س: إيه المشكلة لو نقلت الإجابة من صاحبي في اللجنة برضاه، أنا كده ماغشتش؟ ج: الحقيقة إنها مشكلة كبيرة! ومش ليك إنت لوحدك.. ده ليك ولصاحبك كمان! الامتحان ده محطوط؛ عشان يقيس مستواك إنت.. ويقيس مجهودك إنت، ويختبر معلوماتك إنت! إنت، مش حد تاني! إنت لوحدك، مش بمساعدة حد تاني! فسواء نقلت الإجابة من صاحبك برضاه أو عدم رضاه. فده كده غش! وسواء نقلتها من صاحبك أو حتى من ورقة معاك فده بردو غش! وسواء المراقب اللي واقف شافك ووافق أو ماشفش أصلا. فده بردو غش! والنبي ﷺ قال: "من غشَّنا فليس منَّا" وصاحبك اللي ساعدك تغش، ده ساعدك تعمل الحرام! والله تعالى قال: {...وَتَعَاوَنُوا عَلَى الْبِرِّ وَالتَّقْوَىٰ ۖ وَلَا تَعَاوَنُوا عَلَى الْإِثْمِ وَالْعُدْوَانِ ۚ وَاتَّقُوا اللهَ ۖ إِنَّ اللهَ شَدِيدُ الْعِقَابِ}. يالا روح ذاكر وشد حيلك.. مش هطول عليك أكتر من كده. #س_ج_ليالي_الامتحان