اجتماع مسؤولَيْن عراقيّيْن: منع الدينار عن إسرائيل – حماية المولات والفلافل والجامعات الأهلية بقنابل البخور – تفعيل مذكرة اعتقال ترامب – منع الهام شاهين من المغادرة – إخفاء مصنع المسدسات Posted on 19 يونيو، 2025 by admin عدد القّراء: 3,401 – هف بوست عراقي (الحقيقة بلا فلتر): ( ادرجنا اسمكم في القائمة الارسالية، لأهميته، تقبّل منا ذلك وحريصون على التواصل معك) كتب جقلمبة گعدوا اثنينهم، رئيس كيوت.. ورئيس حكومة سابق (منظّر الثرثرة الوطنية) على طاولة ذهبية مال ناس “فايخين”، يسولفون عن الحرب الإسرائيلية الإيرانية، وكأنهم لجنة تحكيم بـ”آراب آيدول” مو زعماء بلد ما بيه كهربا ولاماء، ومتروس متزعمين، وفاسدين. يفركون إيديهم، ويقررون قرارات تشيب لها لحية غاندي. قالوا: “العراق هو المحور”، إي خوش محور، كله صاير مثل التاير المبنجر، يدور وما يمشي. قرروا ينزلون صواريخهم اللي مصنوعة من علب الببسي، ويقصّفون الدفاعات الإسرائيلية،. گال منظّر الثرثرة الوطنية وهو يكرز فستق: “نمسحهم بأسبوع!”، وإذا ما صارت؟ نبعثلهم تهديد بواتساب من خط نينوى. وقرروا يحوّلون القواعد الأمريكية إلى روضات أطفال، وقالوا نخلي المارينز يغيرون حفاظات، لأن الصواريخ الذكية ما تعرف تفرق بين جنرال وگونية زلاطة. وحچوا عن مصانع التصنيع العسكري، وقالوا نحمي مصنع المسدس والغدارة، هاي الأسلحة اللي يخاف منها حتى الناتو! .. الناتو مو لأن متخوف، بس لأن ما يدري هاي شنو أصلاً.. يحسبها لعبة مال بنات. وقرروا زج العلماء النوويين العراقيين بالمولات، لأن أكيد الموساد راح يتوه بمتجر الهدايا، ويضيع بين عروض “اشتري بنطلون واحصل على بيجامة ببلاش”. وأمروا بانزال “ولد الملحة” لحماية الجامعات الاهلية المستهدفة لخطورة بحوثها على الناتو، مدججين بالرشاشات والبخور، يدافعون عن مراكز العلم، وبنفس الوقت يتونسون بين الجنس الناعم. وقرروا نصب صواريخ ذكية (تشتغل على بطارية ريموت) تحمي محلات فلافل المنصور، وباب الشرجي والميدان، لأن هاي المطاعم أخطر من مفاعل ديمونة، بيها غسيل أموال ما شافه صندوق النقد بحياته. وما نسوا يحصنون المصارف الأهلية، والمولات، والمستشفيات الاهلية، لأن هاي الأماكن بيها خيوط اللعبة كلها.. فيها كل مصايب الدولار المنهوب، ومو مهم تحمي الحدود، أهم شي تحمي مطعم “برگر فخم” وأكاديمية تجميل. وأصدروا مذكرة قبض على ترامب، وگالوا أي مواطن يشوفه يقفل الباب عليه، ويخابر الحكومة، ويرصد تحركاته بفلاش ميموري من سوق مريدي. وقرروا يمنعون الدينار العراقي عن إسرائيل، وتحويله الى سلاح استراتيجي ضد الدول المارقة وعلى راسها امريكا. وأخيراً، قرروا يمنعون الفنانين العالميين المؤيدين لأمريكا، من زيارة العراق، ويبقون على الهام شاهين، لأن هي صديقة زوجة الرئيس، ويمكن تفزع لنا برقصة وطنية إذا انهارت الجبهة. أكمل على الروابط التالية: ( تابع القناة على واتساب) : https://whatsapp.com/channel/0029Var8RSgL2AU8BzPOfR1M انضم الى مجموعة هف بوست عراقي على واتساب: https://chat.whatsapp.com/CES7qlboysyI4bmN0plcXw رابط محتوى التقرير : https://iraqhuffpost.com/?p=82378