*#ممنوع_الإقتراب《06》* *#بقلم_مها_حولي_الزاكي* *ــــــــہہہـہہـــــــہہہـہہـ♡♡ــــہہہـہہـــــــــــ❥*‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏ ‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏‏‏ ‏‏‏‏‏‏‏‏‏‏‏‏‏‏‏ في اليوم البعدو شلت رقم شجن من أمي طبعاً هي بعد ما شلتو عملت فيهو رنه عشان أمي تسجل رقمها ، المهم اول ما سجلت رقمها إتصلت عليها ، بعد مسافه ردت و قالت لي آلو !....قلت ليها شجن كيفك ؟ قالت لي مها ؟!!.....كويسه الحمدلله إنتي كيفك ؟ قلت ليها كويسه ...قالت لي غريبه جاتك من وين و إتصلتي !؟...صراحة إرتبكت لأنو معاها حق ، قلت ليها اخبارك شنو ؟ اتنهدت و قالت لي اقول شنو و أخلي شنو !...قلت ليها قولي أي حاجه ...قالت لي ياريتك سألت السؤال دا لمن كنت محتاجاك جنبي ، لمن كنت مخنوعه عايزا زول افضفض ليهو ، لمن كنت ببكي و متمنيه كتف واحد بس أبكي عليهو ....بس انتي ما كنتي موجوده ، أديتيني ضهرك و مشيتي و كنت غايبه في كل تفاصيلي ، قلت ليها شجن أنا تلفوني اتفرمط و......قاطعتني و قالت لي ما بتعرفي شارع بيتنا ؟...طيب انا ما مصادقاك في الفيس !؟...ئهه أكيد ما لاحظتي اني طولت و ما دخلت بصفحتي ديك و يمكن أساساً ما لاحظتي غيابي و و و ......المهم هي بقت تتكلم و أنا بس ساكته لأنو كلامها حقيقه و أنا بالجد قصرت في حقها رغم إنو هي ما حصل إحتجتها و ما لقيتها ، دائماً كانت بتقيف معاي حتى لو ما طلبت منها كدا ، هي أكتر وحده اتحملتني و صبرت على طبعي الشين و أخلاقي الضيقه ما قصرت معاي ، أدت دورها على أكمل وجه و أكتر و لمن إحتاجتني ما لقتني 💔 بقيت اسمع فيها و خليتها تفضفض و تقول العندها كلو ، بعدها بدينا نتكلم عادي ، ايوه ما عادي شديد لأنها لسه زعلانه مني ، لمن قفلنا من بعض حسيت براحه كبيره ما قادره أوصفها ، زي الكنت براي و هسي لقيت زول معاي ....المهم في اليوم البعدو لمن ركبت مواصلات أفريقيا ، إتفاجأت لمن شفت فارس ! شويه كدا بطقطق للناس عشان القروش ف فهمت إنو اشتغل كمساري ! طبعاً إستغربت فيهو ، المهم مديت قروشي للقدامي و هم وصلوها ليهو ، كان بعاين لي بنظره كدا ما قدرت أفهمها ، قلت ما أركز معاهو و بقيت أعاين بالشباك ، البنتين الكانوا جنبي سامعه وحده منهم قالت : شفيهو حلاتو كيف ، لو كل يوم بنشوف كماسره بالحلاوه دي أنا مستعده امشي زفت الجامعه دي كل يوم ، صحبتها قالت ليها هوووس هوووس شغال يعاين لينا و وااااي أنا من سماحتو و هو صاري وشو .... طبعاً لمن إتلفت عليهو لقيتو فعلاً بعاين ليهم و لمحتو غمز ليهم ، قلت أصلاً هو تافه و حيفضل طول عمرو كدا ....المهم لمن وصلنا إفريقيا و أول ما نزلت و إتحركت كدا جا لاحقني ، قلت ليهو بزهج عايز مني شنو كمان ! مد لي 200 و قال لي امسكي دي قروشك ، قلت ليهو معليش ما بقبل اشيل قروش من زول 😊 قال لي دي قروشك ، قلت ليهو ما قروشي لأني دفعتها مقابل حاجه ، فتح يدي و ختاهم لي فيها و قال لي مهما كنا ما بنطيق بعض دا ما بمحي حقيقة اننا من حي واحد و بنعرف بعض و أنا ك كمساري سوداني ما ح اقبل اشيل قروش من زول بعرفو 😊...