*#ممنوع_الإقتراب《03》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ بقيت اضغط على الجرس كتير بس ماف زول فتح لي ، قلت الليله ما بتحرك من هنا إلا الباب دا يتفتح ... فجأه كدا الباب فتح و حمودي هو الفتحو ، لمن شافني إتلبش و جرى دخل جوه ، وقفت جنب الباب و بقيت منتظره زول منهم يجيني طالع بعد ما حمودي دخل ليهم بس ماف زول طلع ،دخلت شويه ل جوه و وقفت في الحوش و بقيت أنادي على شذى ، طبعاً جات طالعه لي بعد مسافه و قالت لي أهلين اتفضلي ، قلت ليها ما جايه اتفضل ، قبل أي حاجه سؤال و جواب ، الحصل شنو بين ولدك و هيثم أخوي ؟ قالت لي اخوك دا خوف ولدي من الشارع ، يعني ما معقوله كل ما يطلع دقيقه ما يتمها يجيني داخل و يقول لي ماما هيثم ضربني !....قلت ليها برضو ما جاوبتي ! الحصل شنو بين ولدك و أخوي ؟! قالت لي هسي أنا بقول ليك في شنو يعني ؟اخوك ضرب حمودي و حمودي ضربو و خلاص ! قلت ليها يعني انتي ما رفعتي يدك عليهو و ما مسكتيهو لولدك عشان يضربو ؟....شذى خافي الله !....بتكذبي ليه ؟عشان عارفه العملتيهو غلط صح ؟ طبعاً بقيت اتكلم معاها بنبره عاليه و ما باقي لي إلا اضربها ، قالت لي وطي صوتك قايله نفسك في غابه انتي ؟ قلت ليها فعلاً دي غابه لأنو ماف قانون أو ضمير بحكمكم ، بس خليك عارفه اني ما ح أسكت والله و خلال اليوم دا حتلقي نفسك في قسم الشرطه عشان تعرفي كيف تاني تمدي يدك على أخوي و ولدك دا قولي ليهو إلا يعفن في البيت دا ، قالت لي قايله نفسك براك البتعرفي تمشي و تشتكي ؟ أنا غالبني اشتكيكم يعني ؟ قلت ليها تشتكينا تقولي شنو ؟.....داك الشارع نشوف دا قانون شنو البخلي الجاني يشتكي المجني 😊 قلت كدا و طلعت خليتها و هي بتجوط ساي ، لمن وصلت البيت لقيت أمي مقلقه واقفه جنب الباب ، قالت لي عملتي شنو ما يكون خربتي وش تاني مع عمتك و شذى ، قلت ليها عملت المفروض يتعمل و طوالي دخلت ، جات لاحقاني و قالت لي مشيت لعمتك و حكت لي بالقلتيهو ليها ! ما عيب منك يا مها ! خجلتيني قدامها !.....عاينت ليها بس و سكته ! قلت لهيثم هسي بقيت كيف ؟راسك واجعك ؟قال لي لا خف شويه ، أمي قالت لي بتكلم معاك أنا ! قولي لي قلتي شنو ل شذى بس ما يكون سمعتيها كلام شين ! قلت ليها ما سمعتها أي كلام شين يا أمي ، مشيت شربت معاها الجبنه و إعتذرت منها على العملو هيثم في ولدها و قلت ليها ما حيتكرر تاني ....قالت لي أنا ما قاعده أهظر معاك ....قلت ليها ولا أنا ، قلت كدا و طوالي مشيت دخلت أوضه تانيه و قفلتها علي عشان أمي ما تجيني تاني ، المهم بعد مسافه كدا مآب و ملاذ جوا راجعين لمن أمي حكت ليهم هم رغم أنهم دائمًا بقيفوا مع أمي إلا إنهم المره دي وقفوا ضدها ، أما أنا استحميت و صليت العصر و كنت مصره أمشي اشتكي شذى عشان تفهم اني جاده في كلامي و تاني ما تتجرأ تمد يدها على هيثم ، أثناء ما أنا بصلي كدا سمعت صوت الباب بعدها جاني صوت راجل قال السلام