جمال البنت منظومة متكاملة، اللي يحصره في الشكل بس يبقى أعمى، غبي، بيضيع شطر الجمال من بين إيديه.. جمالها في بساطتها، بُعدها عن الغرور والتناكة، خفتها، إحساسها الداخلي بجمالها قبل أي حاجة تانية. فيه بنات حلوين، شكلًا، لما بأقعد معاهم، بأخاف.. بأخاف من الاصطناع والغرور والتكبُّر، بأخاف من تريقتهم على باقي البنات، سخريتهم من كل تفصيلة في شكل وجسم أي بنت مش عاجباهم. عاوز تعرف البنت، أي بنت، جميلة ولا لأ؟ صوّرها وهي بتضحك! فيه ضحكة بتنوَّر، بتفتح سكك وطرق خضرا، وفيه ضحكة بتضلم، ضحكة صفرا، كلها غرور وخيلاء كاذب. الجمال لا هو فورمة جسم معينة، ولا وزن مثالي، ولا ملامح معينة، ولا آخر موضة في اللبس.. الجمال أكبر من كل ده، مُحلِّق فوق التفاصيل العادية، بعضه ملموس، ومعظمه غير ملموس.. من أدركه، صدقًا، مش بالماكياج؛ فقد فاز. وعلى فكرة، الجمال الصادق رزق، لا يؤتيه الله إلا من يستحقه.