قال كدا و إتحرك خطوتين و تاني رجع و قال لي بالمناسبه ، الكلام القالوا ليك العطاله ديلك كلو كذب في كذب هم عديمين بموضوع ساي و كانوا عايزين يبرمجوا بيك و يجهجهوا أفكارك ، قلت ليهو أساساً ما مركزه معاكم كلكم ، قلت كدا و مشيت خليتو و أنا في نفسي بقول : زي ما إتوقعت ، و كويس انو طلع كذب لأني ما بقدر استوعب حقيقه مقرفه زي دي ...فارس دا انا مستحيل أفكر فيهو أساساً و محال اصدق انو بفكر فيني لأننا بنكره بعض شديد ، المهم مشيت شغلي و عدت الأيام كدا و الحاجه اللاحظتها انو في شي غريب حاصل للعاطل الإسمو فارس داك ، يعني فجأه كدا بقى يشتغل ! و محل ما أتلفت بلقاهو في وشي و الفتره دي علاقتي بشجن شبه رجعت زي زمان بقينا نتكلم مع بعض كل يوم ف بس يوم بنتكلم كدا و هي إستدرجتني و على غير عادتي حكيت ليها عن الرمتاله ديلك و الكلام القالوهو لي و قلت ليها أنا بكرهو شديد ، قالت لي ما تخليك قاسيه كدا يا مها ، يمكن بالجد بحبك و قال إنو كلام أصحابو كذب عشان شايفك ما متفاعله معاهو و مدياهو إحساس إنك بتكرهيهو ، قلت ليها و فعلاً أنا بكرهو ، قالت لي بيني و بينك كدا يا مها بالجد بتكرهيهو ؟ قلت ليها أكيد ما فيهو ولا صفه كويسه و كلو على بعضو غلط في غلط ، نسونجي و تافه و حقير و عديم اخلاق و مسؤوليه و مستهتر جداً ، قالت لي بس دا ما بمنع انو يحب و بتحب ، قلت ليهو أيوه خليهو بحب بس ما يقعد يستهبل لي أنا عشان يفهمني انو بحبني و شنو ما بعرف من الكلام الفاضي دا ، أنا متأكده زي إسمي إنو دي حركه منو و هو الوصى أصحابو عشان يستهبلوا علي ! قالت لي ما تخليك كدا معقده و نظرة ضيقه للمواضيع ! المستحيل شنو يعني ؟ قلت ليها أنا و العاطل داك لو شفنا بعض ساي مودنا بتغير ، قالت لي عادي بتحصل ، في ناس كتيره في البدايه كانوا بكرهو بعض و مع الأيام بقوا يحبوا بعض ، قلت ليها عايني حركات المسلسلات دي ما تقوليها لي و بعدين أنا أساساً لا زولة حب لا قاعده أركز مع الحاجات الفارغه دي ، ....المهم بعدها برضو عدة الأيام بنفس الطريقه ، من الشغل للبيت و من البيت للشغل و الأيام البكون ما شغاله فيها براجع فيها ل هيثم و مآب و ملاذ لأنو امتحاناتهم قربت ، يوم ملاذ جات داخله و هي بتتبسم ساي و أنا من زمان شاكه في حاجه ، خليتها بعد ارتحت شويه و مشيت ليها ، قعدت قصادها و قلت ليها اها يا ست الحسن و الجمال ورينا سر الإبتسامه دي ! قالت لي يعني عايزاني اكشر زيك 24 ساعه ! أنا خلقتي كدا ، ربنا خلقني مبتسمه ، شلت شنطتها و فتحتها لقيتها كلها ميك اب و عطور و منكير و اكسسوارات! قلت ليها دي شنطه ولا بوتيك ؟؟ ملاذ خليك جاده شويه و بطلي البتعملي فيهو دا و إلا والله اكلم ليك أبوي و قولي لي بتقيفي تحت شجرة ناس حاج الماحي ليه ؟ عندك شنو هناك و إياك تنكري لأني شفتك مرتين !😊 قالت لي و أنكر ليه ؟ معروف يعني كل يوم لمن أكون جايه من المدرسه بنقيف أنا و صحباتي هناك و بنرتاح شويه بعدها بنكمل طريقنا !!! طبعاً الحاجه الغياظه في ملاذ أنها بتقدر تدارك الموقف و عادي تطلعك غلطان و انت صح ، ما بتتوتر حتى لو عملت حاجه غلط بتتصرف عادي و بتطلع نفسها زي الشعره من العجين !...