عليكم و صوت أمي و هي بترد عليهو بعدها ما سمعت حاجه ، المهم بعد خلصت صلاة طلعت عشان اشوف دا منو ، لمحت أمي و ملاذ و مآب لسه واقفين في الباب لمن مشيت عليهم سمعت أمي بتقول : لا لا العفو ماف كلام زي دا ، قلت ليها دا منو يا أمي و اول ما قربت شفت قاسم راجل شذى ، قال لي السلام عليكم ، قلت ليهو و عليكم السلام ، أمي قالت ليهو اتفضل يا قاسم ، قال ليها لا لا ماشي والله ، قلت ليهو دقيقه في شنو ؟ قال لي والله شذى دي حكت لي الحصل بيناتكم و نحنا ناس جيران من زمان فماف داعي ندخل في قصص المحاكم دي و أنا آسف شديد على الحصل والله ، قلت يا سلاااام تكتلو الكتيل و تمشوا في جنازتو! مرتك دي لمن رفعت يدها و ضربت هيثم ما كانت عارفه اننا جيران ؟! خليك من دا هي كيف نفسها تسمح ليها ترفع يدها و تضرب ليها طفل ! لو كنت بتعامل زيها والله ولدك ما كان سلم من يدي بس الزول بحاول قدر الإمكان ما يفضي غضبو في شافع دام في أهل ممكن يمشي و يتكلم معاهم بس لمن الأم ذاتها تدعم ولدها في الغلط و تشجعو و تشاركو في غلطو في الحاله دي نشكي الشافع دا لمنو ؟ خليك من دا دي ما أول مشكله تحصل بين حمودي و هيثم قبل كدا حصلت مشاكل أكبر من كدا وين انت من دا كلو ؟ ليه ما جيت إتكلمت إلا لمن مرتك وصلت ليك خبر اني ح اشتكيها ؟ يعني ما عندك مشكله انو ولدك و مرتك يشاكلو و يضربو بس مشكلتك كلها في قصة الشكوى دي ؟!!.....معليش بس انا عند قراري و هسي ماشه اشتكي ! قال لي معليش والله و ليك حق تزعلي و بالنسبه للمشاكل الحصلت قبل كدا كنت سامع بيها والله بس ما اتدخلت لأنو دي مشاكل شفع ، قلت هسي بتشاكلوا و بكرا برجعوا و يلعبوا مع بعض ، فعلاً الجابني لحد بيتكم قصة الشكوى دي لأني ما اتوقعت اننا نصل لحد هنا و نحنا جيران ، أمي قالت ليهو ما تشتغل بيها يا قاسم دا كلام زعل ساي ، أمي عاينت لي بطرف عينها و قالت لي خشي جوه ، قلت ليها بخش لكن هسي ح أطلع عشان أمشي أشتكي ، فعلاً لمن رجعت الأوضه فتحت الدولاب و بقيت أفتش على عبايتي و لمن لقيتها لبستها و شلت لي طرحه ، أمي جات داخله و هي متضايقه ، قالت انتي مجنونه ولا شنو ؟ قلت ليها لو الجن معناهو انك تاخد حقك و ما تسكت ف أيوه أنا مجنونه ، قالت لي شفتي ما عايزا معاك أي قلة أدب و العبايه دي زي ما طلعتيها من الدولاب ترجعيها ، قلت ليها ما برجعها يا أمي و لو انتي سكتي أنا ما بسكت ....بقت تجوط و تصرخ و شغاله لي أبقي مره أطلعي من البيت دا ، جاطت قدرتها و مشت قعدت لي جنب باب الشارع و قالت لي الله يقدرك تفتحي الباب دا...... طبعاً الدم غلى في شراييني! إنفعلت و قلت ليها ياخ على راحتك مش المشي دا ذاتو خليتو ، خليهم لمن يكتلو ليك هيثم بعدها أمشي اشتكيهم و ذاتو ما أظنك تمشي و تشتكيهم حتى لو كتلو ليك ولدك عديل ....طول عمرك بتسكتي و بتسكتينا كمان ، بقول ماف أم بترضى بجناها بس انتي خالفتي المقوله و الفطره و ....