*#ممنوع_الإقتراب《05》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ تاني يوم طلعت بدري ك عادتي ، و أنا ماشه في الشارع شفت العاطل داك طال ليهو من بيت معروف إنو مهجور من زمان ، طلع هو و وراهو طوالي طلعت بت! طبعاً الحاجه دي ما جديده عليهو ، كذا مره شفتو طالع و داخل في البيت دا مع بنات ، عشان كدا أنا بكرهو و بستحقرو ، صراحة شوفتهم طممت لي بطني ، استغفرت و واصلت طريقي ، لمن وصلت مقر الإذاعه الاء قالت لي مفروض نيرمين تقدم معاك حلقة اليوم و هي لحد اللحظه ما جات و بنتصل عليها ما بترد عشان كدا أبدي الحلقه طوالي ....قلت ليها تمام ...المهم دخلت و لمن بدت الحلقه صبحت على المستمعين و بعد اللحن الصباحي ذكرتهم بعنوان حلقتنا البتكلم عن كيفية التعامل مع الشخصيه النرجسيه ، إستقبلت كميه من الإتصالات ، وحده من المتصلين قالت : الشخصيه النرجسيه دي أكعب شخصيه و انا عانيت شديد منها لأنو الشخصيه دي كانت بتتجسد في خطيبي ، كان أناني لدرجه بعيده ، كنت بصبر نفسي و بقول يمكن يتغير مع الأيام بس كل يوم ببقى أسوأ من اليوم القبليهو و انا الخليتو يتمادى في الأنانيه لكن كل مره كنت بعتذر منو لمن يغلط و برجع اتكلم معاهو عادي ، قلت ليها طيب عملتي شنو ؟ قالت لي قعدت مع نفسي و سألتها هل هي مستعده تكمل باقي حياتها مع الإنسان دا !.....الجواب كان لا .... ايوه تقبل عيوب بعض من ضمن شروط الحب بس دا ما كان عيب ممكن يتغير مع الزمن أو ممكن نقدر نتعايش معاه ، النرجسيه كانت صفه من صفاتو و مستحيل يتغير ، المهم في النهايه عرفت إنو الحب ما كل حاجه ، علاقتي بخطيبي أخدت مني أكتر من ما أدتني فلمن تعبت وقفت الحاصل و نهيت البينا ، قلت ليها زي ما قلتي الحب ما كل شي ، شكراً ليك يا سمر على مداخلتك ، قال لي العفو....... المهم بعدها طوالي جاتنا مداخله ، قلت آلو السلام عليكم ، قال لي و عليكم السلام ، معاك ود جنوب الحزام ، قلت ليها يا مراحب بس مع ذكرت اسمك ! قال لي ما ضروري المهم يا أصليه المره الجايه اتكلمي لينا عن الشخصيه المتعجرفه و بتاعة المشاكل و المغروره لأنو نحنا صراحة في حلتنا بنعاني من كائنه بالمواصفات دي ....بعدها جاني صوت ضحك جماعي و فهمت لحظتها انو ديل شلة فارس لأنو الصوت ما كان غريب علي ، فصلنا المكالمه و استقبلنا بعدها آخر اتصال من إبتسام حسين الطبيبه النفسيه ، بعد ما رحبت بيها قلت ليها طبعاً يا دكتوره عارفه موضوع حلقتنا بتكلم عن شنو ، قالت لي ايوه كنت متابعه ، صراحة التعامل مع الشخصيه النرجسيه محتاج صبر و طولة بال و أهم حاجه لازم لازم كل واحد في حياتو شخصيه نرجسيه يعرف النقاط دي و يطبقها ، ح أقولها ليكم بإختصار : 1- ما تخاف من الشخصيه النرجسيه لأنها بتستمد قوتها من ضعف الآخرين 2-إياك