المهم بعد اسبوعين كلهم نزلوا إمتحانات ، يوم و أنا في دكان عوض جات بت مايعه كدا و قالت ليهو عوض كيفك .... طبعاً عوض عيونو بقت قلوب قلوب ، قال ليها يا اهلييين ، هسي بقيت كويس انتي كيفك ؟ قالت ليهو كويسه ، عايزا أسألك فارس وين ما جاك هنا ؟ قال ليها لا ما جاني أكيد بكون لافي ليهو مع وحده من مززو ديلك ، البت صرت وشها بس ما عرفتها ليه كانت بتعاين لي من فوق لتحت مع أننا ما بنعرف بعض ! المهم لمن طلعت من الدكان هي جات لاحقني ، قالت لي لو سمحتي ، لمن إتلفت عليها ، قالت لي بالجد ما عارفه فارس العاجبو شنو فيك ! معقوله ذوقو بقى بيئه كدا ؟!! عملتي ليهو شنو أحكي لأنو مستحيل يعاين لأشكالك ! قلت ليها هييي هييي انتي منو أساساً و فارس دا منو ذاتو ! قالت لي دا الخلاني بسببك ، قلت ليها شكلك عيانه ربنا يشفيك ، قالت لي ما قاعده أهظر معاك أنا ، قلت ليها هظار شنو شايفاني مهرج أنا ! ذاتي ما بهاظر معاك و أصلا ما بهظر مع اشكال زيك كدا ! قالت لي انتي ما بتساوي ضفري ، قلت ليها اوكي امشي قولي الكلام دا ل فارس بتاعك داك ، قالت لي والله ما اخليهو ليك ، قلت ليها لو لقيتيهو شيليهو في كيس و امشي بيهو.....قلت كلامي و مشيت خليتها واقفه و أنا بنبذ فيها في سري و بقول شوفوا عديمة الموضوع دي ! ياخ حريقه تحرقها هي و فارسها دا !......بس هي ليه قالت الكلام دا لي أنا تحديداً ؟! بتعرفني من وين و منو الأوهمها اني جاريه ورا العاطل داك !؟ المهم لمن رجعت البيت و حكيت ل شجن قالت لي يمكن هو كلمها انو ما بحبها و بحبك انتي و هي جات و سألت عنك لغاية ما عرفتك و لحقتك في الدكان عشان تشوف شنو المميز فيك الخلى فارس يحبك و ما يركز معاك ....قلت ليها شجن بطلي هبل إذا حتقولي لي كدا في كل مره ما ح أحكي ليك تاني ، المهم يوم شجن جاتني في البيت و قعدنا اتونسنا قدرتنا ، أمي قالت ليها مها دي ما بتتونس مع زول غيرك يا شجن ، إلا نقعدك معانا في البيت عشان هي تتكلم ، المهم شجن لمن قالت طالعه لفحت توبي و طلعت أقدمها ، شفت مآب من بعيد ماشه دكان عوض ! قلت دي الوداها هناك شنو كمان ، قدمت شجن لغاية الميدان و أثناء ما نحنا ماشين كدا الكوره جاتنا طايره قربت تضربنا بس ما حصل ، فارس جا و قال لينا معليش ، قلت ليهو ما بتشوفوا انتوا ولا عاملنها قصدا حركاتك دي بعرفها كويس أنا و....شجن قالت لي مها خلاص ما حصل شي و قعدت تتبسم ليهو ، قال ليها انتي ما من الحله دي صح ؟ قالت ليهو آي أنا ساكنه سوبا ، قال ليها اها نورتينا والله ، طبعاً أنا بحمر ليها ساي و هي تشيل و تضاحك معاهو ، جريتها من يدها و قلت ليها طيري بيتكم ياخ ! فارس ضحك و قال ليها الله يعينك عليها ، قالت ليهو أسكت ساي معذباني عذاب ، قال ليها ما براك ، كلنا معذبانا ....قال كدا و عاين لي جوه عيوني ....أصحابو نادوهو و قال ليهو جيب لينا الكوره دي ياخ ، شالها و قال ل شجن اسمك منو ؟ قالت ليهو شجن و انت ؟ قال ليها فارس و اتشرفنا ، إبتسم ليها و مشى بإستعجال و هي تعاين ليهو لحد ما وصل الميدان لا و كمان معاها إبتسامه !!! ضربتها في كتفها و قلت ليها دا النسونجي الحكيت ليك عنو ...