قبل ما أتم كلامي ضربتني كف و عدلتني بالتاني بس نهاي ما بكيت و أصلا ما قاعده أبكي و أظهر ضعفي للناس ، حتى لو كانوا الناس ديل أهلي.....ملاذ و مآب بقوا واقفين و منططين عيونهم ....خليتها واقفه و دخلت جوه و أنا أعصابي تلفانه ، مسكت تلفوني و إتصلت على أبوي بس ما رد علي ، دائماً لمن بنحتاجوا ما بنلقاهو معانا 💔 قعدت في السرير و كنت ح أبكي بس مسكت دموعي ، أنا ما غلطانه و ماف شي يخليني أبكي ، كوني أدافع عن حقي و حق أخواني دا ما عيب و أبداً ما ندمانه على العملتو و الكنت بعملو .....بس أمي كيف تفهم الحاجه دي !! طول عمرها ساكته و بتغصبني نحنا على السكوت و لو واحد فينا حاول يفتح خشمو بتسكتو و بتوقفو زي ما عملت معاي هسي بس أنا اتغيرت ! خرجت عن طاعتها و إتمردت على قوانينها الكانت بتكممنا بيهم ....زمان كنت زي أمي أو خليني اقول تربية أمي كانت مستوليه علينا ، كنا مهما الناس ظلمتنا و أساءت لينا ما بنتكلم و لو زول غلط علينا بدل ما هو يعتذر لينا كنا بنمشي و نعتذر منو و نطيب خاطرو... كنا بنقدم من دون ما ننتظر مقابل ، كنا عارفين إنو الناس بتستقل طيبتنا بس مع ذلك ما كنا بنمانع ....شذى دي كانت وحده من الناس الما كنا بنرفض ليها طلب ، عديل كانت بتجينا في البيت و بتقول لأمي خلي وحده من بناتك تجي تنضف معاي البيت و نحنا الأغبياء كنا بننبسط و بنتسابق لحد بيتها عشان ننضف ليها ، الوقفه الوقفتها أمي مع شذى يوم ولدت حمودي دا و رقدوها في المستشفى أخواتها ما وقفنها معاها ، نست دا كلو و اتعاملت مع أمي ب لئامه و المشكله إنو أمي لحد اللحظه بتعاملها نفس المعامله !! و أنا قاعده و سرحانه كدا مآب جاتني داخله و قالت لي أمي قالت ليك تعالي الغدا ، قلت ليها ما عايزا ، طلعت بيجاي أمي جات داخله بيجاي ، قالت لي خلي حركاتك دي و أرح اتغدي ، قلت ليها ما جعانه ، قالت لي تغلطي و لمن يعاقبوك تزعلي !....ما رديت عليها لأنو مهما اتكلمت معاها ما ح تفهمني ، قلت ليها لمن أجوع براي باكل ، طلعت و رسلت لي مآب جات داخله و ختت لي أكل ، قالت لي عامله كدا زي الملكات يجيبوا ليك الأكل لحد عندك ، ما إتكلمت معاها ، بعد مسافه كدا أكلت و روقت شويه و هديت نفسي ، بعدها أمي جات و بقت تتكلم معاي و تحاول تراضيني ، قلت ليها حصل خير و سكته ، بعدها طلعت الحوش لقيت مآب بترش فيهو و عايزا تكنسوا و بما إنو حوشنا كبير قلت ليها انتي كنسي الجزو دا و أنا بكنس الجزو داك ، ملاذ قالت لينا و أنا بعمل ليكم شاي بالنعناع ، قلنا ليها كويس و فعلاً أول ما كنسنا ملاذ جابت لينا الشاي ، قعدنا في ضل الشجره و بدينا نشرب شاي و نتونس ، أمي قالت لينا مروه دي اتأخرت وين كدي اتصلوا عليها ! قلت ليها قالت اليوم حتتأخر لأنو عندها إجتماع مع أولياء الأمور و غير كدا براك عارفه زحمة المواصلات .... طبعاً مروه أختي أستاذة لغة إنجليزية بتدرس في مدرسة أبو ذر الكوده ، و عشان المسافه بعيده