تتجادل مع شخصيه نرجسيه لأنهم. ما حيقتنعوا بكلامك و لو اقتنعوا مستحيل يعترفوا لأنهم متكبرين و شايفين نفسهم أحسن من غيرهم 3-لو اضطريت تتناقش مع نرجسي ما تكون عدواني لأنهم جاهزين للمشاكل و أي نقاش يحصل بينهم و بين غيرهم بكونوا حريصين انهم اليكسبوا النقاش دا بأي طريقه لدرجة انو عادي يشكوك في نفسك و يخلوك تشوف الغلط صح 4-لو علاقتك بتربط علاقه قويه بالشخص النرجسي دا و صعب عليك تسيبو ممكن تهددوا بإنو لو ما بكل حركاتو النرجسيه دي حتسيبو و تنهي البينكم ، بس انا شايفه إنو الأفضل تحاول معاهو بهداوه و تخليهو يمشي يقابل طبيب نفسي لأنو مرض إضطراب الشخصيه النرجسيه ما حاجه عينه 5_ آخر حاجه و هي انك تمشي .....ايوه تمشي و تكون بعيد كل البعد عن أي شخصيه نرجسيه لأنو التعامل معاهم صعب ....المهم الكلام كتير يا مها بس نظرا لضيق الزمن اختصرت الكلام ، قلت ليها فعلاً الزمن ضيق ح نحاول لقدام نزيد الزمن أو نعمل برنامج مختص بمناقشة الإضرابات الزي دي ، قالت لي أحسن شي و متى ما إحتجتوني ح أكون معاكم و أن شاء الله الناس تستفيد من النقاط دي و تطبقها ، قلت ليها أن شاء الله شكراً ليك دكتوره إبتسام حسين الشاذلي ، ما قصرتي ، قال لي العفو......في الختام حابه اقول إنو الحاجه الوحيده المفروض انت تسعى ليها هي سلامك النفسي ، ما تخلي لا شخصيه نرجسيه لا غيرها يعكرو صفو مزاجك و يضايقوك ، انت أبداً ما مجبور تتحمل الإضراب دا و ل الناس المجبورين يتعاملوا مع النرجسي النقاط الذكرتها دكتوره إبتسام ممكن تفيدكم ....بكدا بنكون وصلنا لنهاية الحلقه و يا رب أكون وفقت في تقديمها إلى جديد اللقاء كونوا في أمان الله .....لمن خلصت ولاء جات قالت لي حلقه موفقه شديد يا مها ....المهم طلعنا برا و إتكلمت معاها شويه و طلعت من مقر الإذاعة ، طبعاً ما ناسيه العواليق الإتصلوا قبيل ديلك و عارفاهم قاصديني ، المهم لمن وصلت أفريقيا بالصدفه إتلاقيت مع خليل ، قال لي اها المره دي برضو ما ح تخليني أوصلك ؟ صراحة ما عرفت اتحجج ليهو بشنو! غير كدا صح أنا ما بتعامل كتير مع الناس خاصة الأولاد بس خليل بحسو محترم شويه و ما عليهو حركات الأولاد و تفاهتهم دي ! المهم ركبت معاهو و إتحركنا ، قال لي ها أخبارك شنو ؟ قلت ليهو كويسه الحمدلله و بعدها سكته ، المهم هو طول الطريق بقى يحاول يفتح معاي مواضيع و أنا بجاوب حسب السؤال لأني بتعامل بحذر مع الناس و بكون ضابطه نفسي ، المهم لمن وصلنا حينا قلت ليهو نزلني هنا ، ما اتناقش معاي و طوالي وقف العربيه ، نزلت و قلت ليهو شكراً قال لي دا الواجب و طوالي مشى ، طبعاً العطاله ديلك كانوا بعاينوا لينا ساي و بيضاحكوا عشان تعرفوهم عديمين موضوع كيف ، لمن جات ماره بجنبهم واحد منهم قال إنت يا حسن ما