نططت عيونها و قالت لي ما بصدق يا مها ووووبعلي أنا من وجاهتو ! سبب واحد يخليك تنكري انو بحبك ماف ، يعني جا وقف معانا عشانك و أنا القايله نفسي عجبتو و لفت انتباهو 😭😭 قلت ليها يا بت دا أكبر مخادع ما يغرك مظهرو الخارجي ، قالت لي ياخ انتي وحده حيوانه و جاحده للنعمه ، هسي ولد زي دا بشاكلوهو عليك الله ؟! لقيتيهو مسكين و ساكت ليك عشان كدا بتطاولي عليهو مش ! قلت ليها يا بت دا رداح درجه اولى ما تركزي معاهو بس ، قالت لي وااااي بس لو ما عايزاهو أديني ليهو ، قلت ليها شيليهو ، قالت لي أنا جاده ، قلت ليها و أنا كمان ، قالت لي عندي فكره تاني ح أجيك طوالي و اخليهو يشوفني أكتر من مره لحد ما يتعرف علي كويس و بعدها ح أخليهو يحبني ، قلت ليها بالتوفيق ....المهم هي مشت و انا رجعت البيت بس ما رجعت بنفس الهيأه الطلعت بيها ، ما عارفه ليه حسيت بوخزه لمن قالت إنها حتخليهو يحبها ! ايوه انا عارفاهو بكذب و عارفه انو ولا يمكن أحبو و بكرهو شديد بس مع ذلك شبه اتضايقت لمن شجن قعدت تنبرش فيهو ، المهم بعد حكاية شهر كدا بدينا نجهز ل رمضان و الحاجه الملحوظه انو نقاشاتنا أنا العاطل داك قلت ، شايفاهو بقى شغال 24 ساعه و ما فاضي لزول ، يوم انا و مروه مشينا سوق ليبيا عشان نشتري حاجات رمضان لمن وصلنا إفريقيا و كنا حنركب فجأه فارس طلع في وشنا و هو سايق ركشه ، قال لينا أركبو ....عملت نفسي ما سامعاهو و مروه المعفنه طوالي ركبت و تدخلت الحاجات كلها ، قالت لي أركبي قلت ليها لا بمشي بالمواصلات و إتحركت طوالي ، جاني بركشتو و قال لي ممكن تبطلي حركات الشفع دي !😊 ما رديت عليهو ، مروه قالت ليهو خليها على راحتها لأنها ما حتسمع من زول و فعلاً ما سمعت منو و مشيت بالمواصلات ، طبعاً هم وصلوا قبليني لمن جيت لقيت فارس دخل ليها الحاجات جوه البيت و هي دخلت لمن جيت أدخل هو جا طالع و كان بعاين لي بحده ، قال لي حركتك المسيخه دي ما كان في داعي ليها ، قلت ليهو ياخ انت مالك و مالي ما عندك بي شغله ! مش نحنا بنكره بعض ؟! مالك فجأه كدا اتغيرت و جاي تلعب دور المسكين ! شوف ما أنا البتغشى فاهم ! حركاتك دي اعملها ل بناتك المايعات ديلك لأنهم بتغشوا ليك أنا أنا صدقني لو إدردقت لي في الواطه دي ما ح أصدق انك اتغيرت ... طبعاً عيونو بقت زي الشرار ، جا علي و قال لي بنبره حاده : ما بهمني تصدقي أو لا و التغير دا ما عشان خاطر عيونك لمن تجي تقولي كلامك دا ، خليك عارفه إنو أنا ما اتغيرت و لسه ما بطيقك بس كبرت عقلي و بقيت أتجاوز تصرفاتك و بحاول ما اتصادم معاك كتير لأنو النقاش معاك بحد ذاتو مرهق و متعب ، قلت ليهو بس دا العايزا أسمعو و يارب نكون بنكره بعض كدا لحد ما نموت ، قلت كلامي دا و إتحركت على الباب و أول ما فتحتو سمعتو قال لي : مها ! متين أنا قلت ليك بكرهك ؟؟ *•••••••••••••••••••••••••••••••••••••••••••••••••••••••••••* *☆يتبــــــــــــــــــــــــــــــــــــــــــــع☆☆* *♡بــــــــــــــيــــــــــــــــــــجــــــــــــــة♡*