بتتأخر ، أمي قالت لينا كويس إنكم نضفتوا البيت لأنو أبوكم قال جاي الليله ، قلت ليها ضرب ليك متين لأني لمن اتصلت عليهو ما رد ! قالت لي ما قبيل الصباح ، طبعاً أبوي معرس مرتين و أمي هي المره التانيه ، مرتو الأولى في بحري عندو منها ولدين و بتين ، اكبر ولد ليهو عمرو 26 سنه اسمو أحمد بعدو دانيه بعدها أمجد بعدو داليا أصغر وحده عشان كدا أبوي بكون بين البيتين ، أبوي لا مقصر مننا لا مقصر منهم بس هو بعيد كل البعد عن المشاكل البتحصل لينا دي ، دائماً بكون غايب و لو جا و حكينا ليهو بتعامل مع الموضوع بصوره عاديه زي الكأنو حكينا ليهو حاجه ما واقعيه ...في الحقيقه انا بس القاعده أشكي ليهو أما الباقين لا ، أمي دائماً بتفهمو انو كلامي كلام زعل و ماف حاجه خطيره أو كبيره حصلت عشان كدا هو ما بياخد كلامي على محمل الجد ، المهم قريب للمغرب كدا مروه جات داخله و من الباب شغاله لينا ألحقوني مويه عطشانه أنا ، مآب ملت الكوز و لحقتها بيهو شربت و جات داخله ، مآب قالت ليها ما وريتك الحصل شنو .... طبعاً مآب دي شماره و نهاي ما بتنتظر بالشمار لحد بكرا ...مروه قالت ليها اها مها عملت شنو ؟؟؟ قلت ليها العملتو عملتو عشان أخوك بس انتوا غيتو استغفر الله بس لا إحساس لا ضمير ، خليت مآب بتحكي ليها و مشيت لأمي لأنها نادتني و قالت لي امشي انتي و ملاذ و جيبوا اللبن و كمان سكر و حب شاي ، قلت ليها كويس أصلي المغرب بس ، فعلاً صليتو و بعدها لبست توب و جيت طالعه قلت لأمب ملاذ وين ؟ جات مآب و قالت لي ملاذ في الأوضه ديك ! لمن مشيت ليها هناك لقيتها بتتمسح و عامله لب قلوس كمان! طبعاً هي إلا ما تقول طالعه لازم تظبط نفسها ! قلت ليها ماشه حفله إنتي ؟ قالت لي ما بحب امشي مكان مبهدله و مبشتنه زيك ! قلت ليها أصلاً في الضلام دا زول شايفك ماف ، قالت لي بتظبط لنفسي و بعدين ما تنسي انو الشارع فيهو إناره ! قلت ليها اهاااا معناها مظبطه نفسك لأعمدة الكهربه صح ؟ ... ملاذ بطلي حركاتك دي لو لاقينا أبوي و شاف عمايلك دي حيضبحك ! قالت لي الدنيا ضلام حيشوفني كيف يعني !😏قلت ليها الشارع فيهو إناره !....أمي كوركت لينا من برا و قالت لينا أطلعن ياخ ! طبعاً ملاذ لبست أسمح عبايه عندها و بعد سلة روح طلعت معاي طول الطريق كانت مره تعاين ل المنكير العلى يدها و مره تعاين لعبايتها و تبتسم و أنا بس بعاين ليها بطرف عيني ، لمن وصلنا الدكان لقيت العاطل داك هناك ، كان بشرب سجاره و بحضر كوره في تلفزيون عوض سيد الدكان ، عوض قال ليها وين يا لوذه مختفيه ! قالت ليهو موجوده والله ، قال ليها طولت ما شفتك ولا القمر بظهر باليل ! قالت ليهو باااااس دا الحاصل و قاطعتها و قلت ليهو بحده عوض أديني لبن و سكر و حب شاي سرعه !....فجأه سمعت ملاذ قالت فارس كيفك ! نططت عيوني طبعاً و حمرت ليها ...قال ليها أهلين و إبتسم ليها ! قلت ليها مش أمي قالت ليك ما تتكلمي مع زول ما بتعرفيهو ! .... طبعاً قاصده أسمعو ....