أهم حاجة لازم تعملها علشان تفهم تسويق… إنك تبص على مشروعك بعيون الناس، مش عيونك إنت فيه شاب، قرر يفتح محل عصير. كان نفسه يبني حاجة على مزاجه: كل تفصيلة في المكان بتقول إنه تعب فيها — من الديكور لليافطة، من الماكينة الألماني لأسلوب التقديم. ماسك المشروع كأنه لوحة بيرسمها، وكل نقطة فيها بتقول “أنا شاطر”. الناس اللي حواليه شجعوه، وابتدا الرحلة. أول يوم فتح… مفيش حد جه. تاني يوم؟ برضو. تالت يوم؟ صاحب المحل اللي جنبه جربه من باب المجاملة. أسبوع؟… صفر. بدأ يتوتر، ويقول الجملة اللي كتير غيره قالوها: “هو أنا ناقصني إيه؟” بدأ يعمل خصومات. طبع فلايرز. غيّر ترتيب المحل. بس… الناس برضو مش بتجيله. في اللحظة دي، واحد من أصحابه قاله: “يا عم انت محتاج تسويق!” ضحك، وقال: “أنا؟ تسويق؟ أنا مش بيبسي ولا شركة كبيرة! أنا مشروع صغير ونيتي كويسة… التسويق للناس اللي بتلعب بالكلام، مش لواحد زينا.” بس الحقيقة؟ هو كان بيسوّق بالفعل… من أول لحظة بس كان بيسوّق بعشوائية، من غير ما يعرف. التسويق مش حاجة بتضيفها على المشروع… التسويق هو طريقة إدارتك للمشروع من أول ثانية. الناس فاكرة إن التسويق هو الإعلان اللي بتعمله لما تحب تزود المبيعات أو إنك تعمل صفحة على فيسبوك وتحط شوية صور وفيديوهات لكن الحقيقة مختلفة تمامًا: كل مشروع… فيه تسويق، سواء إنت واعي بيه أو لأ. إزاي؟ أي بزنس في الدنيا بيقدم حاجة (product) وبيحدد سعر (price) وبيشتغل من مكان معين أو بيوصل للناس بطريقة معينة (place) وبيتواصل مع الناس بشكل مباشر أو غير مباشر (promotion) يعني حتى لو فتحت محل كشري، من غير بوستات ولا لوجو ولا سوشيال ميديا، فإنت كده كده بتسوّق أيوه… بتسوّق من غير ما تحس إنت بس مش بتدير التسويق… إنت سايبه للظروف، للزحمة، لرد الفعل العشوائي وهنا بتبدأ المشكلة. يعني إيه تسويق؟ تعال نحكيها بلغة السوق. التسويق هو: إن العميل أول مرة يشوفك، يفهم إنت بتبيع إيه ويقتنع إنك مختلف ويجربك، ويطلع من عندك حاسس إنه مبسوط ويقرر يرجع ويقول لحد غيره: “جربه… هتحبه” التسويق مش بس بوست التسويق مش حملة التسويق مش خصم التسويق = كل تفاعل بينك وبين العميل، من أول ما يعرفك، لحد ما يقرر يرجعلك أو ينساك. يعني إعلان؟ الإجابة ، لأ طبعاً الإعلان هو مجرد وسيلة لو الأساس تعبان… الإعلان هيكشفك مش هينقذك واحد بيعلن عن جلسة بـ 1000 جنيه بس المكان مهزوز، والشغل عادي، والاستقبال بارد الناس تيجي… مرة وتمشي… للأبد وواحد تاني مش بيعمل إعلان بس كل تفصيلة عنده محسوبة العميل بيحس إنه مهم والمكان بيحترمه والخدمة مش بس كويسة… الخدمة بتقوله: “إنت مش مجرد رقم” وده الفرق. يعني التسويق فين بقى؟ في كل حاجة: •في أول كلمة او اتصال بيحصل مع العميل •في اسم المشروع •في طريقة تسعيرك •في شكل المكان •في لبسك •في نبرة صوتك •في الرسالة اللي بتوصل من غير ما تتكلم وده اللي قاله سيث جودين لما كتب: “Marketing is the sum total of all the interactions a customer has with your organization.” كل لحظة العميل بيشوفك فيها بيسمعك ، يتعامل معاك ، يفكر فيك ،دي لحظة تسويق. ولو عايز تلبس نضارة أكاديمية شوية… خد الكلام ده: فيليب كوتلر بيقول: “Marketing is the science and art of exploring, creating, and delivering value to satisfy the needs of a target market at a profit.” يعني التسويق هو فن + علم تفهم الناس محتاجة إيه وتبني عليه وتوصّله ليهم وتكسب… من غير ما تخدع الجمعية الأمريكية للتسويق قالت: “Marketing is the activity, set of institutions, and processes for creating, communicating, delivering, and exchanging offerings that have value.” يعني؟ أي حاجة بتعملها علشان توصّل للناس قيمة… وتخليهم مقتنعين إنها تستاهل، ده اسمه تسويق. الخلاصة؟ إنت بتسوّق من أول لحظة فتحت فيها مشروعك بس السؤال: بتسوّق بإزاي؟ هل بتدير التفاصيل؟ ولا سايبها تمشي لوحدها؟ لو العميل شايفك غالي… ولا شايفك مش مميز… ولا مش فاهم إنت بتبيع إيه… يبقى فيه مشكلة في تسويقك مش فيك كشخص بس في إزاي بتقدّم نفسك ‏نعم قلبي والسلسلة دي؟ جايه تفهّمك مش إزاي تعمل إعلان لكن إزاي تدير كل عنصر من عناصر التسويق بوعي لو الكلام ده لمس عندك حاجة… يبقى إحنا لسه في أول الطريق. السلسلة دي معمولة مخصوص علشان تساعدك تبني مشروع يتشاف ويتحب ويتكرر. لو مهتم تتعلم تسويق بجد وبطريقة مختلفة… كمل معايا وخلّي كل بوست يبني فوق اللي قبله. ولو عندك صديق فاتح مشروع وبيحاول، شاركه البوست ده، يمكن تكون سبب إن رحلته تبدأ من أولها صح