من أكتر الحاجات اللي بتستفزني وبتضايقني جدًا إن في بنات وستات بيرضوا إن أجزاء من جسمهم تتصور وهم في مراكز التجميل أو العيادات، وبعد كده الصور دي تتنشر على السوشيال ميديا على إنها ريفيو أو تجربة، بقى منظر عادي نشوف وش مش متغطي، أو منطقة معينة من الجسم، وكأن ده شيء طبيعي ومقبول. أنت لما تروحي تدفعي فلوس عشان تعملي حاجة في شعرك أو بشرتك..إلخ من حقك تحصلي على الخدمة دي من غير ما حد يصورك أو يستخدم صورك، جسمك مش جزء من الخدمة ومش المفروض يتحول لمحتوى على إنستجرام أو الفيسبوك عشان المركز يكسب متابعين أو يبين إنه ناجح حتى لو الصور دي مش باينة فيها هويتك، ده ما يقللش من حجم التعدي. في فرق كبير بين إنك تكتبي تقييم عن تجربة بإرادتك، وبين إن جسمك يتعرض ويتحول لأداة تسويق، الموضوع مش بس خصوصية ده استغلال صريح. آية كامل