كنت عامل فيها الشريف الرضى! حسن قال ليهو معليش الحياه محتاجه خلط 🤣🤣 فارس قال ليهم لا لا انت ما فاهم الحنك ، الوحده بتعمل نفسها شريفه للناس البسيطين و قرفها و قلة حياء ما بشوفوهو إلا المرطبين ، حسن قال ليهو زولك ذاتو ما هين عربيتو دي ما خلى بت ما غرفها بيها🤣🤣 طبعاً كلامهم وجعني في نص قلبي و أكيد ما ح أسكت لأنو الكلام دا بمس سمعتي ، إتلفت عليهم و قلت ليهم ما مفروض أرد على أشكال زي اشاكلم دي بس اقول ليكم حاجه ختوها حلقه في أضنينكم ، أنا البتتكلموا عني بالطريقه دي أشرف من الجابوكم و خليل الجايبين سيرتو بالعاطل إنتوا ولا شي قصادوا ، هو راااااجل و مالي مركزو و زول محترم و عندو سمعه ما زيكم رمتاله ما منكم فايده ، قاعدين لينا من ضل ضل و أمهاتكم و أخواتكم هم البصرفوا عليكم .....أشرت على فارس و قلت ليهو انت بالذات أكبر عاطل و عديم نفع في الدنيا دي ، ياخ المراهقين ما بعملوا البتعمل فيهو ! في الوقت انت مقضيهو قرف و قلة أدب و تشويه سمعك في قدرك بنوا بيوت و أسسوا شركات و مراهقين أصغر منك بمية مره نزلوا السوق و بقوا يد على قرايتهم و يد على شغلهم ما زيك يا بليد و بعدين تعال هناك شايفاك خاتي مفهوم في راسك بقول اني متتبعاك واقع و مواقع و شنو ميته فيك ! ياخ أنا احسن لي أعاين لزياله و ما أعاين ليك ، أنا بقرف منك و من عمايلك و ما بطبق اسمك حتى ، جاي تقارن نفسك مع خليل ! انت وين و خليل وين ! صدقني عمرك كلو ما حتبقى زيو يا عاطل ......قلت كلامي دا دفعه وحده و كلهم سكتوا ! ماف زول فتح خشموا معاي ، مشيت منهم و أنا عايزا أطرشق من الزعل بسبب الكلام القالوا عني......المهم بعد اليوم دا بقيت ما بشوف فارس خالص ، ما أنا بس معظم الناس لاحظت غيابو لأنو 24 ساعه كان بكون قاعد تحت حيطه يشاغل في الماشه و الجايه ....سمعت ملاذ بتتكلم عنو مع مروه ، قالت ليها نسوان الحله قالوا طفش و أمو حالتها حاله ، مروه قالت ليها يكون مالو يا ربي ! .... طبعاً أنا ما علقت ، مروه قالت لي قولي حاجه ! قلت ليها اقول شنو ! هو لا مختل عقلياً لا عندو حاله نفسيه ، زول قدر الحيطه كمان بخافوا عليهو ! ملاذ قالت ليها اسكتي خليها مها أصلاً ما بتطيق فارس .....المهم عدا أسبوع و العاطل داك مختفى كل أحسن ذاتو أن شاء الله ما يجي راجع تاني ، يوم كنت جايه من الشغل ، لقيت أمو طالعه من بيت ناس خالتو عواطف ، كانوا معاها نسوان إتنين ، هم قدامي و أنا وراهم ، قالت ليهن ارحكن ل حنان دي سرعه قبل ما الشكله تفوتنا ! و عندي شمار حار كمان ماشه أفتو ل تقوى .... طبعاً أمو معروفه أنها وحده بتاعة قوالات و شماره و بتاعة فتن و أي مشكله تحصل فبكون بسببها هي ، أصلاً هم أسره كلهم على بعضهم ما طبيعيين ، قلت هسي دي الأم القالوا حالتها حاله لأنو ولدها طفش ؟!! المهم لمن في اللفه القبل بيتنا لقيت شلت العاطل قاعده تحت حيطه ، كانوا ساكتين ساي و أي واحد مقبل على إتجاه ، لمن مريت بجنبهم جاني صوت حسن و هو بقول لي كدا إرتحتي ؟ إتلفت عليهو و قلت ليهو نعم ؟؟؟ قام من مكانو و جاني و هو وشو عايز يقع من الزعل ، لمن وقف قصادي قال لي أكيد عايزا تطيري من الفرح بعد ما طفشتي فارس و خليتيهو يكره نفسو ، صاحبو التاني برضو جاني و قال لي انتي وحده عديمة إحساس و ضمير ، فارس البتقولي عليهو عاطل و بتقرفي منو دا أحسن منك بمليون مره ، على الأقل هو ما أذى زول و لا جرح مشاعر زول و.....قاطعتو و قلت ليهو دا كلو ما بهمني و بعدين عايزين تقنعوني إنو طفش عشان قلت ليهو عاطل ؟؟؟ الجديد شنو يعني ما من زمان بقول ليهو كدا و كل الناس عارفه إنو رمتالي و عاطل و فعلاً هو كدا ! 🙄 حسن قال لي ماف شي جديد ، بس صحبي بالجد طلع غبي و للأسف هو كان بدافع عن الإنسانه الغلط ! صاحبو سمير قال ليهو خليها يا حسن دي ما حتفهم و عمرها ما حتحس بيهو ، انت بتنفخ في قربه مقدوده ، حسن قال ليهو مع ذلك حابب اتكلم عشان هي تعرف نفسها خسرت إنسان ما بتعوض......قلت الرمتاله ديل بقولوا في شنو !! حسن واصل كلامو و قال لي لمن كنتي تجي ماره بجنبنا و نشاغلك فارس كانت بتضايق مننا و بشاكلنا ، ايوه قدامك كان بقول لينا العاجبكم فيها شنو دي زينا و و و غيرها من كلام بالشكل دا بس كلو عشان نشوفك عاديه و ماف واحد مننا يرفع عينو و يعاين ليك و لأنو أصلاً بحب يتناقش معاك و يخليك تنفعلي عشان تتكلمي معاهو لأطول فتره ممكنه .....عارفه انو كان بقول لينا أنا بديت أحب كلمة عاطل دي بسببها ؟! طيب عارفه إنو لمن نزل بوست في كيان و قال إنو مدمر قلب كل أنثى إنو كان بتكلم بالعكس و القصد إنو في أنثى مدمره قلبو و هي إنتي ؟؟؟ طيب عارفه إنو الكومنتات العملناها في البوست حقك رجعنا حذفنا معظمها بسببو لأنو شافه فيها إساءه ليك ، طيب عارفه إنو لمن نزل بوست تاني و كتب عليهو : الواحده تلقاها متتبعاك في الواقع و المواقع و عامله نفسها تقيله و....الخ إنو برضو بتكلم بالعكس و قاصد انو هو المتابعك في الواقع و المواقع ، و فعلاً دا الحاصل كل يوم كان بقعد هنا و ينتظرك تجي راجعه عشان يشوفك......سمير قاطعو و قال ليهو دي ما حتهتم بالبتقول فيهو دا ، دي قلبها حجر و عمرها ما حتحس بمشاعر فارس ليها......للأسف يا حسن صاحبنا حب الإنسانه الغلط !! قالوا كلامهم و مشوا خلوني مخلوعه و راسي بضرب أخماس في أسداس !! والله واقفه دقيقتين في الشارع حتى بعدها قدرت أمشي البيت و أنا لسه في حالة ذهول !! أمي لاحظت لي و قالت لي مالك مخلوعه كدا ؟؟ قلت ليها لا لا ماف شي ! طبعاً انسألت السؤال دا أكتر من مره .....