س: أنا بتجيلي حالة خوف ليلة الامتحان، وقبل اللجنة كمان ببقى مرعوب، ومش عارف أعمل إيه؟ ممكن تنصحني. ج: أنا متفهم جدًا سبب خوفك وقلقك وكم الضغط النفسي اللي عليك.. ومشاعر الخوف والقلق دي مشاعر طبيعية ربنا خلقها فينا، وكلنا بنمر بيها في مواقف كتير في حياتنا.. ولأن ربك كريم؛ عطاك وسائل كتير تساعدك تهدى وتطمن. وأهم وسيلة هي ذكر الله! ربنا عز وجل قال: {الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللهِ ۗ أَلَا بِذِكْرِ اللهِ تَطْمَئِنُّ الْقُلُوبُ} يعني قلبك هيطمن بذكر الله.. وكمان ربنا قال: {يَا أَيُّهَا الَّذِينَ آمَنُوا إِذَا لَقِيتُمْ فِئَةً فَاثْبُتُوا وَاذْكُرُوا اللهَ كَثِيرًا لَّعَلَّكُمْ تُفْلِحُونَ} الآية دي بقى خطيرة! إنت متخيل ربنا عز وجل بيقول للمؤمنين لما تكونوا في حرب ضد العدو اثبتوا واصبروا واذكروا ربنا كتييير؛ لأن كل ده من أسباب النصر. يعني الذِكر من أسباب النصر في الحروب.. فما بالك بأثره في طمأنة القلوب! فنصيحتي ليك إنك تحافظ على ورد يومي من القرآن ولو صفحة واحدة + إنك تحافظ على أذكار الصباح والمساء والنوم كل يوم. ومش هتقل عليك من أكتر من كده. يالا جمد قلبك، واستعن بالله، وروح ذاكر وأبشر خيرًا يا بطل! #س_ج_ليالي_الامتحان