قالت لي دا فارس ولد. .قاطعتها و قلت ليها معليش ما بعرف أشكال زي دي ! طبعاً هي شغاله لي حرام عليك و عوض يضحك ساي ! قال لي انتي فارس دا ما بتطيقيهو مالك ؟!! قلت ليهو دا اسم شوال وساخه جديد ولا اسم عربية نفايات !!!؟ سكت و بقى يعاين ل الزفت داك ... طبعاً أنا مدياهو ضهري و ما شايفه ردة فعلو شنو ، عوض خت لي حاجات في كيس ، بس كان بعاين وراي و هو مادي لي الباقي ، شلتو منو و إتلفت وراي لمن حسيت في زول واقف !لقيت دا الكريه داك لمن خلعني ! أخد نفس من السجاره و نفخو لي في وشي لمن قحيت ! لزيتو و قلت ليهو اوعك تقرب مني ....قال لي محسساني اني كاتل نفسي عشان اقرب منك! يا بت الناس انتي ماف زول شايلك من ارضك فما تقعدي تتوسي ساي ! لو أنا شوال وساخه ف انتي مكب نفايات ! عارفه اني شفقان عليك !!! مسكينه عشان ماف زول شغال بيك بتحاولي تلفتي الأنظار ، قلت ليهو خيالك واسع ! طيب نفترض اني عايزا ألفت الأنظار ....صدقني انت آخر واحد ح أفكر ألفت نظرو....شنو آخر واحد أساساً ما ح أفكر ألفت نظر واحد زيك ، قال لي لاقيه زيي وين ؟ انتي لا لامه في الزيي لا لامه في الأحسن مني انتي زي الهوامش البكتبها الواحد لمن يحاول يشوف القلم شغال ولا لا عرفتي !!...بعدين أنا متين قلت إنك عايزا تلفتي. نظري ! للدرجه دي أنا عامل ليك هوس!... طبعاً بتكلم معاي و هو بقرب مني و أنا لا طايقاهو لا طايقه ريحة سجايرو دي ! لزيتو للمره التانيه و قلت ليهو أحسن تحترم نفسك يا زباله !... طبعاً لمن قلت ليهو كدا عيونو زاد حمارها ، ملاذ قالت لي بصوت واطي عيب يا مها ، عوض طوالي جا إتدخل و قال ل فارس تعال تعال و مشى قعدو في سريرو و قال ل ملاذ سوقي أختك و امشوا قبل ما جنو يقوم عليهو ، شلنا حاجاتنا و طلعنا و أنا كلامو لسه واجعني جوه قلبي و ملاذ الطريق كلو تلوم فيني ، نهرتها و قلت ليها ياخ أسكتي مني ....لمن وصلنا البيت لقينا أبوي جا و ملاذ طوالي مسحت أي حاجه في وشها حتى مشت سلمت عليهو.....قال لي لقيت لقيت مكالمه منك ! قلت ليهو آي اتصلت قبيل و أكيد مآب بتكون قالت ليك الحصل ، قال لي آيي كلمتني و هسي بمشي اتكلم مع قاسم .... طبعاً دي كانت أول مره ياخد الموضوع على محمل الجد ولا يمكن عشان الموضوع بتعلق ب هيثم عشان كدا اتدخل!! فعلاً بعد إرتاح شويه مشى لقاسم راجل شذى رغم انو أمي حاولت تمنعو ، لمن جا راجع قال لينا اتكلمت معاهو و حذرتو و أكد لي إنو الحصل ما ح يتعاد تاني ....أنا انبسطت و في نفس الوقت كنت زعلانه و شايله في قلبي ....