Balóchi
2.4K subscribers
About Balóchi
Balóchiay Látini syáhag Balóchiay labzán wánák kant.
Similar Channels
Swipe to see more
Posts
*Taw Áchár Ay, Dawr Án Man* Taw áchár ay, dawr án man Taw daryá ay, kawr án man Tai meskén sarshódán byárant Gón sargwápán shawr án man Nósh kanán shahdáni badalá Andóháni jawrán man!!! Taw ke kahray arshay gerók ay Mehray zeminay pawr án man _Mobárek Kázi_
*Mani Zemin Ent* Cherágén óstáni rozhnay drin ent, mani zemin ent Sabáay wazhbu ent yá samin ent, mani zemin ent Modám pahmit delay hayáláni gálewárán Jahán zánt é mani zemin ent, mani zemin ent É shayr chammáni tahtariná lakir kasshit É shayr emrózay sártén gin ent, mani zemin ent Rechant arsáni hajgén tróngal cha rahnén chammán Ke dertag jámag o bon jabin ent, mani zemin ent É goddhi jang ent Balóch rájay pa ajuiá Kayt enkelábé maná yakin ent, mani zemin ent Kanán man zyárat wati shahidáni wábjáhán Golámén rájáni jang din ent, mani zemin ent Hazár randá goshán man Ráhi gón kóhén dardán É hákay ópárá áprin ent, mani zemin ent _Abdolláh Ráhi_ _30 Aprél 2009, Gwáder_
*Gitánjali* Nay Shahrbánu, nay taw may Goli Gitánjali, oo Gitánjali Wati dód o rasm o rawáján shamósh É kallig o mashk o nepádán shamósh É shéken o patkénk, é kólén nán É gwánzag o kápar, é pall o bán Kahir o koner tai, gazz o kalér É gók o nangár, chenáláni chér Tai kárá nayáyant ke jendayg ant tai Boraw dirén molkán, taw degeray bebi Zahirók o názénk o sawtán shamósh Gazal dáem per band, taw dhaiko majan Pa dóstán deli, taw háiku beband Wati gál o labzán, zobáná shamósh Wati jenday jáná cha pashká lagósh Taw talwas pa Gáleb, pa Mirá bezar Bekan layb o gwázi o molká betarr Bálách shamóshtag, shamósh Chákará Makan yát Gwahrámá, taw bell Kambará Taw Mollá shamoshtag, taw Pázol shamosht Taw Simok shamoshtag, taw Máhal shamosht Taw Háni o Shayá lékay ganók Donyáyá nám ent tai brátkoshók Goshant bóli agan wassh ent, jenday badén Wati molkay harch kahn o ju ent tai Bálách taig ent o Dódá tai Bibagr taig ent o Gránáz tai Taig ent Hamid o Omarján tai Gazábék o Gazzi o Delján tai Nóróz taig ent, Nasir Hán tai Kalát Miray tai o Moltán tai Satar hoshk o wár ent zemin ent tai Hárán taig ent o Sistán tai Galá Dasht o Mandá, taw Kéchá galá Ke jendá tai bráhit saray tai koláh Pa taw Sanj o Bonjáh, tai Tés o Brés Bambur o Sohrkóh tai hast o nést Jenday tai chágerd, tai jannat ent Kawsh tai sabáhay, tai róch barkatén É mahluk o mardom, béherkatén Pakir o gadáén, dráh béwatén Wati bólián man chetawr yal kanán Man Bakkal o Gawray ke randá tachán Nay Shahrbánu, nay taw may Goli Gitánjali, oo Gitánjali Wati labzay shaydá, zobánay wati Wati jenday gapp o bayánay wati Man gégánán belly kanán Pázolay Man Bohiray gál án, sokan Kásomay Man dar bortag Payz o man wantag Paráz Man án Jósh o Thégór o Jebránay ráz Mirwádhi dóst ent, Jawánsál dóst Nasir napt o birén wati gál dóst Abábagr o Ezzat, maná Anká dóst Sayad dóst, tachkén wati ráhband Maná dóst wati rasm, maná dóst rawáj Wati kádh gazálén, delay taht o táj Man shaydá zobánay, man labzay hodók Wati chamm dóst ant, wati chammay rók Maná taw shegánán majan delbaray Pa man shayr wassh ant golén Sáheray Wati labzay bandig, zobánay wati Man náelmén jenday hayál án wati Wati jenday chágerd, mawál án wati Maná cha hayálán mani pach mager Maná róchá madhóbár, shapá sar mager Zobán dorbayán ent Balóchi mani Mani bándát hamésh o maróchi mani Mani labz o goptár, bayán ent hamésh Pa man ganj o gawhar, pa man kamm o gésh Zobán zendag bát o salámat bebát Mayárig bát Shóház, malámat bebát Nay Shahrbánu, Na taw may Goli Gitánjali, oo Gitánjali _Golám Hosayn Shóház_
*Tai Ke Tránagá Kapán* Manárá yát ent angatá Tai shepárén mahparáni meskbuén sáhegá Tai shahdmantagén anárkáni bósagay sahar!! Manárá yát ent angatá Tai sharábshánén didagáni kayp o nósh Man pa sad morád tengetant, dist wáhagay asar!! Manárá yát ent angatá Tai golábdróshomén tanaklonthiá Mani gamáni syáhshap kotant chó jannatay hazárnázén ráhsar!! Manárá yát ent angatá Tai chandanén badan chó narm ábréshomá gerókay shahmay darwar at!! Man dánke moddaté tai zabád o mehlabén badan watá gón kort sar mán sar!! Satar ke dawr gwastagén padá nabant pa maná Bale man angatá baré Tai ke tránagá kapán Gamáni dág nók bant Delá cherág rók bant Mai-1982, Macch _*Mobárek Kázi*_
*Balóchay Bárig Allamá Kayt* É kóh! May dhéhay páspán ant May zemin ant o ázmán ant É gatth o gar, é talár o sangar, é zéd o kahchar É meskén maydán o patth o gréshag!! É kahn o shahju o kawr o kilag, Balóchay shán ant!! May rájay ázátiay neshán ant!! Modám é nárahá janán ant!! Dán yakk estálé hast mánit Mán ázmáná!!! Dán róchay rozhnái hastagár ent! Mán jaháná Dán máh rók ent!! Shapcherágén!! Dán bám rokshit Gerók shahmit!! Man saddak án!! Man delá yakin án Balóchay bárig allamá kayt Balóchay bárig allamá kayt Aprél-1982 Macch _Mobárek Kázi_
Oo Golábay Poll Atá Shád Del mani nálit chó bolbol, oo golábay poll Byá mani dardén delay holl, oo golábay poll Shap tahárén chó tai zolpáni siká ent Máhekáni tai lekáhay tránagay bráh ent Yát kayt tai góragén koll, oo golábay poll Taw bahárgáhay bahár ay, taw zeri nód ay Taw mani armán ay, ommét ay, delay bód ay Bébadal, bématth o bémoll, oo golábay poll Byá ke gón taw sáhaté zenday bogwázénán Gón delay sázá tai hosná benázénán Byá mani mehráni gránmoll, oo golábay poll
