Hmar laia nuhmei pilot hmasatak, Qatar Airways a Brand Ambassador le CSD ni lai, Grace Lalzarzo Khawbung @Zarpui/Miss Sikpui Ruoi 2005 Grace Lalzarzo Khawbung hi December 16, 2005 a Saikot, Churachandpur a Manipur State Level Miss Sikpui Ruoi kha a nih. June 16-22, 2025 sunga Le Bourget, Paris hmuna fe mek Paris Air Show, khawvel pumpuia aviation company haiin an vuongna ṭhatak hai an pholangna insangtak a hin Hmar nunghak Grace Lalzarzo Khawbung (Zarpui, grey uniform) hi a thawkna Doha based Qatar Airways in an vuongna ṭhatak hai pholangtu (Brand Ambassador) dinga an nunghak suong bik mi 20 a thlangsuok hai laia an leader a nih. Ama hi kum 13 Qatar Airways a hin sin a lo thaw tah a, promotion hai hmu peiin tuhin Cabin Service Director (CSD) niin, a sin tak chu vuongna a passenger hai lungawi tak le inhawi taka an vuong theina dinga cabin crew hai sin ding relfel le lekha pawimaw hai sukfel a nih. Nk. Grace Lalzarzo Khawbung hi Upa R. Tawna Khawbung le Pi Rose Khawbung nauhai laia a pahnina niin tuhin Sielmat, Churachandpur a cheng mek an nih. Mi tumru le rinum tuor thei tak mi a ni leiin hienga a sin thaw zing pum hin kum iemani chen a inthawk tah khan South Africa le USA a hai pilot training a lak zing bawk a nih. April 2025 khan Commercial pilot licence inhlân fel a lo ni tah a, pilot sin interview dinga inbuotsai zing lai a ni a, ama hi Hmar laia nuhmei pilot hmasatak ding a nih. Paris Air Show hi kumkhat dan, odd years po a nei hlak a ni a, tukum hi a vawi 55na niin, Qatar Airways khawma an vuongna suong em em Boeing 777-300ER UEFA Champions League Livery le Gulfstream G700 an pholang a, khawvel in a la nei ngai lo next generation business class product thar hlawk 'Qsuite Next Gen' ti chu Boeing 777X le Airbus A350 haiah kum 2025 tawp tienga hmang hman dingin a pholang bawk a nih. Paris Air Show 2025 a hin Qatar Airways chun khawvel huopa aviation a chawimawina insangtak 'Skytrax Airline of the Year' title a dawng a, hi award hi a zawna vawi 9 a dawngna a lo ni tah. Award dang a dawng hai: 1. World’s Best Business Class 2. Best Airline in the Middle East 3. Best Business Class Airline Lounge (Al Mourjan Lounge – The Garden at Hamad International Airport) 4. Skytrax Five-Star Airline recognition Skytrax World Airline Award 2025 top 1-10 dawngtuhai: 1. Qatar Airways 2. Singapore Airlines 3. Cathy Pacific 4. Emirates 5. ANA All Nippon Airways 6. Turkish Airlines 7. Korean Air 8. Air France 9. Japan Airlines 10. Hainam Airlines Hieng ang Hmar nunghak ei nei hi ei suong hle a, Pathien le hnam sukropuitu ni pei dingin ṭawngṭaipui ei tiu.