*#ممنوع_الإقتراب《04》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ دخلت شفت البوست لقيت التفاعل عليهو ب 700 و الكومنتات أكتر! استغربت طبعاً و إستعجلت عشان اقرا الكومنتات و ياريتني ما قريتها !! اتردمت ردم زي الردم !....قلت بسم الله في شنو !! بديت اقرا في التعليقات ، في واحد كاتب يخوانا دي البت بتاعة الإحتواء ذاتا 🤣🤣 طبعاً باقي الكومنتات كلها كانت بالشكل دا ، واحد كتبت لي انتي قاصده بوستات ولا بوسات !!..... طبعاً اتمليت و اتضايقت ضيق ما عادي و فارس و أصحابو مالين البوست ضحك و سخره و تعليقات تافهه ما قدرت أقرأها ، طوالي حذفت البوست و أنا عايزا أطرشق من الزعل ....أنا شكلي نسيت القصه ديك بس الناس ما نستها .....أحكي ليكم عني شويه ، بحكم اني زوله بتتفعل و بتضايق بسرعه كنت بحتاج أفضي غضبي دا في حاجه ف كنت بكتب بوستات طوليه عريضه في القروبات و الكلام بكون زي السم .....يعني مثلاً حصل لي موقف مع راجل و ضايقني بجي اكتب الموقف في القروب و بشتم الراجل و بتكلم كلام زي النار الرجال الزيو ف معظم الناس كانت شايفه اني إنسانه مثيره للجدل و عديمة موضوع بس ....بقيت معروفه في كل القروبات و إلا ما انزل بوست بلقى الناس إتلمت فيهو عشان تتجادل معاي ، مره كان في قصه لافه حولين وحده كتبت إستشاره في قروب نسوان و قالت إنو راجلها ما ديها حقوقها و هي بتخجل تطلب منو كدا فقالت ليهم وروني اعمل شنو ! طبعاً مع انها استشاره عاديه بس انتشرت انتشار كبير في نفس الوقت برضو كانت في قصه لوحده قالت إنو راجلها بتعامل معاها برسميه و لمن يزعلها ما بجي يراضيها بالعكس هي البتمشي و تعتذر ليهو لأنها بتحبو و قالت كلام كتير كتير عن علاقتها براجلها ما كان مفروض تتقال و في النهايه قالت انو هو ما مقصر و أي حاجه عايزاها بجيبها ليها بس علاقتو بيها رسميه .....أنا أصلاً يومتها كنت قاطعه موضوع و قعدت أفكر في قصة البت التانيه ، عدم موضوع مني كتبت في صفحتي : بالنسبه لقصة البت الحايمه الأيام دي يعني بالجد في بنات ما بتهمهم الماديات كل العايزنوا راجل يفهمهم و يقدر يحتويهم ، هم ما عايزين دهب و قروش هم بس عايزين عطف و حنان و إحتواء . طبعاً بالبوست دا انا كنت قاصده البت التانيه ما الأولى ، يومتها إتخلعت بالكومنتات نفسي خلعتي الهسي دي ، في ظرف ربع ساعه البوست حقي إتملى تعليقات مقرفه من البنات و الأولاد ....هم افتكروا اني بتكلم عن البت الأولى ديك ف بدوا يقولوا لي كلام تافهه و حقير شديد ....زي :"انتي ذاتك لو عايزا إحتواء أنا ما بقصر منك " و "رأيك شنو تجيني عشان أعلمك الإحتواء على أصولو " و غيرها كتير من التعليقات المقرفه الخلتني احذف البوست بس للأسف ناس كتيره كانت عامله اسكرين شوت البوست بتاعي و حايمه بيهو في القروبات ، ضحكوا و إتريقوا قدرتهم و فسروا البوست بطريقه قذره شديد ، بعدها بقيت كل ما انزل بوست يجيبوا لي نفس السيره و كلكم عارفين عباطة السودانيين ....