بمناسبة الجواز اللي بيعطل الإنسان.. الشيخ سعيد الكملي كان بيقول: الناس زمان كانوا بيطلبوا الغنى بالزواج لإنه وعد من الله ثلاثةٌ حقٌّ على اللَّهِ عونُهُم: المُجاهدُ في سبيلِ اللَّهِ، والمُكاتِبُ الَّذي يريدُ الأداءَ، والنَّاكحُ الَّذي يريدُ العفافَ الحقيقة انا اتجوزت وانا عندي ٢٣ سنة وحرفيًا ماكنش حيلتي حاجة ولولا تيسير حمايا الله يرحمه ماكنتش هتجوز ابدًا (وده رزق ماجاش فلوس بس جيه بإنه اتشال من عليا فلوس) خلفت أول ما اتجوزت وحرفيًا كنت شايل هم الحفاضات ولو المولود احتاج لبن صناعي والحمد لله النهاردة انا عندي ٣١ سنة ربنا رزقني عندي ٣ أطفال وفي نفس الوقت شغلي اللي كان freelance ربنا كرمني وبقى عندي شركتي والحمد لله بعد ما كنت شغال جوه مصر بس بفضله ونعمته الناس بتحضرلي من اكتر من ٢٠ دولة حولين العالم والحمد لله بيجيلي شغل جوه وبره مصر من أكبر المؤسسات والكلام ده أقسم بالله وأنا بكتب الكلام ده وأنا في بيت ربنا الحرام لا بحنكة تحنكتها ولا بذكاء تذاكيته ولا بأي شئ سوا ١- دعاء ٢- صدقة ٣- يقين بالله الرزاق وإن الرزق من عنده بس ولو شاء رزقك مهما كان وضعك ولو شاء منعك مهما كان عملك ٤- البر البر البر وصلة الرحم ابوك وامك واخواتك واهل مراتك واهلك ٥- السعي والاجتهاد وعدم التواكل ٦- عدم الاشتراط على الله والرضا بإنه ممكن يكتب عليك الفقر أو الغنى وده قدره مش تقدير لإنك حلو ولا وحش ٧- خدمة الناس وعدم التكالب على الرزق وكأن في حد ممكن رزقه يقلل رزقك وياكل منك للاسف كتير بيعاملوا الفقر على إنه بيعكس غباوة صاحبه وقلة عمله وسعيه وضعف إرادته وللأسف ده فكر غربي بحت، لإنه بيدور حولين إن الإنسان هو كل شئ وهو اللي بيحرك كل شئ ولذلك الغني فاكر إنه اغتنى بذكاءه والفقير فقير عشان هو مش زينا عكس ما الإسلام بيشوف الرزق انه زيادته أو نقصانه اختبار والله له علم وحكمة فانت لو غني .. ده اختبار ولو فقير .. ده اختبار وتقلب الحال بين الغنا والفقر اختبار كله اختبار واللي هينجح بس هو اللي هيعبد ربنا صح أيًا كان المكان اللي هيحطه فيه الموضوع كبير وعميق وعايز ضبط للمعتقدات بتاعتنا وفهمنا للواقع عندي كذا حلقة podcast بتناقش مسألة الرزق هحط اساميهم تحت وإن شاء الله لما أرجع هحاول اصور حلقة اتكلم فيها أكتر عن الموضوع ده بس إوعى تخالف أمر النبي صلى الله عليه وسلم وماتعفش نفسك عشان الcareer الزواج الطيب هو اللي بيصنع استقرار نفسي يبني الcareer وعمومًا لو الcareer أتأثر شوية مقابل انك عفيت نفسك وكفيتها وبعدت عن الحرام فوالله ده مكسب لا يقدر بثمن. الله يغنينا جميعًا بفضله _ كريم اسماعيل