CHIN-LUSHEI-KUKI GAM’A GAMGI THO KAISAH LOU DING Dr T.Lunkim Chairman KOHUR Achesa kum 1947 a India , 1948 a Burma Britishten jalen apeh chun alai lunguva “Independent Hill Country,” ahilou leh “Kuki Country” apangpoi. Apangsa hileh tho jong anakaipeh diu ahitai. Jalen amukal’u kum 60 lam hita a, tubep’a India leh Myanmarin gamgi tho kai agot’u chun agam ahilou aphondoh ahi hetchet ding ahi. Chin-Lushei-Kuki nam miten het ding chu Bengal Twikhanglen velkol (Bay of Bengal) a pat Kachin geiya tho aget gotnau hi kilometer 1400 val ahina Secretary ShriPinak Ranjan Chakravarty, Ministry of External Affairs, Government of India seidoh ahi. Hiche kilometer 1400 sao gamgi tho chun Chin-Lushei-Kuki gam lailung ahopa ahin, namdang ho jong ahopa thouve. Ahasuh khah pen ding Chin-Lushei-Kukite ahi. Vetchetnan kilometer khat velkol sunga Chin-Lushei-Kuki kho 36 atongkhan, mihing 800,000 asukhai. Britishte chun min mai maiya einahop khen’u ahin, India leh Myanmar hin igam’u leh imiteu akhentel got, “Berlin Wall” banga sopi le sopi jong kikhen ding, UNO mah pen tah eibol khum got’uva International Fundamental Rights eisuh set peh got’u ahitai. Pukhang pakhanga pat British khang geiya jong kikhen kha lou, pugam pagam suhkhen ding go hon igam’u alah got’u ahi akiphongdoh tai. Kum som gup sunga nam leh nam kidouna, nam khat sunga jong kikhentelna, Manipur a Kuki nam khat jong 1956 lampeh a nambah 22 jen a akhentelnau hi pugam pagam huhna pang khom thei lou dinga anabol’u ahi. Tua hi pugam pagam eilahpeh nom jeh-uva eikhentel’u hung kiphongdoh ahitai. Koima Inpi (Govt.) akidoupoi. Gollhang hangsan ho jong koima dou ahipouvin, pugam pagam huhna a gonoi dainoi, gamchang noiya, kel leh chah thoh a, akhon na teng igam’u lah peh nom hon sadel’a adel’uva, atha tha jengu chu, India leh Burma igamu kihom dinga anabol’u ahina chu gamgi tho akaigot’uva kona kimudoh ahitai. Nam leh gam ngailu jousen pugam pagam huhdohna ding bou igel diu, ilah-uva thudang boipi angaipoi. Olsei thei ahi. 1. Ipi seiya ipi kibol leh gam leh nam kihuhdoh ding, tiseh seh bou ngaito ding ahi. Thu sei khel’a na toh khel, kitomona boldoh chu nam sumang leh gam joh doh, nampi leh Pathen dei lou manthahna bol hi ding ahi. Hijeh chun ami chang cheh-in ipi seiya ipi na toh ding chu Chin-Lushei-Kuki Inpin 05 March 2010 nikhoa thulhun thum longdel’a ajamtoh-u (a) Kukite lah a min thah chom chom ijat’in kiminvo jongleh nam khat hina kehthei lou ahin, (b) Pu le paten pugam pagam Britishte apehdoh lou banga nam gam huhna pankhom a huhdoh ding, (c) Pugam pagam huhna dinga manchah ding Danthu (Law) them hon akhol toh diu chu, nam leh gam ngailut’a jui cheh ding ahi. 2. Chin-Lushei-Kuki Inpi thulhun thum dungjuiyin Inpi leh Human Rights minin na akitong pan tan 23 September nin Inpin (1) India Prime Minister leh (2) Myanmar President koma gamgi tho kaiban angah jeng diuvin lekha apetai. Aban a chun Human Rights minin 11 October 2013 chun Inpi thupeh tosotnan (1) India President leh (2) Myanmar President lekha apetan, copy teni jong UNO vaipote akipeh cheh tai. Hiche lekha kipe teni panpina lhingkeiyin Chin-Lushei-Kuki lamkai pipu Mizoram Chief Minister pun India President koma lekha apetai. Hiche lekha ho hi chamdel’a India leh Myanmarin asan thei tei diu dei aum’e. Ijemtia donse peh louva tho kaitei tei agot’u leh UNO geiya Chin-Lushei-Kukiten thu ahin lhut theina ding umdoh ding ahitai. Ajeh chu gam ni jen, India leh Burma kitho ahiuvin, UNO hung kikhum lut tei din akilang’e. Thudih leh hansan, chuleh Pathen’a kison nan eijosah tei diu ahi. By~ Dr. T. Lunkim, Chairman, KOHUR