ايوه مرات كتيره كومنتاتهم بتفور دي بس دا ما سكتني و أي موقف أشوفو في الشارع العام بجي اطرحوا و اتكلم عنو...... طبعاً الحاجه دي جابت كانت بتجيب لي الردم بس الحاجه الما إتوقعتها انو بوستاتي دي تتيح لي فرصه عشان تشتغل في إذاعة هلا ....الاء معدة البرامج وحده من الناس الكانت بتتابع بوستاتي و بعد آخر بوست و الضجه العملها هي رسلت لي في الخاص ....ما كنت بعرفها رديت ليها عادي بعدها طوالي فتحت لي الموضوع و قالت لي رأيك شنو تشتغلي معانا في إذاعة هلا ؟ طبعاً الوقت داك كنت متخرجه لي شهرين ، أنا أصلاً قاريه إعلام ، ما وافقت طوالي لأني استغربت! قلت ليها شنو ؟ ليه يعني أنا تحديداً ؟؟ قالت لي ما عارفه بس حسيت انو عندك قدره على مناقشة قضايا مهمه و قادره توصلي معلوماتك بغض النظر عن هل عجبت الناس أو لا و الحلو فيك انك ما شغاله بزول رغم الردم البتتعرضي ليهو ، قلت ليها تمام بفكر و بديك خبر.... طبعاً فهمت إنو الممنوع مرغوب و دائماً الناس البتكون مثيره للجدل هي البتكون مرغوبه في العمل و بكون عندهم فرص أكتر ....معروفه يعني كل الناس البتقدم محتوى فارغ و عديمة موضوع و هدف بنلقاهم متصدرين التريندات و مرغوبين أكتر سواء من قبل الشركات الإعلانيه أو الدراميه ، ايوه انا محتواي ما فارغ بس كنت مثيره للجدل و بتكلم قدر ما أقدر و كلامي كان نار بس و ما بتلفت خالص و ما براعي لأي زول و أنا بكتب في البوست ، من دون تردد بنزلو العجبو عجبو و الما عجبو على كيفو..... طبعاً بعد حذفت البوست طلعت من الفيس و أنا واصله الحد من الضيق و الزعل ، مروه جات داخله و قالت لي خير مالك متشاكله مع إبليس ولا شنو ؟ قلت ليها ديل أكعب من إبليس ذاتو ...قالت لي منو ديل ؟... طبعاً كنت قاصده العاطل داك و أصحابو رقدت بس و أنا بتزهج ، المهم تاني يوم ما كان عندي شغل ، بشتغل سبت و أحد و ثلاثاء و اليوم الإثنين ما عندي ، أمي قالت لي بما انك اليوم قاعده معناها تمشي معاي لمرة أبوك لأنها عيانه ! قلت ليها مرقده في المستشفى ؟ قالت لي لا ! قلت ليها معناها كويسه ، عادي كلنا بنمرض و ياهو ماشين و بعدين هل هي حصل مره جاتنا لمن واحد فينا يمرض ؟ قالت لي حسب كلام أبوك هي تعبانه شديد ، لازم نمشي ليها ، شينه في حقنا لو ما مشينا ، أبوي جا داخل و قال ليها انتظروا ديلك لمن يجوا من المدرسه و أسوقكم كلكم و أوديكم ، طبعاً ما قدرت أقول لا قدام أبوي ... المهم أمي عملت الفطور و أنا غسلت العده ، ما تمينا ساعه كدا عمتي نوره جات داخله ، سلمت و قعدت تتونس مع أبوي و سألتو عن مرتو بقت كيف و أولادو التانيين قال ليها احسن شويه و الليله سايق الأولاد و موديهم ليهم ، قالت ليهو كويس على الأقل ياخدوا ليهم خشم خشمين مع أخوانهم و يعرفوا أحوالهم ، عاينت لي و قالت لي امشي جيبي لي مويه يا مها .... طبعاً هي عارفاني قدام أبوي ما بقدر أتلائم معاها ، عن سكات مشيت جبت ليها مويه ، قالت لي مالا سخنه كدا ؟؟ هاك ختي ليها فيها تلج ، شلتها منها بزهج و مشيت رميت ليها فيها مكعبات تلج و جبتها ليها ، المهم قعدوا يتونسوا كدا لغاية ما هيثم جا راجع من المدرسه ، عمتي لمن شافتو قالت ليهو كر علي يا ولدي ما قايله حمودي دا عوك كدا ، الله يجازي محنو ، قلت ليها ما حمودي براهو ولدك ذاتو ضرب هيثم و مشى نادى شذى و هي كمان ما قصرت و ضربتو ....