ايوه مبسوطه انو أبوي جا و مشى اتكلم معاهم و وراهم اننا ما برانا و معانا راجل بس في نفس الوقت زعلت بسبب انو أبوي لو ما هيثم المتعوق ما كان اتكلم ! قبل كدا حصل موقف مشابه ل مآب بس أبوي ما قال شي 💔 أمي غدتو و مروه جهزت ليهو الشاي و كلهم إتلموا حوليهو و قعدوا يتونسوا معاهو إلا أنا صليت العشا بس و دخلت جوه مسكت تلفوني و بقيت أتصفح في الفيس لغاية ما ظهر لي بوست للعاطل داك في قروب كيان ، كان منزل صورتو و كاتب : أنا مدمر قلب كل أنثى ، طبعاً البنات شغالات انبراش فيهو ! غبيات و ما عندهم موضوع ، عجبني تعليق واحد كان كاتب ليهو : يعني دا إنجاز ليك !! الواحد تلقاهو همو الوحيد في الحياة دي انو تجي بت و تحت ليهو في كومنت : "وااااااي انا من سماحتك أو ولد زي صباح العيد " ارجل شويه يا جنى ... طبعاً الكومنت حقو كيفني و ضحكني عملت عليهو أدعمني و قلت ليهو كلامك صح والله 🤣 🤣🤣 رد لي و قال لي ملونا فقر والله ....الفيس بقى كلو عواليق "..قلت ليهو اعذرو بكون عاطل و ما لاقي حاجه تشغلوا عشان كدا لجأ للبنات عشان يشغلنوا 🤣🤣🤣 قال لي إلا كدا 🤣🤣 المهم الولد بقى يرد علي و أرد عليهو و جوا كم واحد كدا أيدونا في كلامنا و أنا متكيفه شديد من الكلام الإنقال عن العاطل فارس ، اتوقعتو يجي يردح بس شكلو الكلام علبو ، بعد ربع ساعه كدا رفع صوره تانيه و كتب عليها : الواحده تلقاها ميته فيك و متتبعاك في الواقع و المواقع و عامله روحها تقيله......هههه اتقلي ساي زول شغال بيك ماف ي زباله 🤣🤣 طبعاً عرفتو قاصدني و المره دي اظنو كلم أصحابو لأنهم كلهم جوا و إنكبوا في البوست و بقوا يطبلوا ليهو و البنات ما قصروا اتدردقوا كدا لمن وسخوا سمعتهم و ملابسهم 🙂 دخلت القروب و كتبت : الرجال خلوا المطاعنه بالسيوف و بقوا يطاعنوا بالبوستات ... طبعاً البوست محتاج موافقه من الأمن ، انتظرت زي 5 دقايق بس ما وافقوا لي عليهو ، دخلت على واحد من أدمنز القروب و طلبت منو إنو يوافق علي البوست ، ردي لي بعد مسافه و قال لي ثواني أشوفو ، مشى شافو و جا قال لي معليش ما بنقبل بوستات زي دي ، قلت ليهو البوست ما فيهو حاجه ياخ !....المهم حنستو لغاية ما قبلو ، عدت زي 6 دقايق كدا ماف زول علق تقول العاطل داك مشتري القروب و ناسو !!....بعدها أمي نادتني ، ختيت التلفون و مشيت ليها ، قالت لي قاعده جوه براك بتسوي في شنو ؟ قلت ليها بفسبك ! أبوي قال لي خلي التلفون دا و أقعدي مع الناس ....قعدت و بقيت ساكته و هم بتونسوا ساي بس ونستهم عجبتني رغم سكوتي ، المهم لمن 11 جات مآب و هيثم أصلا كانوا نايمين ، قلت ليهم أنا نعست و فعلاً كنت ماشه أنوم و لمن دخلت لقيت تلفوني في السرير اتذكرت البوست ....قلت امشي امسحو عشان ماف زول عبرني بس لمن دخلت الفيس اتفاجأت بكميه من الإشعارات لمن إتخلعت!! قلت دا شنو دا ؟!!! دخلت شفت البوست لقيت التفاعل عليهو ب 700 و الكومنتات أكتر! استغربت طبعاً و إستعجلت عشان اقرا الكومنتات و ياريتني ما قريتها !! جوانا حاجات كتيره مكتومه و متسترين عليها ، لا قادرين تتجاوزها و ننساها لا قادرين محكيها و نفضفضها ، مرات كتيره هي بتغلبني و بتظهر فيني في هيأة عصبيه مفرطه أو ملل أو حزن أو إكتئاب *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*