#منقول النهارده اعلنت عن وظيفه . واتصل بيا واحده بتستفسر عن الوظيفة ل إبنها . بغض النظر عن المكالمة اللي كلها تحقيق واسألة مش المفروض تتسأل غير اثناء الانترفيو . وكأن خلاص ابنها اتقبل وهي بتشوف هل هي هتوافق علي انها تشغله معانا ولالا . بس انا اخدت قرار ان ابنها ده لو اخر انسان ف الكوكب مش هقبل انه ينضم للتيم معانا . وده مش عشان انا بتحكم ف ارزاق الناس . الرزاق هو ربنا . لكن انا اول انطباع باخده عن حد امه هي اللي بتستفسر عن الشغل . ان ده حد بتاع ماما . النوع ده من الناس هتلاقيه بيدخل اهله ف كل مشكلة وكل خلاف . وهتلاقي نفسك حاسس انك مدير حضانه و بتتعامل مع ولي امر . المفارقه . ان بعد ما قفلت معاها ب فترة صغيره . اتصل بيا والد احد الموظفين اللي بيشتغلوا معايا بالفعل . عشان برضه يفاوضني ع شوية حاجات تخص الشغل الخاصين ب ابنه . ف ده زود اصراري ع اني مااشغلش معايا واحد لسه ما تخطاش مرحلة الحضانه . وخلاني اعيد تفكير ف ان هل الشخص ده ممكن يكمل معانا الشغل بالطريقه دي ولالا . لان دي ماكانتش اول مرة يصدرلي اهله بخصوص حاجه معينه علماً انه عمرة 28 سنه . لكن لسه برضه اهله بيتصلوا بيا بالنيابه عنه ودي بالنسبة ليا ولأي صاحب شغل حاجه مرفوضه . طيب انا بقول الكلام ده لييييه ؟ عشان عاوز اوصل رسالة لكل أب و أم فاكرين انهم كده بيساعدا اولادهم . انهم للأسف بيضروهم أكتر ما بيفيدوهم . ممكن حضرتك لو قرأت عن وظيفه تبعتها ل ابنك وتخليه يتصل هو ويقدم هو ماينفعش تعمل انت ده بالنيابه عنه . و لو حسيت ان ابنك مظلوم ف الشغل او ان في مشكلة . ف انت المفروض دورك يكون مقتصر علي انك تنصحه او تلفت انتباهه وهو له الحق ياخد بالنصيحة او لا . لانه حتي لو ما اخدش بالنصيحة ف لازم تسيبه يخوض التجربه ويتعلم ازاي يجيب حقه بنفسه مش بالوكاله منك . كل الناس اللي اهاليهم بتدخل في كل كبيرة وصغيره ف حياة أولادهم . بيطلعوا ف النهايه اشخاص شخصياتهم ضعيفه وهشه . و مش عارفين ياخدوا قرار في حياتهم .