*18 ذی الحجہ یوم شہادت خلیفہ سوم ذوالنورین ذوالھجرتین ذوالبشارتین امیر المومنین سیدنا عثمان ابن عفان رضی اللہ تعالی عنہ* 18 ذوالحجہ تاریخِ اسلام کا ایک غم ناک دن ہے، جب خلیفۂ سوم، جامعُ القرآن، ذُوالنُّورین حضرت عثمان بن عفّان رضی اللہ تعالیٰ عنہ نے راہِ حق میں اپنی جان قربان کی۔ آپ کا شمار عشرہ مبشّرہ (جنت کی بشارت پانے والے دس صحابہ) میں ہوتا ہے، اور آپ وہ خوش نصیب ہیں جنہیں دنیا میں دو مرتبہ رسول اللہ ﷺ کی بیٹی کے ساتھ نکاح کا شرف حاصل ہوا، اسی لیے آپ کو "ذُوالنُّورین" کہا جاتا ہے۔ آپ کے فضائل: 1️⃣. *ذوالنورین دو بار دامادِ رسول ﷺ بننے کا شرف* : حضرت عثمان رضی اللہ عنہ نے پہلے حضرت رقیہ اور پھر حضرت ام کلثوم رضی اللہ عنہما سے نکاح کیا۔ رسول اللہ ﷺ نے فرمایا: *اگر میرے پاس تیسری بیٹی ہوتی تو میں وہ بھی عثمان کو دے دیتا*۔" 2️⃣. *شرم و حیاء کا پیکر*: آپ کی حیا کے بارے میں نبی کریم ﷺ نے فرمایا: *عثمان سے فرشتے بھی حیاء کرتے ہیں*۔" (صحیح مسلم) 3️⃣. *جامعُ القرآن* : حضرت عثمان رضی اللہ عنہ نے دورِ خلافت میں قرآن مجید کو ایک رسم الخط پر جمع کروایا تاکہ امت اختلاف سے بچ جائے۔ آج جو قرآن دنیا بھر میں پڑھا جاتا ہے، وہ "مصحفِ عثمانی" کہلاتا ہے۔ 4️⃣. *شہنشاہ سخاوت* : غزوہ تبوک کے موقع پر آپ نے ایک ہزار اونٹ، ستر گھوڑے اور بہت سا مال اللہ کی راہ میں دیا۔ رسول اللہ ﷺ نے اس پر فرمایا *آج کے بعد عثمان کو اس کا کوئی عمل نقصان نہیں پہنچا سکتا*۔" (ترمذی) 5️⃣. *شہادت*: حضرت عثمان رضی اللہ عنہ نے 12 سال خلافت کی۔ جب فتنہ برپا ہوا اور باغی آپ کے خون کے پیاسے ہوگئے، تو آپ رضی اللہ تعالی عنہ نے امت میں تفرقہ نہ ہو، اس لیے تلوار نہ اٹھانے کا فیصلہ کیا۔ بالآخر 18 ذوالحجہ کو قرآن مجید کی تلاوت کرتے ہوئے شہید کر دیے گئے۔