قالت لي بري والله ما قايلاهو اتعوق كدا و عمرو أنا ضربتو و ما سكته ليهو ، قربت اقول ليها بطلي استهبال بس سكته ، أبوي قال ليها عمرو ما مشكله ما في النهايه هو ولد عمتو لكن الكلام ولد الناس داك البضرب و بتجي أمو تضرب معاهو ، عمتي قالت لي سكتي ليهم ولا بس بتجيني أنا و بتجوطي فيني ؟؟؟ طبعاً هي قاصده تقول كدا قدام أبوي أبوي ما علق على كلامها مع اني ما قاعده اشاكلها قدامو بس هو عارف بتو و عارف أختو كويس و على قول مروه نحنا الإتنين ألسنتنا طويله ، قلت ليها أسكت ليهم ؟أكيد لا و كنت ماشه اشتكيهم بس أمي ما خلتني ....أمي قالت لي الراجل جا و إعتذر مننا و قال ماف داعي ندخل في قصص الشكاوي دي و كلامو صحيح .....عمتي قالت ليها غيتو انتي ....المهم خليتهم بتونسوا و مشيت عملت ليهم الجبنه ، على بال ما أكبها مآب جات داخله ما تمت 5 دقايق ملاذ ذاتها جات ، أبوي كلمهم و طلب منهم يجهزوا ، فعلاً جهزوا و أنا جهزت بعد ما شربتهم الجبنه و غسلت العده ، عمتي نوره قالت لينا بعد دا أنا ح أمشي عمرو و عصام بكونوا جوا من المدرسه ، المهم هي طلعت بيجاي و نحنا قفلنا البيت و طلعنا مع أبوي ، طبعاً عربيتو بوكسي ، ملاذ و مآب و هيثم ركبوا في صندوق البوكسي و أنا و أمي ركبنا جوه ....المهم طول الطريق كنت بفسبك ساي ، طبعاً اتصلنا على مروه و كلمناها اننا حنمشي و انو اذا طلعت بدري تجينا هناك ، المهم وصلنا بيتهم ، لمن دخلنا لقينا معاهم خالاتهم ، طبعاً من دخلنا يعاينوا لينا ساي و أنا أصلاً الجيه دي ما عاجباني ، سلمنا عليهم و قعدنا ، شويه كدا نهله مرة أبوي جات سلمت علينا و قعدت ، داليا ضيفتنا و مسكت مآب و بقت تتونس معاها .... طبعاً هي بتحب مآب حب ما عادي و مآب برضو بتحبها بنفس الطريقه ، المهم بعد ربع ساعه كدا خالاتهم استأذنوا و مشوا ، أبوي مشى الصالون و قعد هناك ، كل الناس دي بدت تتونس مع بعض إلا أنا ساكته ، داليا قالت لي مها كيف عامله مع الشغل ؟ قلت ليها تمام الحمدلله و انتي ؟ قالت لي تمام التمام ، طبعاً هي شغاله كول سنتر في شركة زين ، و دانيه دي بتقرا مختبرات آخر سنه في الرباط ، المهم بعدها ما اتكلمت تاني بقيت ماسكه التلفون و مندمجه معاهو لحد ما فجأه كدا اتخطف مني !لمن رفعت راسي لقيتو دا أمجد ! قال لي عايزك يوم واحد بس تفكي التلفون دا و تتونسي مع الناس ، أمي قالت ليهو دا حالها حتى في البيت ، مد يدو سلم علي و مشى سلم على أمي و أخواني ، طبعاً بسلم عليهم و هو لسه شايل تلفوني ! قلت ليهو أمجد عايزا تلفوني ! قال لي ابيت يا زوله و طوالي مشى بيهو الصالون سلم على أبوي و جا راجع عشان يتونس مع ناس أمي بس ما جاب معاهو التلفون ، قلت ليهو تلفوني وين ؟ قال لي ما عارف يا زوله و طوالي بدا يتكلم مع أمي و أنا اتضايقت شديد من حركتو دي ، قمت من مكاني و مشيت الصالون لقيت أبوي عايز نوم قال لي عايزا حاجه ؟ قلت ليهو أمجد شال تلفوني و دخل بيهو هنا و ما رجعو لي ! قال لي شالو منك ليه و طوالي نادى أمجد لمن جا أبوي قال ليهو رجع ليها تلفونها ! طبعاً مآب جات معاهو عشان تتشمر ، أمجد رفع المخده و أداني التلفون و قال لأبوي كنت عايزها تفك التلفون دا شويه و تتونس مع الناس بس واضح انو انت و بتك اتفقتوا علي ، طبعاً قال كلامو دا و هو بضحك ، أبوي قال لينا بعد دا ما عايز أي إزعاج ، امشوا من هنا ، المهم رجعنا ليهم و أنا من جيت داخله مرة أبوي بتعاين لي ساي ، مآب كانت بتضحك و بتكاوي في أمجد و بتقول ليهو حيييييا أنا أبوي هرشك و خلاك ترجع ليها تلفونها و هو بضحك و بقول ليها اصبري لي يا مآب ، مرة أبوي قالت لأمجد بنبره حاده : انت حركات الشفع دي حتخليها متين ؟ في داعي هسي تشيل منها تلفونها و هي تمشي تشتكيك لأبوك زي الشافع ؟ طبعاً عرفت المزعلها شنو ، أمجد قال ليها عاذرها هي شافعه عشان كدا 😂 أمي حمرت لي و قالت لي ما تكوني عويره كدا ! شافعه انتي عشان تمشي تشتكي أخوك لأبوك في موضوع بسيط زي دا ؟؟ قلت ليها أنا ما مشيت عشان اشتكيهو كل الحصل انو أبوي سألني و أنا وريتو 😊 قلت الكلام دا و عاينت ل نهله مرة أبوي ، المهم أمجد بقى يونسنا و كل دقيقتين يقول لي مش كدا يا مها !؟ نظام يدخلني معاهم في ونستهم ، المهم لمن العصر أذن أني طلعت صلت و جات راجعه و قالت ل مآب شوفي ابوك دا لو صاحي قولي ليهو نمشي بعد دا مآب قالت ليها كويس ، أنا و ملاذ طلعنا برا اتوضينا و رجعنا نصلي العصر ، أبوي جا لأمي و قال ليها نمشي بعد الغدا ، نهله قالت لينا اي اقعدوا اتغدوا مع انها قبيل سكتت و ما قالت حاجه لمن أمي كلمت مآب تكلم أبوي ، قلت ليها لا لا بنتغدى في البيت ، أمجد قال لي أسكتي انتي ماف زول سألك ، و ضربني ضربه خفيفه على راسي ، المهم سمعنا كلام أبوي و قعدنا اتغدينا ، قبل ما نطلع أحمد جا داخل و مآب و هيثم طوالي جروا عليهو ، سلم عليهم سلام شوق و قال ليهم مشتاقين والله ، ملاذ قالت ليهو لو مشتاق كنت جيتنا في البيت ، قال ليها معليش والله بس انشغلت ، المهم جا سلم علينا و سألنا عن مروه ، طبعاً أنا و هو ماف تعامل كتير بيناتنا هو عكس أمجد ، يعني أمجد حتى لو أنا ما اتسايرت معاهو و ما هظرتو بهاظر معاي و بالغصب بخليني اتكلم معاهو ، أما أحمد ماف بينا غير السلام ، علاقتو كويسه مع أخواتي كلهم إلا أنا يمكن لأنهم دائماً بتصلوا عليهو و بسألوا عنو و لو وحده فيهم حصلت ليها حاجه من دون تردد بتتصل على أحمد أو أمجد أما أنا أي مشكله بقول بحلها براي من دون ما ألجأ لزول ... المهم قيلنا معاهم و رجعنا البيت مع أبوي لقينا مروه جات ، لمن بقينا أنا و أمي براي قلت ليها هسي حالتها دي حالة زول عيان ؟ متأكده انو حركات منها ساي عشان تثبت لأبوي انو نحنا كعبين و ما قاعدين نمشي ليها ، قالت لي هوووس أبوك ما يسمعك و بعدين انتي بتعلمي بالغيب ! اي هي عيانه و مع ذلك جات و قعدت إتونست معانا ....سكته خليتها و مشيت... *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*