحول لغضب ، كل شراره كانت جواك و ما طفيتها في وقتها بمرور الأيام و التكرار حتبقى حريقه كبيره حتحرقك انت أولاً و تحرق كل الحوليك......عشان كدا دائماً بنقول ما تكتموا و فضوا كل المشاعر السلبيه في وقتها و أوعكم تنتظروا بيها بكرا ..* *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*