مره من ملاذ و مره من أبوي و مره من هيثم !....كلام الشله العاطله ديك كلو كلو ما دخل راسي بس بسببو ما قدرت أنوم طول الليل ، بقيت أتقلب يمين و شمال و شايفه كلامهم دا بعيد !! قلت يا بت يا مها حب شنو و قلة أدب شنو 😂😂🤣 في قاموسي ماف حاجه اسمها حب و الكلام القالوهو أصحابو خزعبلات ساي عايزين يحسسوني بالذنب بس أنا ما هبله عشان أصدق كلامهم و أساساً العاطل داك آخر واحد ممكن أفكر فيهو .....أفكر فيهو ؟؟ ئهه أساساً ما قاعد يخطر على بالي و غير الكره ما عندي ليهو شي ... المهم شلت الموضوع دا من بالي و بقيت كأني ما سمعت حاجه من شلة العاطل و هم كل ما يشوفوني يعاينوا لي بضيق ! يوم و أنا جايه راجعه من الشغل اول ما لقيت كدا فارس طلع في وشي لمن خلعني ! ....قلت ما قالوا طفش ! أصلاً دي حركات منو ساي بكون لقى ليهو ضل أكبر بجوا فيهو بنات كتار عشان كدا غير مكانو و الناس قايلنوا طفش ! ما قال حاجه مشى طوالي ، المهم بعد يومين ، يوم و أنا راجعه من شغلي شفت عمرو ولد عمتي نوره من بعيد في واحد بشاكلو ! الولد كان شاب كبير كدا واقف و بشاكل في عمرو ، قلت حقو الزول ما يمشي يدافع عنو لأنو لئيم زي عمتي و ما أنسى انو ضرب هيثم أخوي مع حمودي و جرى كلم شذى ، المهم مشيت عليهم ، الولد كان بهدد في عمرو و هو دموعو عشره عشره ....لمن وصلتهم قلت ليهو عمرو في شنو ؟؟ بقى يبكي بس ، الولد قال لي اتضارب مع أخوي و تاني لو عادها ما بس ح أكتفي بكف واحد ....قلت ليهو دقيقه دقيقه يعني انت ضربتو ؟ قال لي آي ضربتو و لو كررها بضربو تاني.... طبعاً الولد كان منفعل فوق ما هو غلطان ، فور دمي فبقيت اتجادل معاهو و أصواتنا وصلت فوق قال لي لو ما قفلت خشمك دا انا بقفلو ليك ياخ ما تخليني اضربكم انتوا الإتنين ببعض و.....فجأه جاني صوت بقول" و " شنو تمها ! لمن إتلفت لقيتو فارس ، جا قريب من الولد و قال ليهو تمها حتعمل ليهم شنو يعني ؟ الولد قال ليهو ما تدخل لأني ما سألتك و كلامي مع البت دي و أشر علي ...فارس وقف قدامي بحيث إني أكون وراهو و قال للولد ما عندك كلام معاها لو في كلام قولو لي و لو عايز حاجه غير الكلام أرح معاي الميدان ..... طبعاً الولد خاف لأنو نظرة فارس و النبره الكان بتكلم بيها بتخوف شديد !! حتى أنا اتفاجأت فيهو ....الولد سحب كلامو و قال لينا حصل خير و مشى ، فارس إتلفت على عمرو و قال ليهو خالص يا بطل ! الببكي شنو تاني ؟؟!. قلت ليهو ما كان في داعي تتحشر ، مشاكلنا بنحلها برانا ، طبعاً سفهني ، قال ل عمرو أنا ماشي الميدان ، في مباراة اليوم ، تمشي معاي ؟؟ عمرو قال ليهو ايي بمشي !...مسكو من يدو و مشى معاهو و أنا مستغربه فيهو !....قلت أحسن ما أركز معاهو دا واحد عاطل و عديم موضوع ساي ... المهم بعدها الأيام بقت زي بعض ، يوم ما كان عندي جامعه ، كنت قاعده في المظله مع أمي و ملاذ كانت بتقلي في البن و مآب حايمه بالبخور ، طبعاً لمن مزاجنا يكون عالي بنعمل الجبنه في الكانون بطقوسها ، لمن سمعنا صوت الباب ، مآب جرت فتحتو ، سمعتها قالت أي قاعده و جاتنا داخله و هي بتضحك و قالت لي مها إتخيلي الجا منو ؟؟؟ قلت ليها منو ؟؟؟ جاني صوت بقول أنا و طوالي هي جات خاشه و قالت لينا مشتاقين والله يا كعبين !...قلت ليها شجن!! قالت لي ايوه شجن يا كعبه يا ما بتسألي عن زول يا صحبه اخير عدمها ، أمي قامت من مكانها و مشت حضنتها و سلمت عليها سلام شوق كدا ، بعدها كلنا مشينا سلمنا عليها ..... طبعاً ما صدقت أنها قاعده قدامي !....يمكن شجن دي لي حكااية سنه و ما شفتها ! طولت شديد منها ، هي كانت صحبتي في الجامعه بس ناس بيتنا كلهم بعرفوها لأنها كانت بتجيني طوالي و أمي بتعتبرها زي بتها ، طبعاً هي في آخر سنه كانت حصلت معاهو ظروف و أبوها تعب شديد ف اضطرت تجمد السنه الكان مفروض تتخرج فيها معانا و تاني من يومتها ما شفتها و أنا أصلاً تلفوني اتفرمط و الأرقام اتحذفت عندي و تاني انشغلت عنها ! ضيفناها و قعدنا معاها بس معظم ونستها كانت مع أمي....ايوه بترد علي لمن اسألها بس دي ما شجن البعرفها ...فيها حاجه اتغيرت ...طول القعده كنت بعاين ليها و أنا قادره اشوف التغيير الحصل ليها و بتذكر في أيامي معاها ، قعدت معانا لغاية العصر و ناس البيت فرحوا بجيتها ، لمن قامت ماشه شالت رقم أمي بس بعدها ودعتنا و مشت ، بعد مشت أمي قالت لي البت دي إنتي إتلومتي شديد معاها والله و أنا كل مره اقول ليك شوفي شجن دي الحاصل عليها شنو و انتي خبري ما بتجيبيهو لمن نسيتيني ليها و لومتينا مع البت ، شوفيها هسي ما نستنا و جات زارتنا ، غيتو انتي يا بتي ربنا يلين قلبك دا ، شجن دي ذاتا ما تستاهل صحبه زيك والله ، قلت ليها كلامك صاح و هي عندها مية صحبه غيري يعني ما واقفه علي ! ملاذ قالت لي شجن دي أريتها صحبتي أنا ، انتي ربنا بديك ناس كويسين بس براك بتخربي وش و بتكرهيهم فيك ، عاينت ليها بطرف عيني و سكته ، لمن دخلت جوه الأوضه و قعدت على السرير بديت استرجع في ذكرياتي معاها هي و أريج ، بالجد فقدتهم الإتنين و الحياة أخدتنا من بعض 💔 *ياريت نبطل نرمي اللوم على المسافات ، ياريت نبطل استخدام مصطلح (شغلتني الحياة ) ك شماعه نعلق فيها عدم تواصلنا مع ناسنا القريبين مننا ، ياريت نلوم نفسنا قبل ما نلوم الدنيا و همومها لأنو العايز يصلك و يسألك عنك دا بصلك حتى لو كان عليهو جبل من الهموم و الضغوطات ، حتى لو كنت انت ساكن مشرق الأرض و هو مغربها حيجيك ، بس عمرها مشاغل الحياة ما كانت سبب يخلي زول يبطل يسأل عن زول* *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*